අද වෙද්දී සංගීත ලොවේ අතිශය කාර්යබහුල චරිත දෙකක් බවට පත් වී තිබෙන්නේ සනුක වික්‍රමසිංහ සහ වින්ඩි ගුණතිලක . ඒ ඔවුන්ගේ අලුත්ම ගීතය වන “අයියෝ සාමි“ එක්ක. මේ වෙද්දී ලංකාවෙන් එපිට ලෝකය පුරාත් ඔවුන්ගේ ගීතය අතිශය ජනප්‍රියයි. මෙහි විශේෂත්වය තමයි මේ ගීතය වින්ඩි ගායනා කරන්නේ ද්‍රවිඩ භාෂාවෙන්. මෙහි පද නිර්මාණය කරලා තියෙන්නේ පොතුවිල් අස්මින් විසින්. නව ආරයේ සංගීත රටාවකින් සංගීතවත් වූ මෙම ගීතය දමිළ බසින් ලියැවුණත් මේ වෙද්දී එය ජාති ආගම් වයස් භේදයකින් තොරව රසිකයන් අතරට ගොස් තිබෙනවා. එමෙන්ම මේ වෙද්දී සියලු ගීත සහ වීඩියෝ අබිබවා ඉදිරියට යමින් “අයියෝ සාමි” යූ-ටියුබ් ට්‍රෙන්ඩින් ලිස්ට් එකේ අංක එකට එන්නත් සමත් ව තිබෙනවා. ඒ නිසාම සනුක සහ වින්ඩි අතිශය කාර්යබහුලයි. නමුත් බොහොම කාර්යබහුල මොහොතක වුණත් සනුකව කෙටි කතාබහකට සම්බන්ධ කර ගන්න අපිට පුළුවන් වුණා.
සනුක මොකද වෙන්නේ
කියන්න දෙයක් නැහැ මේ ටිකේ නම් අයියෝ සාමි වෙලා තියෙන්නේ.
අයියෝ සාමි මේ වෙද්දි ලෝකය පුරා පැතිරෙනවා, කොහොමද ඒ ගැන දැනෙන්නේ
ඇත්තටම හිතුවේවත් නැති දෙයක්, හිතුවෙම නැති විදියට ලංකාවේ විතරක් නෙවෙයි ලෝකේ වටේ ඉන්න මිනිසුන් සින්දුව වැලඳගෙන තියෙනවා. මේක මටත් වින්ඩිටත් අලුත් අත්දැකීමක්. ලෝකේ වටෙන්ම ප්‍රතිචාර ලැබෙනවා. ඒ ගැන හරිම සතුටුයි. අපි දැක්කා ඩුබායි හි යූ- ටියුබ් ට්‍රෙන්ඩ්ඩින් ලිස්ට් එකේ නම්බර් 6 වෙලා තියෙනවා. ඊට පස්සේ කටාර් වල යූ- ටියුබ් ට්‍රෙන්ඩ්ඩින් ලිස්ට් එකේ නම්බර් 10. කුවේට් වල යූ- ටියුබ් ට්‍රෙන්ඩ්ඩින් ලිස්ට් එකේ නම්බර් 27. ලංකාවේ යූ- ටියුබ් ට්‍රෙන්ඩ්ඩින් ලිස්ට් එකේ සති හතරක් තිස්සේ තාම අංක 1 තියෙනවා. මම දන්නා තරමින් මම හිතන්නේ නැහැ ලංකාවේ සින්දුවක් මේ විදියට රටවල් හතරක යූ- ටියුබ් ට්‍රෙන්ඩ්ඩින් ලිස්ට්වලට ඇවිත් තියෙනවා කියලා. ඒ ගැන ඇත්තටම තියෙන්නේ නිහතමානී සතුටක්.
මෙහි සිංහල සිංදුවක් තියෙනවා කිව්වා නේ, ඒක කවදද අහන්න ලැබෙන්නේ
මුලින්ම අපි හැදුවේ සිංහල සින්දුව. නමුත් මට අදහසක් ආවා මේ මෙලඩි එකට වෙන භාෂාවකින් වචන ආවොත් සෙට් වෙනවා කියලා. ඊට පස්සේ තමයි අපි මේ ටැමිල් එක කළේ. අනිවාර්යෙන්ම රසිකයන්ට මෙහි සිංහල සිංදුවත් අහන්න ලැබෙනවා.
වින්ඩි කියන්නෙ සිංදු කියන්න කම්මැලි කෙනෙක් කියලයි එයා කියන්නේ , හැබැයි වින්ඩිට තියෙන්නේ වෙනස්ම හඬක්...මොනවගේ නිර්මාණ ද ඉදිරියට කරන්න ඉන්නෙ?
වින්ඩි සින්දු කියන්න කම්මැළිකමට වඩා එයා ලැජ්ජාශීලී කෙනෙක්. නමුත් එයා නිර්මාණයක් කරන්න ගත්තට පස්සේ එයා ඒක උපරිමයෙන්ම කරන කෙනෙක්. වින්ඩිට තියෙන්නේ වෙනස්ම හඬක්. මේ කාලේ වින්ඩිගේ නිර්මාණ කිහිපයක් හදමින් ඉන්නේ. සමහරවිට වින්ඩිගේ ගීත ඇල්බම් එකක් එන්නත් පුළුවන්. ඒ ගැන අපි ඉදිරියේදී හරියටම කියන්නම්.
සනුක කියන්නෙ ගායකයෙක් විතරක් නෙවෙයි, සංගීතයෙන් පදරචනයට පවා දක්ෂ කෙනෙක්, ඔබේ නිර්මාණවලට අලුතින් එකතු වෙන්නෙ මොනවාද?
මගේ අලුත් නිර්මාණත් සෑහෙන්න ප්‍රමාණයක් එන්න තියෙනවා දැන්. පද රචනය විදියට මම අන්තිමට කළේ අයියෝ සාමි එකේ සිංහල සින්දුව. තව මම සින්දු කිහිපයක් ලියලා තියෙනවා. නදිමාල් ගයන ‘මායම් කලාවේ‘, කෞෂාන් විජේසූරියගේ ‘සොයන්නේ අපේ ආදරේ‘ ඒ එක්කම අමල් පෙරේරා ගයන ‘දැකුම්කළු සෙවණැල්ලේ‘ වගේ ගීත කිහිපයක් මම කරලා තියෙනවා. තව මගේ පද රචනා කිහිපයක් එන්නත් තියෙනවා.
රූ සද රෑ ප්‍රසංගයටත් සුදානම් ද?
දෙසැම්බර් 30 නෙළුම් පොකුණ එළිමහන් පරිශ්‍රයේ ‘රූ සද රෑ‘ ප්‍රසංගය තියෙන්නේ. මේක අලුත්ම අත්දැකීමක් වේවි අපේ රසික රසිකාවියන්ට. විශේෂයෙන්ම රූකාන්ත ගුණතිලක - චන්ද්‍රලේඛා පෙරේරා කියන දෙපළගේ පවුලේ ප්‍රසංගය මේක. ඉතින් ඒ අයට ආදරේ කරන අයට නැවුම් අත්දැකීමක් වේවි. ඒ ප්‍රසංගයේ මමත් ඉන්නවා. මම හරිම ආසාවෙන් ඉන්නේ ‘රූ සද රෑ‘ ප්‍රසංගයේ ගීත ගායනා කරන්න.
ප්‍රේක්ෂකයන්ට රසිකත්වයට සනුකට කියන්න තියෙන්නේ මොකක් ද?
මාත් එක්ක මෙච්චර කල් හිටිය වගේ දිගටම ඉන්න කියන එක තමයි ආදරෙන් කියන්න තියෙන්නේ. මගේ අලුත්ම සින්දු ඉදිරියේදී අහන්න පුළුවන්. මේ අවුරුද්ද ඉවර වෙන්න කලින් අලුත් එක සින්දුවක් හරි දෙන්න තමයි බලාපොරොත්තුව.
.jpg)
.jpg)
.jpg)