දිවිනහ ගත්ත නිළියක් නිසා රසිකයන්ට අන්තයටම එපා වුණු අනන්තයෙන් ආ තරු කුමරා

 

ලංකාවෙන් බිහිවෙන විවිධාකාර කුමාරවරු කොයි තරම් හිටියත් මීට දශකයකට විතර කලින් එක්තරා කුමාරයෙක්ට හැකි වෙනවා ලංකාවේ කුමාරවරු සියල්ලම අබිබවලා මෙරට තරුණියන්ගේ හදවත්වල තරු කුමරා වෙන්න. මේ කියන තරු කුමරා ලාංකික තරුණියන්ගේ විතරක් නෙවෙයි. ලොව පුරා වෙසෙන මිලියන ගණනක හදවත්වල ආදරණීය සුපිරි තාරකාව වෙන්නේ දකුණු කොරියානු විනෝදාස්වාද කර්මාන්තය ඇතුළේ වැඩිම මුදලක් අය කරන ධනවත්ම නළුවා බවටත් පත් වෙමින්.

මීට මාස දෙකකට කලින් මේ තරු කුමාරයා එහෙමත් නැත්තම් කිම් සූ-හ්යුන් ගැන මගෙන් කවුරු හරි ඇහුවා නම් මම කියන්නේ “සමහර මිනිස්සු ඉපදෙන්නෙම ආදරය සහ ගෞරවය ලබන්න විතරමයි, කිම් සෝ හ්යුන් කියන්නෙත් එහෙම ලැබීමක් තියෙන කෙනෙක්” කියන දේ. ඒත් අද වෙද්දී ඔහු ගැන මගේ පෞද්ගලික නිර්වචනය එතැනින් එහාට ගිහින් “ජීවිත කාලයක් පුරා උපයාගත්ත ආදරය, ගෞරවය නැති වෙන්න එක තත්පරයකුත් ඇති, ඒකට හොඳම උදාහරණය තමයි ඔහු” කියන තැනට ඇවිත්.

මේ සුපිරි තාරකාවගේ ඉරණම සම්පූර්ණයෙන්ම කණපිට හැරෙන්නේ එක්තරා ඛේදජනක මරණයකින්. ඒකත් හරියටම ඔහුගේ උපන් දිනය වුණු 2025 පෙබරවාරි 16 වැනිදා සිදුවුණු මරණයකින්. එදා කිම් සූ-හ්යුන් සමරන්නේ තමන්ගේ 37 වැනි උපන් දිනය. කොහොමහරි එදාම ඔහුගේ හිටපු පෙම්වතිය විධියට හැඳින්වෙන 24 හැවිරිදි කිම් සේ-රෝන්ගේ ප්‍රාණය නිරුද්ධ මළ සිරුර ඇගේ නිවෙසේ තිබියදී සොයා ගන්න හැකි වෙනවා. පශ්චාත් මරණ පරීක්ෂණවලින් ඇය සියදිවි නසා ගෙන ඇති බව හෙළි වීමත් සමඟ ඒ ඛේදජනක සිදුවීම සමාජ මාධ්‍ය හරහා සංසරණය වෙන්නේ දරුණු කුණාටුවක් වගේ. ළමා නිළියක් විධියට දකුණු කොරියානු විනෝදාස්වාද කර්මාන්තයට පිවිසුණු ඇය මෑත කාලයේදී කලාව ඇතුළේ කිසිම දෙයකට සම්බන්ධ වෙන්නේ නැහැ. ඒකට හේතුව ඇය අතින් සිදුවූ දරුණු රිය අනතුරක්. ඇගේ අතින් සිදුවූ මෙම රිය අනතුර නිසා ඇයට

ගිවිසුම් ගතව සිටි වැඩ සියල්ලම වගේ අහිමි වෙලා, අති විශාල වන්දියකුත් ගෙවලා, රසිකයන්ගේ ප්‍රතික්ෂේප කිරීම්වලට ලක්වෙලා වසර කිහිපයක්ම නිහඬව ඉන්න සිදු වෙනවා. ඔය අතරතුර තමයි ඇගේ මරණය වාර්තා වෙන්නේ. ඇගේ මරණය ඇගේ කලා දිවිය අහිමි වීම නිසා ඇති වුණු මානසික පීඩාවක් හේතුවෙන් සිදුවුණු එකක් කියලා මුලින්ම බොහෝ දෙනා සැක කළත් කතාව වෙනස්ම අතකට හැරෙන්න පටන් ගන්නේ Garosero Research Institute නම් යූටියුබ් නාළිකාවක් මඟින් කිම් සූ හ්යුන් හා සේ-රෝන් අතර 2015 සිට ආදර සම්බන්ධයක් පැවතුණු බව සඳහන් කිරීමත් සමඟ. ඔවුන් අතර 2015 වර්ෂයේදී සම්බන්ධතාවක් ඇති වූ බව සඳහන් කිරීමත් සමඟ ඒ වන විට සේ රොන් 15 හැවිරිදි දැරියක්ව සිටීම හේතුවෙන් මෙය බොහෝ දෙනාගේ දෝෂදර්ශනයට ලක් වන්නේ එතරම් ළාබාල දැරියක් සමඟ සම්බන්ධයක් ඇති කර ගැනීම දකුණු කොරියානු නීතිය යටතේ බරපතළ අපරාධයක් වන නිසා. මේ අවස්ථාවේදී කිම් සූ-හ්යුන්ගේ ඒජන්සිය වන Goldmedalist මෙම චෝදනා දැඩිව ප්‍රතික්ෂේප කළා.

ඒජන්සිය සඳහන් කළේ මොවුන් දෙදෙනා අතර 2019 ගිම්හානයේ සිට 2020 අවසානය දක්වා සම්බන්ධයක් පැවැතියත් ඒ වන විට සේ රොන් 19 හැවිරිදි වියේ පසු වුණා යනුවෙන්. එහිදී සූ හ්යුන්ගේ ඒජන්සිය “අපි බොරු ප්‍රචාරවලට එරෙහිව නීතිමය පියවර ගන්නවා,” කියලත් සඳහන් කර තිබුණා. මෙම සිදුවීමත් සමඟම 2024 මාර්තු මාසයේදි සේ-රෝන් තමන්ගේ Instagram ගිණුමේ පළ කළ ඡායාරූපයක් යොදා ගනිමින් සමාජ මාධ්‍ය තුළ සූ හ්යුන්ට එරෙහිව විශාල වශයෙන් චෝදනා එල්ල වෙමින් තිබුණා. ඒ අවස්ථාවේදී ඔහුගේ ඒජන්සිය ඒ ඡායාරූපය 2019 ජුනි මාසයේ විලාසිතා රූගත කිරීමක් අතරතුර ගත් එකක් බවට ප්‍රකාශයක් නිකුත් කළත් එය සූ හ්යුන්ට එරෙහිව ගොඩ නැඟෙමින් තිබුණු රැල්ල වෙනස් කිරීමට තරම් ප්‍රමාණවත් වුණේ නැහැ. ඔය අතරතුර තමයි සේ රොන්ගේ නැන්දා කෙනෙක් සූ හ්යුන් අනිවාර්ය හමුදා සේවයේ

යෙදී සිටියදී සේ රොන්ට එවපු ලිපියක් ප්‍රසිද්ධ කළේ. මේ කාරණයත් එක්ක ඇය සඳහන් කළා රිය අනතුර හේතුවෙන් ඇයට ගෙවන්නට සිදුවූ වන්දිය සඳහා සූ හ්යුන් ඇයට මුදලින් උපකාර කළත්, මෑතකදී ඔහුගේ සමාගම ඒ මුදල් නැවත ලබා දෙන ලෙස ඇයට දැනුම් දුන්නා කියලා. මේ කාරණාවත් සමඟ කලා ක්ෂේත්‍රයට නැවත පැමිණෙන්න සිහින දකිමින් සිටි ඇය ඒ මුදල ඔහුට නැවත ගෙවීමට කාලය ඉල්ලා ගන්න ඔහුව සම්බන්ධ කරගන්න උත්සාහ ගත්තත් ඇයට ඔහුව සම්බන්ධ කරගන්න නොහැකි වුණා කියලා තමයි ඇගේ නැන්දා සඳහන් කරන්නේ. ඔවුන් එතැනදී ඔවුන්ගේ ප්‍රකාශවල නිවැරැදි භාවය ඔප්පු කරන්න ඇති තරම් සාක්ෂි තියෙනවා කියලත් සඳහන් කරනවා.

කොහොමහරි මේ සිදුවීමට ප්‍රතිචාර දක්වමින් කිම් සූ හ්යුන්ගේ ඒජන්සිය මාර්තු 20 වැනිදා සේ-රෝන්ගේ පවුලට සහ Garosero Researchහි ක්‍රියාකරුවන්ට එරෙහිව අපරාධමය නඩුවක් ගොනු කරනවා. ඔවුන්ගේ චෝදනාව වන්නේ සූ-හ්යුන්ගේ අර්ධ නිරුවත් ඡායාරූපයක් අනවසරයෙන් ප්‍රකාශයට පත් කිරීම “මෙය ලිංගික හිංසනයක්. අපි මේකට ඉඩ තියන්නේ නැහැ,” එහෙමයි ඔහුගේ ඒජන්සිය නියෝජනය කරන නීතිඥයා මාධ්‍යයට අදහස් දක්වලා තිබුණේ. කොහොම වුණත් මේ සිදුවීමත් සමඟම සූ හ්යුන්ට උදා වෙන්නේ ඉතාම නරක කාලයක්. කොරියානු රසිකයන් ඔහුව මුළුමුනින්ම වගේ ප්‍රතික්ෂේප කරනවා. ඔහුගේ රූප ඇතුළත් වෙළෙඳ දැන්වීම් පවා විකාශනය අත්හිටුවනවා.

පාරවල්වල, විවිධාකාර වෙළෙඳසල්වල තිබෙන ඔහුගේ රුව රැගත් සියලුම ප්‍රචාරණ දැන්වීම් ඉවත් කෙරෙනවා. ඒ විතරක් නෙවෙයි Prada, Dinto, සහ Jo Malone වැනි ලෝක ප්‍රකට වෙළෙඳ නාම 12ක් පමණ ඔහු සමඟ තිබූ ගිවිසුම් වහාම අවසන් කරන්නට කටයුතු කරනවා. අප්‍රේල් මාසයේ නිකුත් කරන්නට සැලසුම් කරලා තිබුණු Disney+හි “Knock Off” කතා මාලාව නිකුත් කරන දිනය, දින නියමයක් නැතුව කල් යනවා. ඒ වගේම G-Dragon සමඟ සැලසුම් කරලා තිබුණු “Good Day” වැඩසටහන් කල් යනවා. කොහොම වුණත් ගෙවුණු මාර්තු 14 වැනිදා සූ හ්යුන්ගේ ඒජන්සිය මේ සිදුවීම් සමඟ ඔහු දරුණු මානසික ආතතියකින් පසුවන බව දක්වලා “ඔහුව ආරක්ෂා කර ගත යුතු බව” සඳහන් කරලා තියෙනවා. වාර්තා වෙන විධියට සූ හ්යුන් මේ වෙද්දී තමන්ගේ ගෙදරට වෙලා පවුලේ අයත් එක්ක කාලය ගත කරනවා.

ඒ වගේම ඔහුගේ පවුලේ අය ඔහුව හැකි තරම් මාධ්‍යවල වාර්තා වෙන දේවල්වලින් ඈත් කරලා තියන්න උත්සාහ ගන්න බව සඳහන් වනවා. මේ වෙද්දී මේ කතා සියල්ලටම පස්සේ තවත් අලුත් කතාවක් මතු වෙලා තියෙනවා. ඒ සේ රොන් මිය යන්න පෙර විවාහ වෙලා සිටි බවට හා ඇය ගෘහස්ථ හිංසනයට ලක් වී ඇති බවට පැතිරෙන කතාව. මේ කතාව ස්ථිර කරන්නේ ඇගේ මිතුරියක්. කොහොම වුණත් මේ කාරණයට එරෙහි වෙමින් සේ රොන් ගේ ඥාතීන් මේ බව ප්‍රකාශ කළ පිරිසට එරෙහිව නීතිමය ක්‍රියාමාර්ග ගන්න සූදානම් වනවා වගේම මේ ගෘහස්ථ හිංසන කතාව එළියට ඒමත් එක්කම යූ හ්යුන්ගේ ඒජන්සිය සේ-රෝන්ගේ පවුලට එරෙහිව අපහාස නඩුවක් ගොනු කිරීමට සූදානම් වෙමින් ඉන්නවා. කොරියානු විනෝදාස්වාද කර්මාන්තය මොන තරම් සුන්දර නිෂ්පාදන බිහි කරත්, එහි අභ්‍යන්තරය අපිට පෙනෙන තරම් සුන්දර නැහැ. කොරියානු රසිකයන්

පවා කලාකරුවන්ගේ පෞද්ගලික ජීවිතය පිළිබඳව ඕනෑවට වඩා සංවේදියි. මෙය ඇත්තට අතිශය විස සහිත ලක්ෂණයක්. කොරියානු රසිකයන්ගේ පීඩනය නිසා තමන්ගේ ජීවිතය අහිමි කරගත්ත කලාකරුවන් ගණන අති විශාලයි. මිනිසුන් අතින් සිදුවන’ මනුෂ්‍ය වැරැදි”වලට හෝ සමාවක් දෙන්නට කොරියානු රසිකයන් සූදානම් නැහැ. සේ රොන්ගේ මරණය කියන්නෙත් ඒ විස සහිත කොරියානු රසිකත්වයේ තවත් එක් අතුරුඵලයක්. අද ඇයට පක්ෂව කතා කරන පිරිසම තමයි එදා ඇය අතින් අනතුරක් සිදු වුණු වෙලාවේ ඇය මුළුමුනින්ම සැඟවී යන තුරු පහර එල්ල කළේ. කොහොම වුණත් මේ වෙද්දී මේ කතාවේ ඇත්ත හරියටම දන්න දෙන්නාගෙන් එක් පාර්ශ්වයක් ජීවතුන් අතර නැහැ. ඒ නිසා අවම වශයෙන් කොරියානු රසිකයන් දැන්වත් කලාව හා කලාකරුවන්ගේ පෞද්ගලික ජීවිතය කියන්නේ දෙකක් කියන එක අවබෝධ කර ගත යුතුයි. නැත්තම් සූ හ්යුන්ට සේ රොන්ගේ ඉරණම හෝ මීට කාලයකට පෙර ජීහු අයියා නමින් මෙරට තුළ අතිශය ජනප්‍රියත්වයට පත්වූ කිම් හ්යුන් ජූන්ට හිමිවූ ඉරණම අත්වීමට වැඩි කාලයක් නැහැ.