.png)
ඔහු නමින් මධුෂාන් නානායක්කාර. හැබැයි ගොඩක් දෙනෙක් දන්නෙ ‘නානා’ නමින්. ඔහුට මේ නම හැදුනෙ කොහොමද කියලත් මේ කතාබහ ත-ුළදි අපිට කිව්වා. විශේෂයෙන්ම අපි මධුෂාන් එක්ක කතාකරන්න හිතුවෙ ‘අයිස්ක්‍රීම්’ නිසා. ඒ තමයි ඔහු මේ දවස්වල රංගනයෙන් එකතුවෙන අලුත්ම සිනමා නිර්මාණය. මධුෂාන් අපිට කිව්ව ඒ කතාව ඔබ වෙනුවෙන් මේ විදිහට සටහන් කළා.
මධුෂාන් මේ දවස්වල හරි ආසාවෙන් ‘අයිස්ක්‍රීම්’ රස බලනවලු?
ඔව්, මේ අයිස්ක්‍රීම් එක ගැන කිව්වොත් එහෙම, සමහර වෙලාවට හිතෙනව දැන් යම් ප්‍රමාණෙකට දියවෙලාදමන්ද කියලත්. නමුත් ඒක ඉතාමත් රහයි. මේ චිත්‍රපටය කරල අවුරුදු නවයයි මාස ගණනක් වෙනව. දැන් දශකයක් වෙනව. අවුරුදු දහයකට පස්සෙ තමයි ජනගත වුණේ. ‘අයිස්ක්‍රීම්’ කොරෝනාවලට අහුවුණා, පාස්කු ප්‍රහාරයට අහුවුණා, රටේ තිබුණ අස්ථාවර දේශපාලනයට යට වුණා, අරගලයට අහුවුණා, මේ ඔක්කෝගෙන්ම නිදහස්වෙලා තමයි ජනගත කරන්න අවස්ථාව ලැබුණෙ. නමුත් චිත්‍රපටයට එච්චර වයසයි කියල පේන්නෙ නැහැ. ඒ වුණාට අද මගේ චරිතයේ යම් යම් කොටස් දකිනකොට හිතෙනව මට ඒක මෙහෙම කරන්න තිබුණනෙ කියල. සමස්තයක් විදියට ගත්තාම ප්‍රදීප් ධර්මදාසගෙ පළමු සිනමා අධ්‍යක්‍ෂණය වන ‘අයිස්ක්‍රීම්’ කියන්නෙ වෙනස් වැඩවලිනුත් වෙනස්ම වැඩක්.
අධ්‍යක්‍ෂවරු මාව බලාපොරොත්තු වෙන්නෙ මේ ඇඟත් එක්ක
අබාධයකින් ඉන්න අතරෙත් ‘අයිස්ක්‍රීම්’ නිසා මධුෂාන්ට සෑහෙන දුවන්න වුණාලු?
ඇත්තටම අයිස්ක්‍රීම් චිත්‍රපටයට මට කතාකරනකොට මම රිය අනතුරකට ලක්වෙලා, කකුලක් කැඩිල සම්පූර්ණයෙන් හොඳ මට්ටමක හිටියෙ නැහැ. ඇවිදිනකොටත් පොඩි නොණ්ඩියක් තිබුණා. ප්‍රදීප් ධර්මදාස කතාකරපු වෙලාවෙ දුවන්න තියෙන කතාවකුත් කිව්වා. ඒ වෙලාවෙ මම කිව්වා, දුවන්නම් හැබැයි බලාපොරොත්තු වෙන වේගෙනම් තියෙයිද දන්නෙ නැහැ කියල. ඒ වෙලාවෙ ප්‍රදීප් කිව්වා හේමාල්ව පහුකරන්න ඕන නැහැ, එයාගෙ පස්සෙන් දිව්වාම ඇති කියල. මට ලොකුම අභියෝගය වුණේ ඒක. මොකද චිත්‍රපටයෙන් තුනෙන් දෙකක්ම තිබුණෙ දුවන්න. ඒ දෙකෙන් එකක් විතර මම දුවනව. මේ දුවන ෂූටිං තිබුණෙත් නාගරික ප්‍රදේශවල. ඉස්සරහින් චින්තක සෝමකීර්ති කැමරා මවුන්ට් කරගෙන ත්‍රීවීල් එකක යනව. ඒකට සමගාමීව හේමාල් ජෙට් එක වගේ දුවනව. මටත් අතහරින්න බැහැනෙ. මමත් දුවගෙනම ගියා.
චිත්‍රපටය තුළ මේ දර්ශන නරඹනකොට දැනුණ හැඟීම මොන වගේද?
දුවපු දිවිල්ල දැක්කාම ඒ වෙලාවෙ තමයි කකුල් කැක්කු-ම ආවෙ.
ප්‍රදීප් ධර්මදාස කියන අධ්‍යක්‍ෂවරයා ඔබ දකින්නෙ කොහොමද?
මේ ප්‍රදීප්ගෙ පළමු සිනමා නිර්මාණය. අපිට චරිත හරියට ප්ලේකරගන්න, ඔහු ඒ ඒ චරිත සම්බන්ධයෙන් හරියට අදහස දීල තිබුණා. ඔහු සොඳුරු අධ්‍යක්‍ෂවරයෙක්. ඒ වගේම අපේ කෲ එකම මේ නිර්මාණය තුළ බොහොම ආදරෙන් වැඩ කළේ.
මේ දවස්වල වැඩකටයුතු කොහොමද?
මේ දවස්වල සුපුරුදු පරිදි ටෙලි නාට්‍ය කිහිපයක වැඩ කරගෙන යනව. අප්‍රියෙල් මාසෙ නිසා දැන් වැඩ ටිකක් වැඩියි. ඒ වගේම අසංක සායක්කාරගෙ ‘කොටු’ වේදිකා නාට්‍යයත් අරගෙන අපි මේ වන විට දිවයින පුරාම යනව.
‘කොටු’ වේදිකා නාට්‍යයට ලැබෙන්නෙ මොන වගේ රසික ප්‍රතිචාරයක්ද?
මේ නිර්මාණය වේදිකාව උඩ කරන්න පුළුවන් වෙනම ෆැන්ටසි එකක්. වේදිකාවක් උඩ කරන්න නොහිතපු දෙයක් කරපු නාට්‍යයක් තමයි ‘කොටු’ කියන්නෙ. මේ කන්සෙප්ට් එක සහ අසංකගෙ සූක්‍ෂ්ම ලියැවිල්ල ඉතාමත් රහයි. මේක වඩාත්ම සුදුසු වෙන්නෙ වැඩිහිටියන්ට තමයි.
‘කොටු’, මෙවර රාජ්‍ය නාට්‍ය උළෙලේදී සම්මාන රැසකට හිමිකම් කියනව?
ඔව්, හොඳම නළුවා, හොඳම සහය නළුවා, හොඳම සහය නිළිය, ලයිටින්, ස්ටේජ් මැනේජ්මන්ට් වගේ සම්මාන අටක් දිනාගන්නව.
මධුෂාන්ට දැන් වෙනස් චරිත ටිකක් ලැබෙනව?
මොන වගේ චරිතයක් ලැබුණත් ඒකට හරියන්න වෙනස් වෙලා වැඩේ කරන්නයි තියෙන්නෙ. පසුගිය දවස්වල මං ඉතාම ආසාවෙන් හිටපු චරිතයක් ලැබිල ඒ නිර්මාණයට සම්බන්ධ වුණා. ඒ කොරතොට හාමුදුරුවන්ගෙ චරිතය. ඒ වගේ චරිත දෙකක් නිරූපණය කරන්න ආසාවෙන් හිටියෙ. එකක් ගොළු කෙනකුගෙ චරිතයක්. අනික තමයි මට මේ ලැබුණෙ.
නානගෙ චැනල් එකට මොකද වුණේ?
ඇත්තටම ෂූට් කළේ නැහැ කාලෙකින්. කොහොම හරි අප්‍රියෙල් මාසෙට කලින් ටිකක් ෂූට් කරගන්න උත්සාහ කරනව.
මොකද අතපසු වුණේ?
අවුරුද්දකට වැඩි කාලයක් තිස්සෙ මම ටිකක් හිරවෙලා හිටියා. ගිය අවුරුද්දෙ මේ වෙනකොට මම ඉස්පිරිතාලෙ හිටියෙ. ඊට පස්සෙ මගේ බිරිඳ අසනීප වුණා. ඒ වගේ කරදර ටිකක් සිද්ධ වුණා. ඇත්තටම කිව්වොත් විහිළු කරන මානසික මට්ටමක හිටියෙ නැහැ.
ඇඟපත ටිකක් අඩුකරගන්න අදහසක් නැද්ද?
ඔව් ඔව්… අදහසක් තියෙනව. අපේ ගෙදරත් ඒක නිතරම කැරකෙනව. නමුත් කරගන්න බැරි ප්‍රශ්නයක් තියෙන්නෙ. මොකද බොහෝ විට අධ්‍යක්‍ෂවරු මාව බලාපොරොත්තු වෙන්නෙ මේ ඇඟත් එක්ක සහ මගේ බිරිඳත් බොහොම රසට කෑම උයන්න දන්නව. ඔය කාරණා ඔක්කොම එකට සෙට් වුණාම පොඩ්ඩක් ඇඟපත ගැන හිතන කාරණාව පස්සට ගිහින් තියෙනව.
මධුෂාන්ට කොහොමද ‘නානා’ කියන කාර්ඩ් එක වැදුනෙ?
මේ කාර්ඩ් එක මට වැදුනෙ අද ඊයෙක නෙමෙයි, පාසල් යන කාලෙමයි. මම පාසල් ගියේ කොළඹ නාලන්දා විදුහලට. පන්තියේදි මට කතාකරන්නෙ මගේ වාසගම වන නානායක්කාර නමින්. කාලයක් යද්දි යාළුවො අතර නානා කියන ෂෝට් වර්ෂන් එකට ආවා. එදා ඉඳන් මම ‘නානා’.
මොනවද විකාශය වන නිර්මාණ?
හිරු නාළිකාවේ විකාශය වන ‘රොන් සොයා’ සහ සිරස නාළිකාවේ විකාශය වන ‘ආලවන්ති’ තමයි මේ දවස්වල මගේ විකාශය වන ටෙලි නාට්‍ය තියෙන්නෙ. ඒ වගේම තවත් අලුත් වැඩක් ළඟදීම දැකගන්න ලැබෙයි.
ඔබ තුළ සිටි ක්‍රීඩකයාට මොකද වුණේ?
මං තුළ හිටපු කඹ ඇදීමේ ක්‍රීඩකයා නම් තවමත් ඉන්නව. නමුත් අපේ දෙහිවල යුනයිටඩ් කියන කණ්ඩායමට එකතු වෙලා වැඩක් කරන්න වෙලාවක් නැහැ.
මහේෂ් එදිරිසිංහ
.png)