.jpg)
ඔහු ලාංකේය කලා ක්ෂේත්‍රය තුළ තම රංගන පරාසය විදහා දැක් වූ අපූරු කලාකරුවෙක්. එමෙන්ම මවුස් නම් සිනමාපටය අධ්‍යක්ෂණය කළ ඔහු සිනමාව තුළ වෙනත් මානයක් ස්පර්ශ කළ අධ්‍යක්ෂවරයෙක්. මේ දිනවල විකාශය වන සසංකාරය ටෙලි නාට්‍ය නිසා ඔහු පිළිබඳව විසල් කතාබහක් ඇති වෙලා. අද එක්වන්නේ ප්‍රවීණ රංගන ශිල්පි වසන්ත මොරගොඩ.
මේ දවස් ගෙවී යන්නේ කෙසේද?
මේ දිනවල මම රංගනයෙන් දායකත්වය සපයන සසංකාර සහ රාග කියන ටෙලි නාට්‍ය විකාශය වෙනවා. ඒ වගේම මම පවත්වා ගෙන යන ඇක්ට් ඉම්පැක්ට් කියන ආයතනයේ වැඩකටයුතු සිදු වෙනවා. මේ වැඩකටයුතු සමඟ තමයි මේ දවස්වල කාලය ගත වෙන්නේ.
සසංකාරය ටෙලි නාට්‍යයේ හේතු හාමිගේ චරිතය ගැන කියනවා නම්?
ප්‍රියන්ත ප්‍රනාන්දු කියන අධ්‍යක්ෂවරයා මට මේ චරිතයට පණ පොවන්න පුළුවන්ද කියලා හදිස්සියේම කතා කළා. ඔහු මේ චරිතය පිළිබඳව වෙනත් රංගන ශිල්පියෙක් සමඟත් කතාබහ කර තිබුණා. නමුත් මට මේ චරිතය ලබා දුන් විට මම එය භාර ගත්තා. පිටපත කිය වූ විට මම ඒ චරිතයට කැමැති වුණා. ඒ චරිතය තුළ ජීව ගුණය කියන දෙය යහමින් තිබුණා. ඇතැම් ටෙලි නාට්‍ය තුළ සුදූම චරිත සහ කළුම චරිත සිටිනවා. යථාර්ථවාදී සමාජයක එහෙම චරිත සිටිනවා කියා මම විශ්වාස කරන්නේ නැහැ. හේතු හාමි කියන්නේ සුදුත් නැති කළුත් නැති අළු චරිතයක්. මම දකින විධියට ඔහු යහපත් චරිතයක්. එවැනි චරිත අපි ඕනෑ තරම් ගම්වල දැකලා තිබෙනවා.
මෙවැනි චරිතයක් රඟපෑමේදී විවිධ විවේචන එල්ල වෙනවා මේ ගැන ඔබේ අදහස?
වර්තමාන ක්ෂේත්‍රය තුළ සිටින අධ්‍යක්ෂවරු බොහෝ ඉදිරිගාමී නිර්මාණ කරනවා. ඉතින් කිසිම වෙලාවක නිර්මාණයකට බැරියර් දමන්න ඕන කියලා මම සිතන්නේ නැහැ. අලුත් නිර්මාණ දෙස අපි අලුත් ලෙස බලන්න ඕන. මේ චරිතය සම්බන්ධයෙන් ලොකු කතිකාවක් නිර්මාණය වෙලා. මේ චරිතයේ තිබෙන ඇතැම් ලක්ෂණ අපි තුළත් තිබෙනවා. අපි බෝධිසත්ව චරිත නෙවෙයිනේ. මෙවැනි විවේචන එල්ල වෙන්නේ ඉතා කුඩා කොටසක් නිසා. ලිංගිකත්වය වැනි දෙයක් ගැන අපි පොදුවේ කතා කරන්න ඕන. මේ ගැටලු සඟවාගෙන සිටීම තමයි අද සමාජ ව්‍යයසන ඇති වෙන්න බලපා තිබෙන්නේ. ලිංගිකත්වය කියන්නේ සදාචාරාත්මක නොවන දෙයක් නෙවෙයි. මේ චරිතයට ලැබෙන විවේචන මම ඉතා සුබවාදීව දකිනවා. මම මේ චරිතය රඟපාන විට නිරුවතින් පවා රඟපෑවා. මම චරිතයක් වෙනුවෙන් ඕනෑම කැපකිරීමක් කිරීමට ලැහැස්ති වෙනවා.
අධ්‍යක්ෂවරයාගේ භූමිකාව අමතක කර දැමුවාද?
මවුස් සිනමාපටය සමඟ මම ආර්ථික අර්බුද රැසකට මුහුණදුන්නා. මේ වන විට මම මගේ දෙවැනි සිනමාපටය නිර්මාණය කිරීමට ලැහැස්ති වෙමින් සිටිනවා. මගේ අධ්‍යක්ෂණ කටයුතුවල සහ හැදෑරීම් කටයුතුවල නැවතීමක් සිදු වෙලා නැහැ. ඒ වගේම වෙනස් හැඩයක ටෙලි නාට්‍යයක් අධ්‍යක්ෂණය කරන්නත් මම බලාපොරොත්තුවෙන් සිටිනවා. මනෝවිද්‍යාත්මක ප්‍රවේශයකින් මෙම නිර්මාණය සිදු කරන්න මම උත්සාහ දරනවා.
නව දේශපාලනික වෙනස ලාංකේය කලාවට කුමන ආකාරයක බලපෑමක් සිදු කරයිද?
පැවතුණු ආණ්ඩු කලාව දියුණු කිරීමට විවිධ උත්සාහයන් දැරුවා. නමුත් ඒවා සාර්ථක වුණු බවක් නම් දකින්න ලැබුණේ නැහැ. පුද්ගලවාදය කේන්ද්‍ර කරගනිමින් තමයි ඔවුන් වැඩ කළේ. නමුත් වත්මන් ආණ්ඩුවේ භාවිතාව දෙස බලන විට එය ඉතා සුබවාදී බව දකින්න පුළුවන්. ලංකාවේ කලාකරුවන් පාර්ලිමේන්තුවට ගිහින් වුණු දෙයක් නැහැ.
ලක්මාල් ධර්මරත්නගේ වාලම්පූරි ගැනත් කියමු?
වාලම්පූරි කියන්නේ වෙනම සංස්කෘතියක් තිබුණු වැඩක්. එම සිනමාපටය නිර්මාණය වුණු ආකාරය තුළ වෘත්තීයමය බවක් තිබුණා. මෙහි මම පණ පොවන්නේ සමන් කියලා පොලිස් නිලධාරියකුගේ චරිතයකට. මේ චරිතය මට ඉතා සුවිශේෂියි. මම ඉතා ආශාවෙන් ඒ චරිතයට පණ පෙව්වා. නැවත අවුරුදු ගණනාවක් යනකල් මම පොලිස් නිලධාරියෙක්ගේ චරිතයට පණ පොවන්නේ නැහැ. මට ඒ ඇති.
ඇක්ට් ඉම්පැක්ට් ගැන කතා කරමු?
ඇක්ට් ඉම්පැක්ට් කියන්නේ රඟපාන්න පමණක් උගන්වන දෙයක් නෙවෙයි. ලලිත කලාවන්ට පමණක් නෙවෙයි ජීවිතයටම වැදගත් කාරණාවන් අපි මෙයින් කියා දෙනවා. අද ළමයි සිටින්නේ ඉතා මන්දගාමී පසුගාමී තත්ත්වයක. අද ළමයින් තමන්ගේ නිර්මාණශීලීත්වය තියුණු කර ගන්න අවබෝධයක් නැහැ. මනෝ විද්‍යාත්මක ක්‍රමවේදයක් ඔස්සේ අපි නිර්මාණය කළ විෂය නිර්දේශයක් යටතේ තමයි අපි මෙහිදී රංගනය උගන්වන්නේ. අපි ඔවුන්ට ඔවුන් ගැන විශ්වාසයක් ඇති කරනවා. මේ ආයතනය ලංකාවේ ස්ථාන 16ක පවත්වාගෙන යනවා. මේ වන විට ළමයි 8,000ක් විතර අපෙන් අධ්‍යාපනය ලබා තිබෙනවා. තමන්ගේ හැකියාවන් ඉදිරියට ගෙන යෑමට ආත්ම ශක්තිය ගොඩනැඟීම තමයි අපේ ප්‍රධාන කාර්යභාරය.
ඔබට මේ වැඩකටයුතු සිදු කිරීමට උදව් උපකාර කරන පිරිස ගැන කියනවා නම්?
මම වෘත්තියමය රංගන ශිල්පියෙක් නෙවෙයි. මම වැඩ කරන්නේ පෞද්ගලික ආයතනයක. මට මගේ කාර්ය මණ්ඩලය මේ දේවල් කරන්න විශාල සහයෝගයක් ලබා දෙනවා. අපේ ආයතනය මඟින් මිනිසුන්ගේ ජීවිතය ඉහළ නංවන්න විශාල දායකත්වයක් සපයනවා. ඔවුන් මේ මොහොතේ ආදරයෙන් සිහිපත් කරන්න අවශ්‍යයි.
ඉදිරි වැඩකටයුතු ගැන කියමු?
මේ වන විට නිර්මාණ කිහිපයකින්ම මට ආරාධනා ලැබිලා තිබෙනවා. මම සාමන්‍යයෙන් එකම වගේ චරිත රඟපාන්න කැමැති නැහැ. මම චරිතයක් කරන්නේ තෝරා බේරාගනිමින්. මම භාර ගන්නේ මගේ රංගන පරාසය විදහා දක්වන්න හැකි චරිත පමණයි. ඉදිරියේදී නිර්මාණ කිහිපයකින් මාව ආදරණීය ප්‍රේක්ෂකයාට දැක ගන්න ලැබේවි.
ගිහාන් සචින්ත
.png)