පෙනුමෙ රහස ගැන හැමෝම අහනවා – වත්සලා දියලගොඩ

 

මීට කාලෙකට කලින් ස්වාධීන රූපවාහිනියේ විකාශය වුණ ‘මුතු කිරිල්ලී’ ටෙලි නාට්‍යය නොබලපු කෙනෙක් නැති තරම්. එදා එහි ‘නිරාශා’ ලෙසින් රංගනයෙන් එකතු වුණ රංගන ශිල්පිනිය ඔබට අමතක නැතිව ඇති. ඇය වත්සලා දියලගොඩ. එදා මෙදා තුර ඇයගේ ජනප්‍රියත්වය එලෙසමයි. අවුරුද්දක විතර නිහැඬියාවකින් පස්සෙ අද, ඇය ‘රාග’ තුළින් ඔබට දැකගන්නට පුළුවන්.

වත්සලා මේ දවස්වල ‘රාග’ තුළින් දකින්න ලැබෙනවා?

ඔව්, අවුරුද්දකට විතර පස්සෙ තමයි රාග හරහා ආපසු මාව දකින්න ලැබෙන්නෙ. ගොඩක් හොඳ ප්‍රතිචාර ලැබෙනව.

මේ කාලය අතරතුර මොනවද කළේ?

මේ ටෙලිකාස්ට් වෙන එක වැඩක් විතරයි. නමුත් පසුගිය කාලයේ කලාවට සම්බන්ධ විවිධ දේවල්වලට මම සහභාගි වුණා.

‘රාග’, දර්ශනතල අත්දැකීම් ගැන කතා කළොත්?

රාග කියන්නෙ අපි දර්ශනතලය තුළත් බොහොම සතුටින්, සහයෝගයෙන් කරන නිර්මාණයක්. ප්‍රවීණ සහ නවක ශිල්පීන් එක්ක හරි ලස්සනට අපි මේ වැඩේ කරනව. පෞද්ගලිකව මමත් හරිම ආසාවෙන් තමයි සෙට් එකට යන්නෙ.

පෙනුමෙ රහස ගැන හැමෝම අහනවා - වත්සලා දියලගොඩ

අවුරුද්දක් පුරාවට පුංචි තිරයේ දකින්න නොලැබුණේ?

මගේ පෞද්ගලික ජීවිතයේ කාර්යබහුලත්වය නිසයි පසුගිය කාලයේ නිර්මාණයකින් රසිකයන් අතරට එන්න බැරි වුණේ. දැන් ආයෙත් වැඩකරනව. බබාත් දැන් ටිකක් ලොකුයිනෙ.

කාලෙකින් නිර්මාණවල දකින්න නොලැබුණ නිසා ලැබෙන ආරාධනාවල අඩුවක් තියෙනවද?

නැහැ නැහැ… ආරාධනාවල අඩුවක් නැහැ. මේ අවුරුද්දට මේ වන විට ටෙලි නාට්‍ය තුනක වැඩ කරල තියෙනව. නමුත් ටෙලිකාස්ට් වෙන දවසක්නම් තවම දන්නෙ නැහැ. දැන්නම් ගොඩක් ආරාධනා ලැබෙනව.

වර්තමානයේ ක්‍ෂේත්‍රය තුළ අලුත් මුහුණු ගොඩක් දකින්න ලැබෙනව?

ඔව්, අලුත් නළු නිළියන් ගොඩක් ක්‍ෂේත්‍රයට එකතුවෙලා ඉන්නව. ඇත්තටම ඒ අතර ගොඩක් දක්‍ෂ අයත් ඉන්නව, හොඳින් මේන්ටේන් වෙන අය වගේම ගොඩක් ලස්සන අයත් ඉන්නව. ඒ අතර අද ඇවිත් හෙට යන අයත් ඉන්නව. මේක හොඳ තැනක්. හරියට තෝරාබේරාගෙන ඇවිත් හොඳට හිටියොත් වෙනත් ක්‍ෂේත්‍රවලට වඩා වැඩි දෙයක් ගන්න පුළුවන්.

අලුත් මුහුණු කොච්චර ආවත් වත්සලාගෙ ජනප්‍රියත්වය අඩුවක් වෙලා නැහැ?

ඔව් ඔව්… ඇත්තටම ඒකනම් මගේ වාසනාවක් කියලයි මට හිතෙන්නෙ. ඒ කාලෙ තිබුණ ජනප්‍රියත්වය අදටත් තියෙනව.

මගතොටදි ලැබෙන රසික ආදරය එහෙමමයි?

මට ඒක කවදත් තිබුණා. ඒක මගෙ පෙර පිනක් වෙන්න ඇති. හැමදාමත් වගේම මගතොටදි ලැබෙන රසික ආදරය අදටත් මට ඒ විදිහටම ලැබෙනව. ලංකාවේ වුණත්, පිටරටදි වුණත් මම ඇත්තටම ඒක විඳිනව.

තාමත් ඔවුන් මුතුකිරිල්ලිව මතක්කරනවද?

ඔව් ඔව්… කොච්චර කොහොම වුණත් අදටත් ප්‍රේක්‍ෂකයන්ගෙ මතකයේ ඉහළින්ම ඉන්නෙ මුතුකිරිල්ලි.

එදා සහ අද ඔබ දකින වෙනස මොන වගේද?

එදා තිබුණ ඒ ජනප්‍රියත්වය අපිට හැමදාමත් තියාගන්න බැහැ. නමුත් ඉතින් අපිට පුළුවන් විදිහට හොඳ නිර්මාණයකකට දායක වෙලා, ඒක පවත්වාගෙන යන්න පුළුවන්. ඒ නිසා මට ලොකුවට කාර්යබහුල වෙන්න වුවමනාවකුත් නැහැ. එදා වුණත් අද වුණත් මට ලැබෙන ප්‍රතිචාරත් එක්ක හරි සතුටින් ඉන්නව.

‘රාග’ සඳහා ආරාධනාව ලැබෙන්නෙ කොහොමද?

මට මේ චරිතය සඳහා කතාකරන්නෙ ශිවා අයියා. ඔහුත් එක්ක වැඩක් කරන්න මටත් ලොකු ආසාවක් තිබුණා. ඒ අනුව ගිය අවුරුද්දෙ ඔහුගෙ එක ඩ්‍රාමා එකකට සම්බන්ධ වෙන්න මට අවස්ථාවක් ලැබුණා. ඒකෙන් පස්සෙ තමයි රාග සඳහා ආරාධනය එන්නෙ.

පිටපත ගැන මොකද හිතුනෙ?

මට හිතුණා රන්දිමා කියන්නෙ ටිකක් වෙනස් චරිතයක් කියල. ගොඩක් සල්ලිකාර පවුලක අක්කල නංගිල තුන්දෙනකුගෙන් දෙවැනියා මම. සාමාන්‍ය රස්සාවක් කරන මනුස්සයෙක් එක්ක මම පැන ගිහිල්ලා ලබන ජීවන අත්දැකීම් තමයි මේ තුළින් කතා වෙන්නෙ. ඒවත් එක්ක බලනකොට මම මෙතෙක් කළ චරිතවලින් ටිකක් වෙනස් වෙන චරිතයක් නිසා හරි ආසාවෙන් භාර ගත්තා.

වත්සලා රංගන ක්‍ෂේත්‍රයට ඇවිත් දැන් දිගු කාලයක් වෙනව?

ඔව්, මම මේ ක්‍ෂේත්‍රයට ඇවිත් දැන් අවුරුදු දහ අටක් විතර වෙනව. ඒ කාලය ඇතුළත මහා ලොකු නිර්මාණ ප්‍රමාණයකට මම දායක නොවුණත් පුළුවන් විදිහට මට ලැබුණ හැම නිර්මාණයකටම මම සාධාරණයක් කළා කියල හිතනව. ඒ නිසයි අදටත් ප්‍රේක්‍ෂකයන්ට මගේ නම කිව්ව ගමන්, මාව දැක්ක ගමන් මට ඒ විදිහට ප්‍රතිචාර ලැබෙන්නෙ. සාමාන්‍යයෙන් කෙනකුට ලේසියෙන් මේ ක්‍ෂේත්‍රයට එන්න අමාරුයි. ආවත් නමක් තියාගන්න ඊටත් වඩා අමාරුයි. මේ හැම දේම අද මට ලැබිල තියෙන්නෙ මගේ වාසනාවකට කියලයි මම හිතන්නෙ.

මෙතෙක් ලැබුණ චරිත ගැන අදහස මොන වගේද?

ඉස්සර නම් මට ලැබුණෙ දඟකාර, කටකාර චරිත. දැන් එතනින් එහාට වෙනස් වෙලා මම චරිත කරන්න පටන් අරන් තියෙනව.

මවක් නිසා චරිතවලට සීමාවන් තියෙනවද?

එහෙම සීමාවක් නැහැ. පිටපත මට ගැළපෙනවනම් චරිතය භාරගන්නව.

දුවත් එක්ක ගෙවන ජීවිතය?

දැන් දුව ටිකක් ලොකුයිනෙ. එයත් එක්ක ඉඳිද්දිනම් වෙලාව යනව තේරෙන්නෙ නැහැ.

‘රාග’ හි ඔබ රඟපාන්නෙ කුසල් එක්ක. කොහොමද ඒ අත්දැකීම?

ඔව්, ඒ චරිතය මම හරිම ආසාවෙන් කුසල් එක්ක කරන්නෙ. මොකද කුසල් කියන්නෙ හරිම දක්‍ෂ නළුවෙක්. ඔහුගෙ පළමුවැනි ටෙලි නාට්‍යය ටීවී එකේ දකිද්දි මට හිතුණා ඔහුත් එක්ක රඟපාන්න තිබුණ නම් හොඳයි කියල.

වත්සලාගෙ පෙනුමෙ රහස මොකක්ද?

ඒක හැමෝම අහනව. මම දන්නෙත් නැහැ. සාමාන්‍ය විදිහට මම ජීවත් වෙනව. විශේෂ දෙයක් කරන්නෙත් නැහැ.

සිනමාවට කැමැත්තක් තියෙනවද?

ඔව්, බොහෝ විට මේ අවුරුද්ද අවසානයේ සිනමා නිර්මාණයකට සම්බන්ධ වෙන්න අවස්ථාව ලැබෙයි.

මහේෂ් එදිරිසිංහ