.jpg)
මේ දවස්වල පුංචි තිරයේ යන ටෙලිනාට්‍ය දිහා බැලුවම පැහැදිලි වන දෙයක් තමයි නවක නළු නිළි කැළක් පුංචි තිරය ආක්‍රමණය කරන්න අරගෙන කියලා. මොකද මේ දිනවල විකාශනය වන බොහෝමයක් ටෙලිනාට්‍යවල ප්‍රධාන චරිත සිදුකරන්නේ නවක නළු නිළියෝ. ඒ අතරින් එක් නිළියක් තමයි "සිත්මි එදිරිසිංහ" කියන්නේ. ඇය හිරු නාලිකාවේ "මාස්ටර් සර්" ටෙලිනාට්‍යයෙත් ස්වණවාහිනී නාළිකාවේ යන "හිරිපොද වැස්ස" ටෙලිනාට්‍යයෙත් දකින්න පුළුවන්.
මේ දවස්වල සිත්මි ටෙලිනාට්‍ය කිහිපයක දකින්න ලැබෙනවා?
හිරු ටීවී නාළිකාවේ විකාශනය වන අරුණ ජයවර්ධන මහතා අධ්‍යක්ෂණය කරන "මාස්ටර් සර්" ටෙලිනාට්‍යයේ නාද්‍යාටත්, ස්වර්ණවාහිනී නාලිකාවේ විකාශනය වන ඉන්දික ධර්මතිලක මහතා අධ්‍යක්ෂණය කරන "හිරිපොද වැස්ස" ටෙලිනාට්‍යයේ චාරුගේ චරිතයටත් රංගනයෙන් දායක වෙනවා. ඒත් එක්ක ටිකක් කාර්ය බහුලයි.
ඒ අතරින් "මාස්ටර් සර්" ටෙලිනාට්‍යයේ ඔබ කරන්නේ ප්‍රධාන චරිතයක්?
නාද්‍යා කියන ප්‍රධාන නිළියගේ චරිතය මම කරන්නේ. මං රඟපාන්න අරන් කෙටි කාලයක් තුළ ප්‍රධාන චරිතයක් ලැබීම ගැන පුදුම සතුටුයි.
"මාස්ටර් සර්" ටෙලිනාට්‍යයේ ඔබත් එක්ක ජනප්‍රිය නළු නිළි කැළක්ම රඟපානවා?
විශ්ව කොඩිකාර, උපේක්ෂා ස්වර්ණමාලි, නිසල හෙට්ටිආරච්චි, උදයන්ති කුලතුංග වගේ ජනප්‍රිය නළු නිළි කැළක් රඟපානවා. ඇත්තටම ඒ වගේ පිරිසක් එක්ක රඟපාන්න ලැබීමත් වාසනාවක්.
නිළියක් විදිහට සිත්මිට ලැබෙන ප්‍රේක්ෂක ප්‍රතිචාර ගැන කිව්වොත්?
ඇත්තටම හොඳ ප්‍රතිචාර ලැබෙනවා. නොහිතපු අවස්ථාවල සමහරු මාව අඳුරගෙන මට කතා කරනවා. මේ ළඟකදිත් මං වාහනේ යනකොට ත්‍රීවිලර් එකක ගිය පිරිමි ළමයි කට්ටියක් අන්න අන්න "හිරිපොද වැස්ස" එකේ චාරු කියලා මගේ දිහාට අත් දික්කළා. ඒ ප්‍රේක්ෂක ප්‍රතිචාර තමයි කලාවේ නියැ‍ළෙන අපිට සතුටකට තියෙන්නේ.
ඔබේ සහෝදරියත් මේ වෙනකොට ජනප්‍රිය නිළියක් නේද?
පියුමාලි එදිරිසිංහ කියන්නේ අක්කා. එයා තමයි මේ දවස්වල හිරු නාළිකාවේ විකාශය වෙන "පාට කුරුල්ලෝ" කියන ටෙලිනාට්‍යයේ නිම්නාවිට වගේම සිරස නාලිකාවේ "ආලවන්තී" ටෙලිනාට්‍යයේ මෙතූට රඟපාන්නේ. ඇත්තටම කිව්වොත් අක්කා රඟපානවා දැකලයි මටත් රඟපාන්න ආස හිතුණේ. එහෙම නැතුව කිසිම දවසක මට නිළියක් වෙන්න හීනයක් තිබිලා නෑ.
එතකොට සිත්මිට රඟපාන්න අවස්ථාවත් ලැබුණේ අක්කා නිසාද?
දවසක් මං අක්කා ඉන්න "පාට කුරුල්ලෝ" ටෙලිනාට්‍යයේ රූගතකිරීම් බලන්න ගියා. එදා ගියාම ඒ ටෙලිනාට්‍යයේ සහාය අධ්‍යක්ෂ වන තරංග සම්පත් අයියයි වේෂ නිරූපණය කරන වාසනා බන්ඩාර අයියයි මගේ ෆොටෝ කීපයක් අරන් ස්වර්ණවාහිනියේ "හිරිපොද වැස්ස" කියන ටෙලිනාට්‍ය කණ්ඩායමට යවලා තිබුණා. පස්සේ ෆොටෝ දැකලා හිරිපොද වැස්ස ටෙලිනාට්‍යයේ අධ්‍යක්තුමා වන ඉන්දික ධර්මතිලක සහ නිෂ්පාදක ප්‍රභාත් රෝෂන් අයියලා ස්ක්‍රීන් ටෙස්ට් එකකට කතා කළා. පස්සේ ඒ ටෙලිනාට්‍යයේ මට "චාරු" කියන චරිතය කරන්න අවස්ථාව දුන්නා.
දැන්නම් සිත්මිට රඟපාන්න අකමැත්තක් නැතුව ඇති?
දැන් නම් රඟපාන්න ආසයි. මට ලැබෙන ප්‍රේක්ෂක ප්‍රතිචාරත් එක්ක ඒ ආසාව දවසින් දවස වැඩිවෙනවා මිසක් අඩුවීමක් නෑ.
රඟපාන අතරේ සිදුවුණු අමතක නොවන සිදුවීම් එහෙම නැද්ද?
හිරිපොද වැස්ස ටෙලිනාට්‍යයේ චාරු කියන්නේ ටිකක් දඟ චරිතයක්. නිතරම පන්තියේ ළමයි එක්ක රණ්ඩුවල පැටලෙන චරිතයක්. ඒවා තමයි අමතක නොවෙන සිදුවීම්. සැරයක් රණ්ඩුවකදි ගෑනු ළමයෙක් කොණ්ඩෙන් ඇද්දා. එදා නම් මට ඇතිවුණා. ඇස්වලින් කඳුළුත් ආවා. ඒක අමතක වෙන්නේ නෑ.
සිත්මිට අක්කා ගැන මොකද හිතෙන්නේ?
අක්කා අද වෙනකොට ගොඩාක් ජනප්‍රියයි. ඒත් එක්ක නංගි විදිහට ලොකු සතුටක් තියෙනවා.
දැන් ගෙදර ජනප්‍රිය නිළියෝ දෙන්නෙක්ම ඉන්න එකේ ඒ අත්දැකීම කොයි වගේද?
ඒක අපූරු අත්දැකීමක්. දැන් රෑට අක්කා ඉන්න ටෙලිනාට්‍ය දෙකකුයි මම ඉන්න ටෙලිනාට්‍යය දෙකකුයි විකාශනය වෙන නිසා බලන්නේ කොයි එකද කියලත් ප්‍රශ්නයක්. ඒක නිසා ගොඩාක් වෙලාවක කතා හතරෙන් දෙක තුනක් බලන්න වෙන්නේ යූටියුබ් ගිහින් තමයි.
සිත්මි රූපවාහිනී නාලිකාවක අවුරුදු කුමරි තරගයකත් හිටියා නේද?
2023 "හිරු අවුරුදු කුමරිය" තරගයට සහභාගි වෙලා තුන්වෙනියා වුණා. හැබැයි ඒකට ගියෙත් අපේ ගෙදර අයගේ බලකිරිල්ලට. තාත්තා තමයි ඒකට ඇප්ලිකේෂන් දැම්මෙත්.
දැන් ජනප්‍රිය නිළියක් නිසා ඉදිරියේදි ඔබට ගොසිප් එහෙමත් හැදෙයි?
ඒ ගැන එච්චර ලොකුවට හිතන්නේ නෑ. ඒවගේ වැඩි හරියක් තියෙන්නේ බොරුනේ. ඒ නිසා මට ගොසිප් හැදුනත් ඒවා ඔළුවට අරගෙන මං නම් කලබලවෙලා දඟලන්නේ නෑ.
සිත්මිට ආදරය ගැන මොකද හිතෙන්නේ?
අනේ ආදරේ ගැන කියන්න තරම් එහෙම ලොකු දෙයක් නෑ. ඒත් මම හිතනවා ආදරේ කියන්නේ සුන්දර දෙයක්. හැබැයි ඒකට ආදරේ ගැන දන්න කෙනෙක් මුණනගැහෙන්න ඕනේ. ඒ හරි කෙනාවම මුනගැහුණොත් ආදරේ සුන්දරයි.
මේ වෙනකොට සිත්මිට එහෙම ආදරයක් මුනගැහිලා තියෙනවද?
ඔව්. එහෙම ආදරයක් තියෙනවා.
ඒ කියන්නේ මේ වෙද්දි ඔබ පෙම්වතියක්?
ඔව් පෙම්වතියක්. ඒක දැන් හැමෝම දන්නවා.
.png)