.jpg)
ඔහු ලාංකේය ටෙලිනාට්‍ය කලාව තුළ තම නාමය ඉහළින්ම තැබූ කලාකරුවෙක්. ඉන්දීය ටෙලිනාට්‍ය රැල්ල ඔස්සේ විශාල ගැටලු රැසකට මුහුණ දුන් ටෙලිනාට්‍ය කලාව තුළ ලාංකේය ටෙලිනාට්‍ය කලාවක් නිර්මාණය කිරීමට ඔහු බොහෝ ලෙස කැපවුණු අධ්‍යක්ෂවරයෙක්. පසුගියදා මායාවී ටෙලිනාට්‍ය සම්බන්ධයෙන් ඇති වුණු ගැටලුවක් නිසා කලා ලෝකය තුළ විශාල කතාබහක් ඇති වුණා. මේ පිළිබඳ කතාබහ කිරීමට එක් වන්නේ ප්‍රවීණ අධ්‍යක්ෂ සඳුන් රාජකරුණා.
මේ දවස් ගෙවී යන්නේ කෙසේද?
මේ දවස්වල ටෙලිනාට්‍ය රූගත කිරීම් සමඟ ගොඩක් කාර්යබහුලව කාලය ගෙවී යනවා. ඒ විධියට තමයි මේ දවස් ගෙවෙන්නේ.
මායාවී ටෙලිනාට්‍ය සම්බන්ධයෙන් මේ දිනවල විශාල කතාබහක් ඇති වෙලා මේ ගැන කතා කරනවා නම්?
මායාවී ටෙලිනාට්‍ය ගැන විශාල කතාබහක් මේ වන විට ඇති වෙලා තිබෙනවා. එම ටෙලිනාට්‍යයට රංගනයෙන් දායක වුණු දුෂේනි මියුරංගි එම චරිතයෙන් ඉවත් වී යෑම මේ ගැටලුවට හේතු වුණා. මම මේ ගැටලුව සම්බන්ධයෙන් මගේ ෆේස්බුක් එකේ පළ කළ පෝස්ටුව ගැන මේ දිනවල බොහෝ අය කතාබහ කරනවා. ඇත්තටම මට එවැනි පෝස්ටුවක් පළ කිරීමට කිසිදු වුවමනාවක් තිබුණේ නැහැ. මේ ගැටලුව සම්බන්ධයෙන් දුෂේනි මියුරංගි පළ කළ පෝස්ටුවට පිළිතුරක් වශයෙන් තමයි මම මේ පෝස්ටුව පළ කළේ. ඇය එම පෝස්ටුවෙහි රාජකාරිය දේවකාරිය කර ගනිමින් වැඩ කරන බවත් දවස් දෙකක නිවාඩුවක් ගත් බවත් සඳහන් කර තිබුණා. එය සම්පූර්ණ අසත්‍යක් නිසා එයට පිළිතුරු නොදී සිටියහොත් සමස්ත රටේ මිනිසුන් සිතනවා අපි වැරැදිකරුවන් කියලා. නැති නම් මම ජීවිතයට ඔය වගේ පෝස්ටුවක් පළ කරන්නේ නැහැ.
රංගන ශිල්පිනියක් හෝ ශිල්පියෙක් නිර්මාණය අතර මඟ දමා යෑම එම නිර්මාණයට බලපෑම් කරන්නේ කෙසේද?
අපි යම් කලාකරුවෙක්ව අපේ කටයුතු සමඟ සම්බන්ධ කර ගන්නේ නිර්මාණයක් සඳහා. එම කලාකරුවාගේ කැමැත්තෙන් පසුව ගිවිසුම් ගත වීමෙන් තමයි මේ විධියට යම් නිර්මාණයක් සමඟ සම්බන්ධ වෙන්නේ. නිර්මාණයක සිටින්නේ එක් රංගන ශිල්පිනියක් හෝ ශිල්පියෙක් නෙවෙයි විශාල පිරිසක් සිටිනවා. මේක සාමූහික ක්‍රියාවලියක්. ඒ වගේම මේ දේවල්වලට පරිභාහිරව නිෂ්පාදක, කලා අධ්‍යක්ෂ, සහාය අධ්‍යක්ෂ, තිරපිටපත් රචකයා වැනි පිරිසක් සිටිනවා. මේක පනස් දෙනෙක් හැට දෙනෙක් එක් වී වැඩ කරන ක්‍රියාවලියක්. මේ පිරිස සමඟ ගනුදෙනු කිරීමේ එකඟතාව මත තමයි යම් කෙනෙක් නිර්මාණයක් සමඟ සම්බන්ධ වෙන්නේ. ඒ නිසා තමන්ගේ හිතුමතේට තමන්ගේ පෞද්ගලික ප්‍රශ්න වෘත්තිය සමඟ පටලවා ගන්න හොඳ නැහැ. මම වුණත් මට පෞදගලික ගැටලුවක් තිබෙනවා නම් එය මම වෘත්තීය ජීවිතයට රැගෙන එන්නේ නැහැ. ඒ නිසා කාගෙවත් වෘත්තියකට මගෙන් කරදර වෙන්න හොඳ නැහැ. මගේ වෘත්තිය මම කරන්න ඕන සහයෝගයෙන්.
මේ ගැටුම ඇති වීමට බලපෑ හේතු සාධක ගැන කියමු?
අදාළ රංගන ශිල්පිනිය තමන්ට හිතුන වෙලාවට තමයි රූගත කිරීම්වලට එන්නේ. අනෙක් රංගන ශිල්පීන් ශිල්පිනියන් උදේ 7:00ට පමණ රංගනය සඳහා පැමිණෙන විට ඇය එන්නේ ඇයට හිතුන වෙලාවට. ඉන් පසුව ප්‍රේමවන්තයා සමඟ ගැටුමක් ඇති කරගෙන ෆෝන් කෝල්වල පැය ගණනක් සිටිනවා. මේ දෙස අපි කාලයක් පුරාවට බලාගෙන සිටියා. අනෙක් දෙය ඇය රූගත කිරීම්වලට එන්නෙම වීඩියෝ කෝල් එකක් ඔන් කරගෙන. මායාවී කියන්නේ ආදර කතාවක්. එහි ප්‍රේමවන්තයාගේ අතින් අල්ලන දර්ශන තිබෙනවා. එවැනි දෙයක් සිදු වුණොත් පෙම්වතා වීඩියෝ කෝල් එකෙන් බලාගෙන ඉඳලා මේ දෙදෙනා අතර ගැටුම් ඇති කරගන්නවා. මේ දෙය අපි කාලයක් පුරාවට බලාගෙන සිටියා. ඊට පස්සේ ගැටුමක් ඇති කරගෙන ඇවිත් මේ පීඩනය මට දරා ගන්න බැහැ කියලා ඇය යන්න යනවා. ඊට පස්සේ සතියකින් දෙකකින් තමයි නැවත එන්නේ. මෙහෙම වුණාම නිර්මාණයක් පවත්වාගෙන යන්න බැහැ.
මෙම ගැටලුව නිසා මායාවී තිරපිටපත් රචකයාටද බොහෝ අපහසුතාවලට මුහුණ දීමට සිදු වුණාද?
මායාවී තිරපිටපත රචනා කරන්නේ මේ ක්ෂේත්‍රයේ වසර ගණනාවක පළපුරුද්ද තිබෙන ප්‍රවීණ තිරපිටපත් රචකයෙක් වෙන මහේෂ් රත්සර මද්දුමආරච්චි. ඔහුට මේ ගැටලුව නිසා වරින් වර තිරපිටපත වෙනස් කිරීමට සිදු වුණා. ඔහු මේ ගැටලු හේතුවෙන් 13 වතාවක් තිරපිටපත සංශෝධනය කළා. ඒ වගේම අතුරු පිටපතක් පවා රචනා කළා. මෙහෙම වුණාම පිටපත් රචකයෙක්ට හරියට පිටපතක්වත් ලියා ගන්න බැරි වෙනවා. මේ ගැටලුව හේතුවෙන් සමස්ත නාට්‍ය කණ්ඩායම විශාල අර්බුද රැසකට මුහුණ දුන්නා.
ඔබට මෙම ගැටලුවලට මුහුණ දීමට සිදුවන බවට මීට පෙර ක්ෂේත්‍රයේ බොහෝ පිරිසක් අනතුරු අඟවා තිබුණා නේද?
විශාල පිරිසක් ඔයා ඕක දැනගෙන නෙවෙයිද මේ නිර්මාණයට ඇයව සම්බන්ධ කර ගත්තේ කියලා මගෙන් අහනවා. ඔව්, මම මේ ගැන දැනගෙන තමයි ඇයව මේ නිර්මාණයට සම්බන්ධ කර ගත්තේ. ඇයව ටෙලිනාට්‍ය කලාවට හඳුන්වා දුන්නේ මම. ‘ආදර වැස්ස’ ටෙලිනාට්‍යයෙන් තමයි ඇය ටෙලිනාට්‍ය කලාවට ආවේ. ක්ෂේත්‍රයේ ගොඩක් අයට ගැටලු තිබෙන නිසා ඇයව ගන්න එපා කියලා කිව්වා. මම කිසිම දවසක මෙහෙම දෙයක් වෙයි කියලා හිතුවේ නැහැ. මම මේ ක්ෂේත්‍රයට රැගෙන ආ කෙනෙක් මට මෙහෙම කරයි කියලා මම සිතුවේ නැහැ. කොහොම හරි හැමෝටම වුණු දෙය මටත් වුණා.
ඇයගේ චරිතය වෙනුවෙන් වෙනත් රංගන ශිල්පිනියක් යොදා ගැනීම ගැන ඔබේ අදහස?
ඇය දවසක් දෙකක් රූගත කිරීම්වලට සහභාගි වීමට බැරි වුණා යැයි පැවැසුවත් දවස් 30 ගණනක් අපිට මේ ගැටලුවලට මුහුණ දීමට සිදු වුණා. මේ ගැටලු නිසාම තමයි අපිට මේ චරිතය සඳහා වෙනත් රංගන ශිල්පිනියක් යොදා ගන්න සිදු වුණේ. ලංකාවේ විතරක් නෙවෙයි ලෝකයෙත් ගොඩක් නිර්මාණ සඳහා රීප්ලේස් වීම සිදු වෙලා තිබෙනවා. සල්ලි පොකුරු ටෙලිනාට්‍යයේ මුලින්ම ෂෙනායා ඉඳපු චරිතයට දුෂේනි රීප්ලේස් වුණා. අපි මේ විධියට රංගන ශිල්පිනියක් රීප්ලේස් කරමින් සාමාන්‍ය ආකාරයට මේ නිර්මාණය ඉදිරියට රැගෙන යන්න කටයුතු කළා. නමුත් ඇය තමන් නිවැරැදියි කියා ප්‍රකාශයක් සිදු කළ නිසා තමයි මට උත්තර දීමට සිදු වුණේ. නැති නම් මිනිස්සු හිතනවා අපි වැරැදිකාරයෝ කියලා.
ලාංකේය කලා ක්ෂේත්‍රය තුළ විනය පිරිහී ගිහින් බව ඇතැම් පිරිස් පවසනවා… මේ ගැන කියනවා නම්?
ලංකාවේ ජ්‍යෙෂ්ඨ ශිල්පීන් හැරෙන්න අලුත් පරම්පරාවේ ශිල්පීන් මේ තත්ත්වයට පත්වෙමින් යනවා. ඒක ලොකු ඛේදවාචකයක්. ඇත්තටම මෑත කාලයේදී විනය කියන දේ ඇත්තෙම නැහැ. මේ ක්ෂේත්‍රය කොතැනට ගමන් කරනවාද කියලා හිතාගන්න බැහැ. අපි ඉස්සර හරිම විනයකින් මේ ක්ෂේත්‍රය තුළ කටයුතු කළා. ඒ නිසාම ඉතා සතුටින් අපි වැඩ කළා. අධ්‍යක්ෂවරයෙක් වුණාම පීඩනයකින් තොරව වැඩ කරන්න පුළුවන් වෙන්න ඕන. නමුත් අද මේ ක්ෂේත්‍රයේ වැඩ කරන්න වෙලා තිබෙන්නේ විශාල පීඩනයකින්.
මේ ක්ෂේත්‍රයේ ඇතැම් පිරිසකගේ හැසිරීම ගැන බොහෝ පිරිසකට තිබෙන්නේ අසතුටක්. මේ ගැන කියනවා නම්?
මෑත කාලයේ ලංකාවේ රංගන ක්ෂේත්‍රයට පැමිණෙන බහුතරයක් නවක ශිල්පී ශිල්පිනියන් පැමිණෙන්නේ ජනප්‍රියත්වය සොයා යෑමට. ඔවුන් ඉන් පසුව මුදල් පසුපස හඹා යනවා.
ඔවුන්ට මේ වෘත්තීය හදාරලා වෘත්තීයමය රංගන ශිල්පියෙක්, ශිල්පිනියක් වීමේ කිසිදු අවශ්‍යතාවක් නැහැ. අතළොස්සක් වූ කිහිපදෙනෙක් ඉතා උන්දුවෙන් හැදෑරීම් කරමින් මේ ක්ෂේත්‍රයේ පැවැත්ම උදෙසා බොහෝ වෙහෙස මහන්සි වෙනවා. එහෙත් බහුතරයකට කිසිදු විනයක් නැහැ. ඔවුන් ජ්‍යෙෂ්ඨයන්ට ගරුකිරීමක් කරන්නෙ නැහැ, පිටපත කියවන්නේ නැහැ, චරිත ගැන අධ්‍යයනය කරන්නෙ නැහැ. ඔවුන් රඟපානවා කියන්නේ දෙබස්
කියනවා කියලා හිතාගෙන ඉන්න තරම් දුර්වල තැනකට වැටිලා. බොහෝ අය ජීවත් වෙන්නේ දුරකථනය තුළමයි. ඇතැමුන් විඩියෝ රෙකෝඩ් කරමින්, වීඩියෝ කෝල්වල සිටිමින්, tik tok වැනි සමාජ මාධ්‍යවල මුදල් හිඟා කන තරමට පහත්ම තැනට වැටිලා. රූගත කිරීම් සඳහා දෙන දින පිළිබඳව ඔවුන්ට වගකීමක් නැහැ. ලබාදී තිබෙන දිනවල පෞද්ගලික වැඩවලට යෑම තුළ අනෙකුත් ශිල්පීන් බහුතරයක් අපහසුතාවට පත් කරන්නේ කිසිදු මනුස්සකමක් නොමැතිව.
ඇතැම් ශිල්පීන් උදේ වැඩයි, දවල් වැඩයි, හවස වැඩයි ලෙස දවස තුනට හතරට බෙදලා කරන්න බැරි තරම් වැඩ භාර අරගෙන. ඔවුන් සියලු වැඩ අමාරුවේ දාලා මුදල් හම්බකරන තැනට වැටිලා. මම මේ කරන ප්‍රකාශය සාමාන්‍ය සුළු පිරිසක් පිළිනොගන්න පුළුවන්. නමුත් මේ කේෂ්ත්‍රයේ සිටිනා සෙසු අධ්‍යක්ෂවරු, නිෂ්පාදකවරු, සහාය අධ්‍යක්ෂවරු හා සෙසු ශිල්පීන්ගෙන් විමසුවහොත් ඔවුන් මගේ ප්‍රකාශයට සාක්ෂි දරාවි.
ගිහාන් සචින්ත
.png)