.jpg)
ළමා නළුවෙක් ලෙස රංගනයට පිවිස, එතැනින් නතර නොවී ගායකයෙක් හා නර්තන ශිල්පියෙක් වශයෙන්ද කලාවේ බොහෝ තැන් ස්පර්ශ කළ ඔහු මෑතකදී වැඩි අවධානයක් දිනා ගත්තේ අලුත්ම සංගීත කණ්ඩායමක් ආරම්භ කිරීම හේතුවෙනුයි. නෙළුම් පොකුණ රංග ශාලාව එකම හිස් ගොඩක් බවට පත් කරමින් අති විශාල ප්‍රසංගයක් පවත්වමින් V8 නමින් තම නව සංගීත කණ්ඩායම කලා ලෝකයට හඳුන්වා දුන් ඔහු අපි කවුරුත් හඳුනන නව පරපුරේ දක්ෂ රංගන ශිල්පියෙක් වන සචින් චතුරංගයි.
ළඟදි පටන් ගත්ත අලුත්ම වැඩේ ගැන කියලම ඉමු?
ඔව් ඇත්තටම මම අලුතෙන්ම බෑන්ඩ් එකක් පටන් ගත්තා. අපි අටදෙනෙක් එකතුවෙලා පටන් ගත්ත බෑන්ඩ් එකේ නම තමයි V8. ඊට අමතරව මගේ හොඳම මිතුරෙක් වුණු ඩිමෙලෝ තමයි බෑන්ඩ් එකේ මැනේජ්මන්ට් පැත්ත සහ මියුසික් පැත්ත බලන්නේ. බෑන්ඩ් එක ලෝන්ච් කරද්දී අපි නෙළුම් පොකුණේ ලොකු ෂෝ එකක් පැවැත්වූවා. එදා ඒක බලන්න විශාල පිරිසක් ඇවිත් හිටියා වගේම ඔවුන්ගෙන් විශාල ආදරයක් සහ ආශීර්වාදයන් අපේ සංගීත කණ්ඩායම වෙනුවෙන් හිමි වුණා. ලංකාවේ සංගීත ක්ෂේත්‍රයට නව මුහුණුවරක් එකතු කරන්න තමයි අපි මේ බෑන්ඩ් එක ආරම්භ කළේ. පොප් කියන සංගීත ශෛලිය මූලික කරගෙන ආරම්භ කරපු අපේ බෑන්ඩ් එක හරහා ප්‍රසංග වේදිකාවේ අලුත් වෙනසක් ඇති කරන්න බලාපොරොත්තුවෙන් ඉන්නවා.
පොප් කියන්නේ ආසියානු සංගීත ක්ෂේත්‍රයේ විශාල පෙරළියක් ඇති කළ සංගීත ශෛලියක්, ඔබලා යන්න හදන්නෙත් ඒ පාරෙමද?
ලංකාව ඇතුළේ තාම එළියට ඇවිත් නැති දක්ෂ සංගීත කණ්ඩායම් ගොඩක් තිබෙනවා. නමුත් අපිට අවස්ථාවක් ලැබුණා එළියට එන්න. මෑත ඉතිහාසයේ ලංකාවේ කිසිම සංගීත කණ්ඩායමක් මේ තරම් විශාල ප්‍රසංගයකින් තමන්ගේ බෑන්ඩ් එක ලෝන්ච් කරන්න නැතුව ඇති. එතැනින් අපිට ලැබුණු පන්නරයෙන් නිසි ප්‍රයෝජන ගන්න එක තමයි මේ අවස්ථාවේ තිබෙන අරමුණ.
දිනපතා තරු බිහිවෙන ක්ෂේත්‍රයක් ඇතුළේ ඔබලාගේ ස්ථාවරත්වය ගොඩනඟා ගැනීම මොන තරම් අභියෝගාත්මකද?
ඇත්තටම ඒක ලොකු අභියෝගයක්. අපි රසිකයාව පිනවන තරමට තමයි අපිට මේ සංගීත ක්ෂේත්‍රය ඇතුළේ ස්ථාවරත්වය හදාගන්න පුළුවන් වෙන්නේ. අද ගොඩාක් සංගීත කණ්ඩායම් පපඩමක් බැද්දා වගේ පිපිලා ඇවිත් හුළං වැදුණා වගේ ඉක්මනට ඇකිළිලා යනවා. එතැනදි අපිට සිද්ධ වෙනවා ජනප්‍රියත්වය රඳා පවත්ගන්න විධිය, රසිකයන් එක්ක ගනුදෙනු කරන විධිය, කළමනාකරණය වගේම සංගීත කණ්ඩායම ඇතුළේ හැමෝම එක මතයකට අරගන්න විධිය ගැන අවධානය ලබා දෙන්න. ඒ ටික හරියට කරගන්න පුළුවන් නම් අපිට මේ තුළ ස්ථාවරත්වය ගොඩනඟා ගන්න පුළුවන්.
ඔබ කලාවට පිවිසෙන්නේ ළමා නළුවෙක් විධියට, සංගීතයට තිබෙන මේ ඇල්ම කොහෙන් ආපු එකක්ද?
ඇත්තටම මේක මගේ අම්මගෙයි, තාත්තගෙයි ආසාවක්. එයාලා හරි ආසයි මම සින්දු කියනවට. එයාලගේ ඒ ආසාව ඉෂ්ට කරන්න ගිහින් තමයි මම මේ ක්ෂේත්‍රයට නැඹුරු වෙන්නේ. පොඩි කාලේ ඉඳන්ම ඔය බෑන්ඩ් පිස්සුව මට තිබුණා. අට වසරේ වගේ කාලයේ ඉඳලම මම යාළුවොත් එක්ක බෑන්ඩ් එකක් හදාගත්තා. එහෙම අට වසරෙදී මාත් එක්ක බෑන්ඩ් එකේ හිටපු යාලුවෙක් තමයි මිස්ටර් ඩිමෙලෝ. ඔහු අද V8 සංගීත කණ්ඩායමේ කළමනාකරණ කටයුතු සිදු කරනවා. ඉතිං පොඩි කාලේ ඉඳන් තිබුණු ඒ උනන්දුව සංගීත පිස්සුව තමයි අද මාව මේ තැනට එනකම් අරගෙන ආවේ.
V8 හි ඔබේ සගයෝ පිරිසත් මතක් කරමු?
මුළින්ම මගේ බාප්පාගේ පුතා, මගේ සහෝදරයා අමෝද් මෙන්ඩිස්, අමෝද් මල්ලි තමයි මාත් එක්ක සංගීත කණ්ඩායමේ ප්‍රධාන ගායකයා විධියට කටයුතු කරන්නේ. රිදම් ගිටාර් වාදනයෙන් මිශේන් ක්ලිෆර්ඩ්, බේස් ගිටාර් වාදනයෙන් යෝශිත අබේසිංහ, කී බෝර්ඩ් වාදනයෙන් සුමේශ් වඩුගේ, ඩ්‍රම්ස් වාදයෙන් විනුක ගෝමස්, ලීඩ් ගිටාර් වාදනයෙන් චමිදු සිලක්ෂිත, පර්කෂන් වාදනයෙන් කෝසල ෆ්‍රැනෑන්ඩෝ, කළමනාකරු විධියට ඔනෙශ් ඩිමෙලෝ මේ පිරිසත් එක්ක තමයි V8 නිර්මාණය කළේ.
රොකී ටෙලි නාට්‍යයේ දෙවෙනිගේ චරිතය නිසා බැනුම් අහපු කාලේ ඉවරයි නේද?
ඔව් මුළින්ම නම් බැනුම් ඇහුවා. පස්සේ මමත් හොඳ ළමයෙක් වුණාට පස්සේ බැනුම් අහන එක නතර වුණා. ඒකත් එක්ක මට ප්‍රේක්ෂකයන්ගෙන් විශාල ආදරයක් ලැබුණා. රොකී කියන්නේ හරි ලස්සන කතාවක්. රංගන ශිල්පීන්ට තියෙනවානේ සමහර නාට්‍ය හරි ආසාවෙන් ගිහින් රඟපාන ඒවා, රොකී කියන්නේ එහෙම ආසාවෙන් ගිහින් රඟපාන එකක්. ඒ වගේ නාට්‍යයකට සම්බන්ධ වීමට ලැබීම හරිම සතුටක්.
පහුගිය කාලේ සචින් නැට්ටුවෙක් බවටත් පරිවර්තනය වුණා?
ඇත්තටම හොඳ ප්‍රතිචාර තියෙනවා. යන යන තැන්වලත් කට්ටිය ඇවිත් කතා කරනවා ඔයා හොඳට ඩාන්ස් කරනවා කියලා. දැන් දැන් මගේ දක්ෂතා එළියට දාන්න ගොඩක් අධ්‍යක්ෂවරුන්ගෙන් වගේම නාළිකාවන්ගෙනුත් සහාය ලැබෙනවා. ඒ වෙනුවෙන් මම මුළින්ම ඔවුන්ට ස්තූතිවන්ත වෙනවා. මෙගා ස්ටාර් ගැන කතා කළොත් මේ දවස්වල තුන්වන වටයට පුහුණුවීම් පැවැත්වෙනවා. ඇත්තටම මම නර්තනය ඉගෙනගත්ත, නර්තනයට දක්ෂ කෙනෙක් නෙවෙයි. නමුත් ඇඟේ රිදම් එක තියෙන නිසා වෙන්න ඇති මට නර්තනයේ යෙදෙන්න හැකියාව ලැබිලා තියනවා. මම මෙගා ස්ටාර් තෝරගන්න එකම හේතුව මට නර්තනය කියන විෂය ඉගෙන ගන්න අවශ්‍ය වීම.
නළුවෙක් ගායකයෙක් වගේම අද වෙද්දි නර්තන ශිල්පියකු වෙලා, කලාවට ආවේ නැත්තම් සචින් චතුරංග මොන වගේ කෙනෙක් වෙයිද?
එක්කෝ ගුරුවරයෙක් නැත්තම් පයිලට් කෙනෙක් වෙයි. ඒ දෙක තමයි මගේ ඔළුවේ තිබුණේ. කොහොම හරි අන්තිමට කැමතිම දේ තමයි කරන්න ලැබුණේ. රංගනය කියන්නේ මගේ පොඩි කාලේ ඉඳලම තිබුණු ආසාව. ඉතින් ඒ නිසා මැරෙනකම්ම රංගනයේ නියැළෙනවා.
මේ දවස්වල තරුණ කලාකරුවන්ගේ විනය ගැන බොහෝම විවේචන එල්ල වනවා, මේ ගැන ඔබේ අදහස?
ඇත්තම කතාව. අපි පබ්ලික් ෆිගර්ස්, ඒ කියන්නේ අපි අයිති පොදු ජනයාට. අපි ඔවුන්ව පිනවන්න සතුටු කරන්න ඉපදුණු පිරිසක්. එහෙම මනුස්සයෙක් ඉපදෙන්නේ සාමාන්‍යයෙන් ගෙවල් දාහකට එක්කෙනෙක් වගේ. ඉතිං ඒ ලැබිච්ච දේ අපි දැනගන්න ඕනෑ හරියට පාවිච්චි කරන්න. මම හිතන්නෙ ඒක වෙන්නේ කලාව කියන දේ උපතින්ම ලැබිලා ඒක හරියට පරිහරණය කරන්න බැරි වුණාම. නමුත් මට දැන් තේරෙනවා අපේ පරපුරේ දක්ෂ කලාකරුවන්, කලාකාරිනියන් විශාල පිරිසක් ඉන්නවා වගේම ඔවුන්ගේ බහුතරය තමන්ගේ ප්‍රතිරූපය හරියට පවත්වාගෙන යනවා.
ඔබ දැන් පෙම්වතෙක් බව ආරංචියි. විවාහය එහෙම ළඟදි සිද්ධ වෙනවද?
දැම්මම ඒ දේවල් කරන්න බලාපොරොත්තුවක් නැහැ. ඒකට තව ලොකු වෙලා ඉන්න ඕනෑ. විවාහයකට තාම පොඩි වැඩියි. ඊට කලින් ජීවිතයේ ගොඩක් දේවල් තියෙනවා සපුරා ගන්න. මොන ජීවිතයකට ගියත් ඊට පෙර මූල්‍යමය පැත්තෙන්, මානසික පැත්තෙන් ස්ථාවරත්වයක් හදාගෙන ඉන්න අවශ්‍යයි. ඊට පසුව තමයි ඒ කටයුතු සිදු කරන්නේ.
අවසන් වශයෙන් ඉදිරි වැඩ කටයුතුත් සිහිපත් කරමු?
මේ දවස්වල අලුතෙන් ලස්සන වැඩක් කරනවා. බුද්ධික සේමසිංහ මහත්මයාගේ අලුත් ටෙලි නාට්‍යයක්. ඒක හරි ලස්සන කතාවක්, එය ලංකාවේ ටෙලි නාට්‍ය ක්ෂේත්‍රයට ලස්සන වෙනසක් එකතු කරයි කියන බලාපොරොත්තුව තියෙනවා.
අක්ෂි මාපා වීරසිංහ
.png)