ඔහු උගත්, බුද්ධිමත් තරුණයෙක්, ඒ වගේම කඩවසම්, වෘත්තියෙන් ඉංජිනේරුවරයෙක්. ඒ වගේම ඔහු ගුරුවරයෙක්. සුවහසක් ප්‍රේක්ෂක හදවත් දිනූ රංගන ශිල්පියෙක්. දෙවනි ඉනිම ටෙලි නාට්‍යයේ රදීෂ්ගේ චරිතය තුළින් ඔබ හමුවන ඔහු ඉෂාර මධුෂාන්.
ඉංජිනේරුවරයෙක් වගේම ගුරුවරයෙක්. රංගන ශිල්පියෙක් විදියට කලා ක්ෂේත්‍රයට සම්බන්ධ වෙන්නේ කොහොම ද?
“මං පේරාදෙණිය විශ්වවිද්‍යාලයෙන් උසස් අධ්‍යාපනය නිම කළේ ඉංජිනේරුවරයෙක් විදියට. විශ්වවිද්‍යාලයේ ඉන්න අවදියේම තමයි මම සාමාන්‍ය පෙළ ළමයින්ට ගණිතය විෂය උගන්නන්න පටන් ගත්තේ. ඒ පටන් ගැන්ම දිගටම කරගෙන ආවා. කාලයක් මම ඩයලොග් ආයතනයේ ඇක්සස් නෙට්වර්ක් ඉංජිනේරුවරයෙක් විදියටත් වැඩ කළා. නමුත් මම දැන් රංගන ශිල්පියෙක් විදියට ප්‍රේක්ෂක ආදරය විඳිමින් ඉන්නෙ. ඒ වගේම ගුරුවරයෙක් විදියටත් සේවයක් කරනවා.
මම රංගනයට පිවිසෙන්නේ අහම්බෙන් වගෙයි. දෙරණ උප සභාපති ලක්සිරි වික්‍රමගේ මහතාගෙන් ලැබුණ ආරාධනයෙන් තමයි මං දෙවෙනි ඉනිම ටෙලි නාට්‍ය සඳහා සම්බන්ධ වෙන්නේ. ඊට කලින් වෙනත් නාලිකා දෙකක අවුරුදු කුමාරයා විදියට තේරිලා තියෙනවා. ඒත් මුලින්ම මං රංගන ශිල්පියෙක් විදියට දායක වෙන්නේ දෙවෙනි ඉනිම ටෙලි නාට්‍යයට. රදීෂ් කියන චරිතය නිසා ලංකාව පුරාම මිනිස්සු දැන් මාව අඳුනනවා. ඒක හොඳ අත්දැකීමක්. හොඳ ප්‍රතිචාර ලැබෙනවා. ගුරුවරයා කියන භූමිකාවටත් ඒක ආභරණයක් වුණා. රංගන ශිල්පියා නිසා ගුරුවරයා වඩාත් ඉස්මතු වුණා කිව්වොත් නිවැරැදියි. ඉෂාර මධුෂාන් කියන ගුරුවරයා බොහෝ දෙනෙක් හඳුනගන්නේ රංගන ශිල්පියා නිසා. දෙවෙනි ඉනිම දිගු නාට්‍යයක් නිසා මගේ පළමු නිර්මාණයෙන්ම දිගු කාලයක් ප්‍රේක්ෂකයා සමඟ රැඳෙන්න පුළුවන් වුණා. ඒ නිසාම ඔවුන්ගේ මතකයේ රැඳෙන්න මට හැකියාවක් ලැබුණා. දැන් එය අවසානය කරා ළඟා වෙමින් තියෙන්නේ. ඇත්තටම රංගන ශිල්පියෙක් වීම මගේ ජීවිතේට ලොකු වාසනාවක්. තවත් අලුත් නාට්‍යයකට ආරාධනා ලැබුණා. ඉක්මනින්ම ඒකෙ වැඩකටයුතු ආරම්භ වේවි.
ඉංජිනේරුවරයෙක් වෙන එක ලේසි දෙයක් නෙවෙයි. ඔබ ලබාගත් ඒ දැනුමෙන් දැන් ප්‍රයෝජනයක් ගන්නෙ නැද්ද?
ඕනම කෙනෙක් ඉගෙන ගත්ත දෙයක් කවදාවත් අපතේ යන්නෙ නෑ. මං ඉංජිනේරුවරයෙක් විදියට ලබා ගත් දැනුම හැමදාම මට ඕන වෙනවා. මං පන්ති පවත්වන්නේ මාර්ගගත ක්‍රමයට. ඒකත් සාමාන්‍ය තත්ත්වයෙන් නෙවෙයි. හොඳ ස්ටුඩියෝ එකක ඉහළම තාක්ෂණික ක්‍රම යොදාගෙන. මේ වෙද්දි හොඳ ප්‍රතිඵල ලැබිල තියෙනවා. උසස් පෙළ භෞතික විද්‍යා විෂය සඳහාත් පන්ති ඉක්මනින්ම පටන් ගන්න බලාපොරොත්තුවක් තියෙනවා. ඒ වගේම මං ව්‍යාපාර ක්ෂේත්‍රයටත් අත ගහලයි තියෙන්නේ. කාර් සේල් එකක් පටන් ගත්තා. ඉංජිනේරුවරයෙක් විදියට වෘත්තිය නොකළත් මගේ ඒ දැනුම මගේ අනෙක් කටයුතුවලට අත්වැලක් වුණා. කවදාවත් ඒ දැනුම අපතේ යන්නෙ නෑ.
ඔබ වඩාත්ම ප්‍රතිචාර ලබන්නේ ගුරුවරයා විදියට ද රංගන ශිල්පියා විදියට ද?
මං ගුරුවරයෙක් වුණේ විශ්වවිද්‍යාලයේ ඉන්න කාලෙමයි. උසස් අධ්‍යාපනය නිම වුණාට පස්සේ ගුරුවරයා කියන භූමිකාව වෘත්තියක් විදියට කරගෙන ආවා. නමුත් ඉෂාර මධුෂාන් කියන ගුරුවරයා බොහෝ පිරිසක් අඳුනගත්තේ රංගන ශිල්පියා නිසා. රංගනයට උගත්කමත් එකතු වුණහම ඒකට ලොකු වටිනාකමක් ලැබෙනවා. ඒ නිසා මං හිතන්නේ ඉංජිනේරුවරයා හා ගුරුවරයා නිසා රංගන ශිල්පියාට ක්‍රෙඩිට් එකක් ලැබෙනවා වගේම රංගන ශිල්පියා නිසා ගුරුවරයාටත් ලොකු ප්‍රසිද්ධියක් ලැබුණා.
යොවුන් වියේ සුන්දර ආදරය ගැනත් අත්දැකීමක් ඇති.
ආදරය කියන්නේ හරිම සුන්දර හැඟීමක්. ඒත් මගේ කාර්යබහුලත්වය නිසා ඒ හැඟීමට තාමත් මගේ හිතේ ඉඩක් දෙන්න බැරි වුණා. ඇත්තම කියනව නම් මං තාමත් ආදරවන්තයෙක් නොවෙයි.
.jpg)
.jpg)
.jpg)