.jpg)
පසුගිය දවස්වල අපට ඇයව මුණගැසුණේ ‘අමුතු දොස්තර’ හි නර්ස් නෝනා ලෙසිනි. මේ දවස්වල රිදීතිරයෙන් දකින්න ලැබෙනවා. ඒ හැමෝම වගේ කතාබහ වෙන ඉලංගෝ රාම් අධ්‍යක්‍ෂණය කළ නෙළුම් කුලුන සිනමා නිර්මාණයෙන්. නමින් ආලෝකා ගයාත්‍රි වූ ඇයට මෙවර මීවිතෙන් ඉඩක් වෙන් කරන්න හිතුවා.
ආලෝකා නෙළුම් කුලුනට ලැබෙන්නේ මොන වගේ ප්‍රතිචාරද?
ප්‍රතිචාර නම් ගොඩක් හොඳයි. සිනමා නිර්මාණයකට ඒ වගේ ප්‍රතිචාර ලැබෙන එක ගැන හරිම සතුටුයි. ගොඩක් අය චිත්‍රපටය නරඹලා තිබුණා. ඒ වගේ නිර්මාණයකට සම්බන්ධ වෙන්න ලැබීම ගැනත් සතුටු වෙනවා.
මළගෙයක් සිනමාව ඇතුළේ මාර වැඩක් නේද කළේ?
ඔව් ඔව් කලා නිර්මාණයක් කියන්නේ කොහොමත් අපූර්වත්වයෙන් යුතු දෙයක්නේ. අපූර්වත්වයෙන් යුතු දෙයක් කැටිකරගෙන තමයි නෙළුම් කුලුන චිත්‍රපටය නිර්මාණය වෙලා තියෙන්නේ. ඒක මළගෙදරක් වුණ එක ගොඩක් විශේෂයි.
සාමාන්‍ය විදිහට ජීවත් වෙන්න කැමැතියි - ආලෝකා ගයාත්‍රි
මේක ඔබේ පළමු සිනමා නිර්මාණය ද?
නැහැ නැහැ. මම මීට කලින් ජගත් මනුවර්ණගේ රහස් කියන කඳු, ප්‍රසන්න විතානගේ ගේ ගාඩි යන චිත්‍රපටවලට සම්බන්ධ වෙලා තියෙනවා. ඊට පසුව තමයි ඉලංගෝ රාම්ගේ නෙළුම් කුලුන චිත්‍රපටයට සම්බන්ධ වුණේ.
මේ ප්ලොට් එක හින්දා මිනිස්සු මොන වගේ ප්‍රතිචාර දක්වයි කියල හිතට බයක් දැනුණ ද?
ඇත්තටම එහෙම බයක් දැනුණ කියල කියන්න බැහැ. ඒ ප්ලොට් එකට වගේම තිරපිටපතට මම ඇතුළු අපේ කණ්ඩායමම හරි ආස වුණා, මොකද අලුත් කතා තේමාවක අලුත් ශානරයක වැඩක් කරන්න අපිට ලොකු වුවමනාවක් තිබුණා.
මළගෙදර ෂූටින් අත්දැකීම් හරි සුන්දර ඇති නේද?
චිත්‍රපටය පුරාවටම තියෙන මතකයන් හරි සුන්දරයි. විශේෂයෙන්ම කියන්න ඕනෑ මේ චිත්‍රපටය රූගත කිරීම් සිදු කළේ අරගලය සිදුවුණ කාලයේ. අපි හැමෝටම මතක කාලයක්. ඒ කාලේ මේ චිත්‍රපටය කරන්න මූලික වුණ එකම, හරි වටිනා දෙයක්.
මේ දවස්වල මොනවද කරන්නේ?
මේ දවස්වල මම අලුත්ම චිත්‍රපටයකට සම්බන්ධ වෙලා ඉන්නවා. එහි රූගත කිරීම් තමයි දැන් සිදු කරමින් තියෙන්නේ.
පසුගිය දවස්වල අමුතු දොස්තරගේ නර්ස් නෝනා හරි ජනප්‍රිය වුණා නේද?
ඔව්. ඒකත් අමුතු කතාවක්. කෝරළගේ සමන්ගේ ප්‍රථම අධ්‍යක්‍ෂණය. සුසිත් විජයමුණිගේ තිරපිටපත. එවැනි විවිධ නිර්මාණ කරන එක හොඳයි. ඒ වගේ චරිතවලට පණපොවන්න ලැබෙන එකත් මගේ රංගන ජීවිතයට හොඳ අත්දැකීමක්.
ආලෝකා අතට ලැබෙන පිටපත් ගැන මොකද හිතෙන්නේ?
ඇත්තටම මට විවිධ චරිත හම්බවෙලා තියෙනවා. විවිධ තිරපිටපත් රචකයන්ගේ වෙනස් වූ කතා තේමාවන්වලට පණපොවන්න දායක වෙන්න මට අවස්ථාව ලැබිලා තියෙනවා. ලංකාවෙ අලුත් නිර්මාණ බිහිවීම ගැන සතුටුයි.
වේදිකාවේ වැඩකටයුතු එහෙම කොහොමද?
මම මේ දවස්වල සෝමලතා සුබසිංහ මහත්මියගේ ‘විකෘති’ නාට්‍යයට පමණයි සම්බන්ධ වෙලා ඉන්නේ.
වර්තමානයේ වේදිකාවේ ලොකු පිබිදීමක් තිබෙනවා කියලා හිතනවා ද?
ඔව් එහෙම වෙන එක හොඳයි. වේදිකාව, සිනමාව, ටෙලි නාට්‍ය කියන මේ ක්‍ෂේත්‍රයන් සියල්ලම ප්‍රේක්‍ෂකයන්ගේ අවධානයට ලක්විය යුතුයි. මොකද අපි ප්‍රේක්‍ෂකයන් වෙනුවෙන්නේ නිර්මාණ බිහි කරන්නේ.
ආලෝකා ගයාත්‍රි කියන්නේ ඇත්තටම කවුද?
ඇත්තටම මම සාමාන්‍ය මනුස්සයෙක්. මම කැමැති සාමාන්‍ය විදිහට ජීවත්වෙලා ඉන්න.
රඟපෑම පුංචි කාලෙ දැකපු හීනයක් ද?
නැහැ පුංචි කාලෙ මගේ හිතේ එහෙම කිසිම අදහසක් තිබුණේ නැහැ. අපි අපේ ජීවිතවල විවිධ අවධි පහු කරනවානේ. එතකොට නැවතුණ එක සන්ධිස්ථානයක් තමයි කලාවට සම්බන්ධ වීම.
මේ වෙනකොට ඔබේ වෘත්තිය?
දැනට මම වෘත්තිය වශයෙන් නියැළෙන්නේ කලාවේ තමයි.
ඔබට ලැබෙන වටිනාකම ගැන මොකද හිතෙන්නේ?
වටිනාකම සම්බන්ධයෙන් හරි සතුටුයි. අපි ප්‍රේක්‍ෂකයා වෙනුවන් නිර්මාණ කරනවා, ඔවුන් ඒ වෙනුවෙන් ඉහළ ප්‍රතිචාර දක්වනවා. මට ලැබෙන වටිනාකම වගේම ඒක බලාපානවානේ අපේ ක්‍ෂේත්‍රයටත්. හොඳ නිර්මාණ කරල ප්‍රේක්‍ෂකයන් අතරට ගියොත්, ඒ හොඳ ලැබෙන්නේ මට විතරක් නෙමෙයි, මුළු ක්‍ෂේත්‍රයටමයි.
නිර්මාණ තෝරා බේරා ගැනීමක් සිදු කරනවා ද?
මට මෙතෙක් කල් හම්බවෙලා තියෙන්නේ ඉවත දමන්න බැරි තිරපිටපත් පමණයි. ඒවාට මම ඉතිං සතුටින් දායක වෙලා තියෙනවා.
රඟපෑම තෝරා ගත්තේ නැතිනම් මේ වෙනකොට මොනවා කරාවි ද?
දන්නෙ නැහැ මොනවා වෙයි ද කියලා. සමහර විට මම ගුරු වෘත්තිය තෝරා ගන්නත් ඉඩ තිබුණා. ඒ නැත්නම් ගෘහණියක් වෙන්නත් ඉඩකඩ තිබුණා. දන්නේ නැහැ මම මොනවා කරාවි ද කියලා. මටත් හිතාගන්න බැහැ.
පදිංචිය පවුලේ විස්තර එහෙම?
මම දැනට බත්තරමුල්ලෙ තමයි පදිංචි වෙලා ඉන්නේ. මට සහෝදරියන් දෙදෙනෙක් තමයි ඉන්නේ. ඔවුන් විවාහකයි. ඔවුන් තමයි මගේ පවුල
රංගන ක්‍ෂේත්‍රය දකින්නේ මොන විදිහට ද?
මේ ක්‍ෂේත්‍රය හැම වෙලාවෙම අලුත් වෙන ක්‍ෂේත්‍රයක්. ඒක කලා ක්‍ෂේත්‍රයේ තිබෙන හොඳ ලක්‍ෂණයක්. කලා ක්‍ෂේත්‍රය නිතර නිතර අලුත් වෙන්න ඕනෑ. එතකොටනේ අලුත් නිර්මාණ බිහි වෙන්නේ. එතකොට තමයි ප්‍රේක්‍ෂකයොත් අලුත් වෙන්නේ. ඒ වෙනස් වෙන ස්වභාවයට මම කැමැතියි.
කොහොමද ටෙලි නාට්‍ය රංගන වැඩකටයුතු?
ටෙලි නාට්‍යවල නම් තවම අලුත් වැඩකට සම්බන්ධ වෙලා නැහැ.
තව චිත්‍රපට කීයක් තිරගත වෙන්න තියෙනවාද?
තව චිත්‍රපට දෙකක් තිරගත වෙන්න තියෙනවා. එකක් තිසර ඉඹුලානගේ මෝඩ තරිඳු. අනෙක් එක අනුර සිල්වාගේ නිර්මාණයක්.
දිනේෂ් විතාන
.png)