.jpg)
දිනුලි දම්සදී සිඟිත්තිය ගැන මේ දිනවල නම් නොදන්නා කෙනකු නැති තරම්. කා අතරත් ජනප්‍රිය “ලස්සන ලයිට් දමා බස් එක ආවා” ගීතය බාල, මහලු කොයි කවුරුත් ආශා කරන ගීතයක් බව නොරහසක්. දිනුලිගේ මිහිරි ස්වරයෙන් ගැයෙන ඒ ගීතය අසන්නට කොයි කවුරුත් දක්වන්නේ දැඩි කැමැත්තක්. ඉතින් මෙවර හදගැස්මට මේ සොඳුරු කතාබහ ඇයගෙන්.
මේ දිනවල දුව මොකද කරන්නේ?
මේ දවස්වල නම් ඉස්කෝලෙ නිවාසාන්තර ක්‍රීඩා උත්සවය නිසා ඒකෙ ෂෝ එකකට පුහුණුවීම් කරනවා. ඒ වගේම ගෙදර හැමෝමත් එක්ක සතුටෙන් ඉන්නවා. ඉස්කෝලෙ වැඩකටයුතු වගේම සංගීත වැඩකටයුතුත් සමබරව කරගෙන යනවා.
දිනුලිගේ අලුත්ම ගීතය රිලීස් කර දින 5ක් ඇතුළත මිලියන දෙකක ජනතාවක් නැරඹීම ගැන දැනෙන හැඟීම?
ඒ තරම් ප්‍රේක්ෂකයෝ ගොඩක් මගේ ගීතය නැරඹීම ගැන හරිම සතුටුයි. ඉතින් මගේ ගීතය අහපු, බලපු හැමෝටම මම ගොඩක් ස්තුති කරනවා. ඇත්තටම ඒ තරම් ප්‍රේක්ෂකයෝ ගොඩක් නැරඹීම ගැන මට ලොකු සතුටක් දැනෙනවා.
“ලස්සන ලයිට් දමා බස් එක ආවා” ගීතයට ලැබෙන ප්‍රතිචාර කොහොමද?
මේ ගීතය ගොඩක් ලස්සනයි කිව්වා. මගේ යහළුවෝ හැමෝම බැලුවා කිව්වා. ට්‍රිප් එකක් ගැන කියැවෙන අලුත් විධියේ ලස්සන ගීතයක් කියලා හැමෝටම මම ගැන ආඩම්බරයි කිව්වා. වෙනස් විධියේ වැඩක් කියලා බොහෝ දෙනකු කිව්වා. ඒ වගේම ප්‍රේක්ෂකයෝ ගොඩක් මට ආදරය කරන එක ගැන මට ගොඩක් සතුටුයි.
දුවගේ පෞද්ගලික විස්තර ටිකක් කියමුද?
මගේ පවුලේ මමයි අම්මයි, තාත්තයි, අක්කයි, නංගි තමයි ඉන්නේ. මම ඉගෙනුම ලබන්නේ ඇඹිලිපිටිය ජනාධිපති විද්‍යාලයේ 6 ශ්‍රේණියේ. දැන් මගේ වයස අවුරුදු එකොළහයි. ඉතින් මම පදිංචි වෙලා ඉන්නේ ඇඹිලිපිටියේ.
දුවට ලැබෙන රසික ආදරය ගැන මොකද හිතෙන්නේ?
මට ගොඩක් සතුටුයි සහ මට දැන් ගොඩක් අය ආදරය කරනවා. මාව පාරකදී දැක්කත් බොහෝදෙනකු ඇවිත් මට දැන් කතා කරනවා. ගොඩක් අය මමත් එක්ක ෆොටෝ ගන්නවා.
ඔබේ වැඩකටයුතුවලට පවුලෙන් ලැබෙන සහයෝගය කොහොමද?
මගේ පවුලෙන් මට ලොකු සහයෝගයක් ලැබෙනවා. මාව හැමදෙයකටම එක්කරගෙන යන්නේ මගේ අම්මයි, තාත්තයි. මගේ අම්මා මියුසික් ටීචර් කෙනෙක්. අම්මා තමයි මට ගීත පුරුදු කරන්නේ. ඒ වගේම මගේ අක්කයි, නංගියි දෙන්නත් මට ගොඩක් උදවු කරනවා. මගේ අම්මගෙයි තාත්තගෙයි උදවු නිසා තමයි මට මේ හැම දෙයක්ම හොඳින් කරගන්න පුළුවන් වුණේ.
මෑත කාලීනව වැඩිපුරම ජනප්‍රියත්වයට පත් වූ ළමා ගීතයේ දුවගේ ගීතය නේද?
ඉතින් ඒ ගැන නම් ලොකු සතුටක් තිබෙනවා. මගේ කටහඬින් මේ වගේ ලස්සන ගීතයක් ගායනා කරන්න ලැබීම ගැන හරිම සතුටුයි. ඒක වෙනස්ම ගීතයක් නේ.
මේ ගීතය නිර්මාණය වුණේ කොහොමද?
මුලින්ම මගේ තාත්තා තමයි ගීතයක් කරමු කියලා කීවේ. ඊට පස්සේ අපි ලසිත මාමාට කිව්වා ගීතයක් කරමු කියලා. ඉතින් දිල්ෂාන් අයියාගේ මෙලඩි එකට ලසිත මාමා ලස්සන වචන ටිකක් ලියල දුන්නා. ලස්සන ලයිට් දමා බස් එක ගීතයට ලස්සන වීඩියෝ එකක් හදල දුන්නේ චාරුක දුෂන්ත් මාමා. මට මේ වැඩකටයුතුවලට උදවු කරපු හැමෝටම ගොඩක් ස්තුති කරන්න ඕනෑ. අවසානයේදී ලස්සන ගීතයක් නිර්මාණය කරන්නට ඒ හැමෝගෙම උදවුවෙන් පුළුවන් වුණා.
දිනුලිට පාසලෙන් ලැබෙන සහයෝගය කොහොමද?
මගේ ඉස්කෝලේ හැමෝම මේ ගීතය බලලා ලස්සනයි කිවුවා. මට ගීතය ඉස්කෝලෙදි කියල පෙන්නන්න කියනවා. හැමෝටම හරිම සතුටුයි.
දිනුලි දෙරණ ලිට්ල් ස්ටාර් තරගාවලිය තුළ කොතරම් දුරක් පැමිණි තරගකාරියක්ද?
මම 2018 දෙරණ ලිට්ල් ස්ටාර් සීසන් 9 එකට සහභාගි වුණා. ඒ තරගාවලිය තුළ අට වැනි ස්ථානය දක්වා ඉදිරියට එන්න පුළුවන් වුණා. නැවතත් මම 2021දී ඒ තරගාවලියේ සීසන් 11 එකට සහභාගි වුණා. ඒ තරගාවලියේදී මම තුන්වැනි ස්ථානය ලබාගෙන ජයග්‍රහණය කළා.
දුවගේ අලුත් වැඩ කටයුතු ගැනත් මතක් කරමු?
දැනට තව අලුත් ගීතයක් කරන්න හිතලා නෑ. ඉතින් දිගටම මේ ෆීල්ඩ් එකේ ඉන්න බලාපොරොත්තු වෙනවා.
දිනුලිගේ අනාගත බලාපොරොත්තු ගැනත් කියමු?
මම හොඳට ඉගෙන ගන්න බලාපොරොත්තු වෙනවා. ඉදිරියට මගේ අධ්‍යාපන වැඩකටයුතු වගේම සංගීත වැඩකටයුතුත් සමබරව කරගෙන යන්න තමයි බලාපොරොත්තු වන්නේ.
රුවිනි අමරකෝන්
.png)