.jpg)
නම, නිමාෂා සංදීපනී. ඇය නර්තන ශිල්පිනියක්. නිමාෂාව මුලදි බොහෝ දෙනෙක් දැක්කෙ මියුසික් වීඩියෝ වලින්. ඉන් පසුව ඇය රංගන ක්‍ෂේත්‍රයට පිවිසෙනව. ඒ අනුව ‘ආලවන්ති’ ටෙලි නාට්‍යය හරහා රසිකයන්ට ඇයගේ රංගන හැකියාවත් දැකගන්න ලැබෙනව. ඒත් මියුසික් වීඩියෝවලට සම්බන්ධවෙන එක අතහැරල නැහැ. මේ, මීවිතට කිව්ව නිමාෂාගේ අලුත්ම තොරතුරු.
නිමාෂා, මොනවද මේ දවස්වල වැඩකටයුතු?
ඇත්තටම මේ දවස්වලනම් ටිකක් විතර බිසී. ඉදිරියේදී මියුසික් වීඩියෝ තුනක් විතර රිලීස් වෙන්නත් තියෙනව.
කවුද මේවාට සම්බන්ධ වුණේ?
යොහානියි, මමයි, අඛිල ධනුද්ධර අයියයි එකතුවෙලා මියුසික් වැඩක් කළා. ඒ වගේම භාචි සුසාන් එක්ක සහ අංජන පෙරේරා එක්කක් ඒ වගේම වැඩ දෙකක් කළා. ‘කල්පනා’ චිත්‍රපටයත් ඉදිරියේදී තිරගත වීමට නියමිතව තියෙනවා. ඒකෙත් ප්‍රධාන ගීතයට මම රංගනයෙන් දායක වෙනව.
ආදර යෝජනා තවම භාරගෙන නැහැ… - නිමාෂා සංදීපනි
යොහානි සමග කළ ගීතය ගැන කතා කළොත්?
ඇත්තටම මම හරි කැමතියි ඒ වැඩේට. යොහානිගෙ එන්නෙ වෙනම ලව් ස්ටෝරි වයිබ් එකක්.
නිමාෂාව බොහෝ දෙනෙක් හඳුනාගන්නෙ භාතිය සංතුෂ්ගෙ කොමළ ලියා ගීතයෙන්?
ඔව්, මට ඒ අවස්ථාව ආවෙ අපේ ඩාන්සිං ටීම් එකෙන්. ගයාන් ශ්‍රීමාල් සර් තමයි මට උදව් කළේ. ඇත්තටම ඒකෙන් ගොඩක් අයගෙ ආදරය මට ලැබුණා.
ඔබ නර්තනයට යොමු වෙන්නෙ කොහොමද?
නර්තනය කියන්නෙ මම පොඩිකාලෙ ඉඳන් කරපු දෙයක්. පාසලෙන් ඉවත් වුණාට පස්සෙ වෙළෙඳ දැන්වීම්වලට එකතු වුණා. ඒ කාලෙම වගේ ඩාන්සිං ටීම් එකක වැඩකරන්නත් මට අවස්ථාව ලැබුණා.
මේ ඩාන්සිං ටීම් එක ගැන විස්තර කළොත්?
අපේ ඩාන්සිං ටීම් එක, ගයාන් ශ්‍රීමාල් ඩාන්සිං ගෲප්. අදටත් මම මේ කණ්ඩායමට සම්බන්ධ වෙලා ඉන්නව. ඩාන්සිං කියන්නෙ මම ආසම දේ. කවදාවත් ඒක මිස් කරගන්නෙ නැහැ ඉතිං.
අපේ රටේත් දැන් නර්තනයට හොඳ තැනක් තියෙනව කිව්වොත්?
ඇත්තටම දැන් ලංකාවේ ඩාන්සිං කියන එක ගොඩක් හොඳ අතට යනව. අගය කරනව, පිළිගැනීමක් තියෙනව. ඉස්සර නම් එහෙම තිබුණෙ නැහැ.
කොමළ ලියාට ලැබුණෙ මොන වගේ ප්‍රතිචාරද?
කොමළ ලියා කියන්නෙ බී ඇන්ඩ් එස් ගෙ වෙනම වයිබ් එකක සෝන්ග් එකක්. ගොඩක් අයගෙන් ගොඩක් හොඳ ප්‍රතිචාර ලැබුණා. ඒ වගේම මට කොමළ ලියා කියල කතාකරන්නත් පටන්ගත්තා.
නිමාෂාගෙ විස්තර ටිකක් කියමු?
මම පදිංචිවෙලා ඉන්නෙ කිරිබත්ගොඩ. පාසල් ගියේ සෙන්ත් ෆ්‍රැන්සිස් කොලේජ් එකට. මගේ පවුලේ ඉන්නෙ අම්මයි, තාත්තයි, මමයි, මල්ලියි, නංගියි.
ගෙදරින් ලැබෙන සහයෝගය?
මගේ ඩාන්සිං වැඩවලට පොඩිකාලෙ ඉඳන්ම ගෙදරින් ලොකු සහයෝගයක් තිබුණා. මොකද මගේ අම්මා හරි කැමතියි මම ඩාන්සිං කරන එකට. අද වෙනකොට පවුලේ හැමෝගෙම සහයෝගයෙන් මම ඉදිරියට යනව.
පොඩි කාලෙ තිබුණ හීනය?
ඇත්තටම පොඩි කාලෙ මම ආසාවෙන් හිටියෙ ඩාන්සිං ටීචර් කෙනෙක් වෙන්න. ඇක්ට් කරන එක ගැන ලොකු අවබෝධයක් තිබුණෙ නැහැ. නමුත් අද වෙනකොට කාලයත් එක්ක ඒ දේවල් වෙනස්වෙලා තියෙනව.
පසුගිය කාලෙ රඟපාන්නත් අවස්ථාව ලැබුණා?
මට මේ ආරාධනාව කරන්නෙ චාමර සමරවික්‍රම අයියා. ඒ වෙනුවෙන් ඔහුට ගොඩක් ස්තූතිවන්ත වෙන්න ඕන. මට ලොකුවට ඇක්ටිං එක්ස්පීරියන්ස් එකක් නැහැ. නමුත් ශිවගුරුනාදන් සර්ගෙ සහ අනෙක් ශිල්පීන්ගේ සහයෝගයෙන් සාර්ථකව මගේ කොටස කරන්න පුළුවන් වුණා.
දිගටම රඟපාන්න අදහසක් තියෙනවද?
ඔව්, මම රඟපාන්න හරි කැමතියි. ඒ වගේම ඇක්ටිං ඉගෙනගන්නත් ආසාවක් තියෙනව. ඉගෙනගෙන දෙයක් කරන්න කැමතියි. මම හිතනව එහෙම වුණාම ඉදිරියට යන්න පුළුවන් වෙයි කියල.
‘ආලවන්ති’ ටෙලියට ලැබුණ ප්‍රතිචාර?
ඇත්තටම ගොඩක් හොඳ ප්‍රතිචාර ලැබුණා වගේම ගොඩක් දේවල් ඉගෙනගන්නත් අවස්ථාව ලැබුණා.
අලුත් ආරාධනා ලැබිල තියෙනවද?
දැනට රංගනය පැත්තෙන් අලුත් ආරාධනයක් ලැබිල නැහැ.
නිමාෂාගෙ වැඩි කැමැත්ත?
මම නර්තනයට තමයි වැඩිපුරම කැමති. ඒක මම පොඩිකාලෙ ඉඳන් ආසාවෙන් කරපු දේනෙ.
ඔබ රංගන ක්‍ෂේත්‍රය දකින්නෙ මොන විදිහටද?
රංගන ක්‍ෂේත්‍රය කියන්නෙ ගොඩක් හොඳ තැනක්. ටැලන්ට් එකක් තියෙන අයට අවස්ථාව තියෙනව ඉදිරියට යන්න. අපි හරි විදිහට, හරි තැන්වල හිටියොත් ගොඩක් හොඳ දේවල් ඉගෙනගන්න වගේම ගොඩක් හොඳ වැඩ කරන්නත් අවස්ථාව ලැබෙනව.
කැපිලි කෙටිලිවලට මුහුණ දීල තියෙනවද?
අපෝ ඔව්, ඒ වගේ අවස්ථා ගොඩක් තිබිල තියෙනව. මම හිතන්නෙ ඕනෑම ක්‍ෂේත්‍රයක මේ දේවල් තියෙනව. ඒවාට ඉතිං මුහුණ දෙන්නත් වෙනව.
කටකතා ගැන හිතනවද?
ඉස්සරනම් ගොඩක් හිතුව. දැන්නම් එහෙම නැහැ. අප හරි විදිහට ජීවත් වෙනවනම්, කාටවත් වැරැද්දක් කරන්නෙ නැත්නම් ඒ දේවල් ගැන හිතල වැඩක් නැහැ.
නර්තනය වෘත්තිය කරගන්න අදහසක් තියෙනවද?
දැනටත් මම වෘත්තීයමය මට්ටමින් නර්තන ශිල්පිනියක්. ඉදිරියේදී වෘත්තීයමය වශයෙන් රංගන ශිල්පිනියක් වෙන්න කැමතියි.
ජනප්‍රියත්වයත් එක්ක ආදර යෝජනාත් එනව ඇති?
ඔව්, එහෙම යෝජනා නම් ගොඩක් එනව. ඒ වුණාට තවම මුකුත් භාරගෙන නැහැ. හොඳ කෙනෙක් මුණගැහුන දවසට ඒ ගැන හිතල බලනව.
නිමාෂා හොයන ඒ හොඳ කෙනා මොන වගේ කෙනෙක් වෙන්න ඕනද?
අද සමාජය ගත්තාම මට හොයන්න සිදුවෙලා තියෙන්නෙ එක්කෙනකුට විතරක් ආදරය කරන කෙනෙක්. මොකද එහෙම අය හරි අඩුයිනෙ.
විලාසිතාවට මොන වගේ නැඹුරුවක්ද තියෙන්නෙ?
මම විලාසිතා කරන්න ගොඩක් කැමැති කෙනෙක්. අලුතින් එන ටේ‍රන්ඩ් එකත් එක්ක ෆොරින් අයව ෆලෝ කරල විලාසිතා කරන්න කැමතියි. ඒවා ගෙදර අයගෙනුත් අහල සීමාවකට කරනව.
මහේෂ් එදිරිසිංහ
.png)