පේෂානි ඒකනායක කාලෙකට කලින් අපේ ජාතික ෆුට්බෝල් කණ්ඩායමේ සාමාජිකාවක්. නමුත් අද ඇය රංගන ශිල්පිනියක්. චලෝ, සික්ස් පැක් යන ටෙලි නිර්මාණවලින් පස්සෙ ඇය දැන් රංගන දායකත්වය සපයන්නෙ ලලයි ලිලයි ලයි ටෙලි නාට්‍යයට.
පේෂානිට මේ දවස්වල ප්‍රතිචාර ගොඩයිලු නේද?
ඔව්, ලලයි ලිලයි ලයි ටෙලි නාට්‍යයේ මට ලැබිල තියෙන්නෙ පොඩි චරිතයක් වුණත් ඒක මිනිස්සු අතරට ගිහින් තියෙනව. ඒ නිසා මේ දවස්වල බොහොම හොඳ ප්‍රතිචාර ලැබෙනව.
ඔබේ චරිතය ගැන කතා කළොත්?
මට ලැබිල තියෙන්නෙ නදී තරංගා කියන චරිතය. රවීන්ගෙ බිරිඳ විදිහට තමයි මම ඉන්නෙ. මේ ටෙලිනාට්‍යය මගේ ජීවිතයේ හැරවුම් ලක්‍ෂ්‍යය වුණා.
නදී තරංගා මොන වගේ කෙනෙක්ද?
නදී කියන්නෙ ෆුට්බෝල් කෝච් කෙනෙක්. එයාගෙ ආදරයට ගෙදරින් අකමැති නිසා දෙන්න එක්ක පැනල ගිහින් අමාරුවෙන් ජීවිතේ ගැටගහගන්න හදන කෙනෙක්.
පේෂානිට කොහොමද නදී මුණගැහෙන්නෙ?
මම ෆෝමර් නැෂනල් ෆුට් බෝල් ප්ලේයර් කෙනෙක්. මේ අත්දැකීමත් එක්ක තමයි මාව නදී කියන ෆුට් බෝල් ටීචර්ගෙ චරිතයට තෝරාගන්නෙ.
ඔබ ජාතික කණ්ඩායම නියෝජනය කළ ක්‍රීඩිකාවක්?
ඔව්, මම රඟපෑමට එන්න කලින් ජාතික ෆුට්බෝල් කණ්ඩායම නියෝජනය කළ ක්‍රීඩිකාවක්. ඉන් පසුව ක්‍රීඩා කටයුතු නතර කරල මගේ උසස් අධ්‍යාපන කටයුතු වෙනුවෙන් පූර්ණ අවධානය යොමු කළා.
පේෂානි ගැන විස්තර ටිකක් කියමු?
මගේ ගම නුවර, කටුගස්තොට. පවුලේ ඉන්නෙ අම්මයි, තාත්තයි, අයියයි, අක්කයි. මම මුලින්ම ගියේ මදුගම ජාතික පාසලට. ශිෂ්‍යත්වය සමත් වෙලා නුවර සීතාදේවී පාසලට ඇතුළත් වුණා. එතැනින් පස්සෙ උසස් පෙළ සඳහා නැවතත් මොනරාගල රෝයල් කොලේජ් එකට ඇතුළත් වුණා. ෆුට් බෝල් ප්ලේ කරන්න පටන්ගත්තෙ 4 ශ්‍රේණියේ ඉගෙනගන්න කාලෙ. ඒ පටන්ගැන්ම අවුරුදු දහයක් විතර ක්‍රීඩා කළා. ලබාගත්ත සම්මාන අතර හොඳම ක්‍රීඩිකාව සම්මානයත් තියෙනව.
පවුලේ අයගෙන් ලැබෙන සහයෝගය?
මගේ අම්මා මුල ඉඳන්ම කැමති වුණා මම කැමති දේ කරනවට. නමුත් තාත්තා නම් චලෝ ටෙලි නාට්‍යය විකාශය වුණ කාලෙ ඉඳන්ම කැමති නැහැ මම රඟපෑමට යොමු වුණාට. නමුත් දැන් දැන් ලොකු විරෝධයක් පෙන්වන්නෙ නැහැ.
ජාතික කණ්ඩායමට තේරීපත්වෙන්නෙ?
ජාතික කණ්ඩායමක් හැටියට මුලින්ම ආරම්භ කළේ අවුරුදු දහසයෙන් පහළ කණ්ඩායම. ඊට ඇතුළත් වෙන්න මටත් අවස්ථාව ලැබුණා.
මේ වන විට ඔබේ වෘත්තිය?
මගේම ඇඳුම් ව්‍යාපාරයක් කරගෙන යනගමන් ගෘහනිර්මාණ ශිල්පිනියක් හැටියටත් කටයුතු කරනව.
මොනරාගල ඉඳන් කොළඹ ආපු ගමන ගැන කතාකළොත්?
මම මුලින්ම කොළඹ එන්නෙ උසස් පෙළ උපකාරක පන්තිවලට සහභාගී වෙන්න. ඒ ගමන මගේ ෆුට් බෝල් ප්‍රැක්ටිස්වලටත් පහසුවක් වුණා. මේ ගමන් මම ආවෙ ගියේ තනියම. එතනදි ක්‍රීඩාව තමයි මට ශක්තියක් වුණේ.
ලලලි ලිලයි ලයි ටෙලි නාට්‍යයට සම්බන්ධ වුණේ කොහොමද කිව්වොත්?
මේ ටෙලිනාට්‍යයේ අධ්‍යක්‍ෂවරයා වන සුපුන් රත්නායක මහත්මයා තමයි මට මේ චරිතයට ආරාධනා කරන්නෙ. මමත් බොහොම ආදරෙන් මේ චරිතය භාරගත්ත.
මින් පෙරත් ඔබ රඟපාල තියෙනව?
ඔව්, මුලින්ම මම සම්බන්ධ වුණේ වෙළෙඳ දැන්වීම්වලට. ඉන් පස්සෙ චලෝ, සික්ස් පැක් යන ටෙලිනාට්‍යවල වගේම කෙටි නාට්‍ය බොහොමයක මම චරිත නිරූපණය කළා.
කලාවට සම්බන්ධ වීම අද කොහොමද දැනෙන්නෙ?
ඇත්තටම සතුටුයි. මට ලැබුණ වාසනාවක් හැටියටයි මම මේ අවස්ථාව දකින්නෙ. මොකද මට මිනිස්සු අතරට යන්න පුළුවන් වුණේ කලාව නිසා.
දැන් ෆුට් බෝල් ක්‍රීඩාවෙන් ඈත් වෙලාද?
ඔව්, දැන් මම ෆුට් බෝල් ක්‍රීඩා කරන්නෙ නැහැ. මමත් එක්ක ක්‍රීඩා කළ සමහර අය අදටත් ක්‍රීඩා කරනව. නමුත් අපේ රටේ ෆුට් බෝල් ක්‍රීඩා කරල කවදාවත් ගොඩ යන්න බැහැ. මොකද මම ක්‍රීඩා කරන කාලෙවත් ජාතික කණ්ඩායමේ සාමාජිකයන්ට ගෙවීමක් කළේ නැහැ. ක්‍රිකට් හැරුණම මේ වගේ ක්‍රීඩාවක් තමන්ට ආදායම් මාර්ගයක් වෙයි කියල මම නම් හිතන්නෙ නැහැ.
ඔබ මුහුණ දුන් අත්දැකීම් මොන වගේද?
මම මුහුණ දුන් අත්දැකීම් ඉතාම කටුකයි. මොනරාගල ඉඳන් කොළඹ ප්‍රැක්ටිස්වලට මම එන්න ඕන බස් එකේ. මුල්කාලෙදි තනියම එන්න බැහැ. අම්මව හරි තාත්තව හරි එක්කගෙන එන්න ඕන. ඉස්කෝලෙ යන්න වෙන්නෙ දවස් තුනයි.
ලලයි ලිලයි ලයි චරිතයට මගතොට ප්‍රතිචාර කොහොමද?
ඇත්තටම මම පාරෙ යනකොටත් රසිකයො අහනව, නදී තරංගා කෝ මෝඩ රවීන් කියල.
මන්රුචිගෙන් ලැබෙන්නෙ මොන වගේ සහයෝගයක්ද?
මන්රුචිගෙන් ලොකු සහයෝගයක් ලැබෙනව. සීන් එකක් ගත්තාමත් අපි දෙන්න කතාවෙලා තමයි ඒකට සූදානම් වෙන්නෙ.
පේෂානි දිගටම රඟපායිද?
මම කැමති නැහැ කොටස් බොහෝ ප්‍රමාණයක් තියෙන නිර්මාණවලට එකතු වෙන්න. එහෙම වුණාම ප්‍රේක්‍ෂකයන්ටත් එපා වෙනව.
වේදිකාවට සම්බන්ධ වුණේ නැද්ද?
මට වේදිකාවේ රඟපාන්න අවස්ථාවක් ලැබිල නැහැ. නමුත් ආසාවෙන් ඉන්නව එවැනි නිර්මාණයකට එකතු වෙන්න.
අලුත් ආරාධනා?
මේ වන විට තවත් ටෙලි නාට්‍ය දෙකකට ආරාධනා ලැබිල තියෙනව. එකක් නොවැම්බර් මාසයේදී රූගතකිරීම් ආරම්භ කරනව.
ක්‍ෂේත්‍රය ගැන ඔබේ අදහස?
විශේෂයෙන්ම ගැහැනු ළමයකුට මේ ක්‍ෂේත්‍රයේ ගමනක් යන්න අමාරුයි. නමුත් අපි හරියට දෙයක් කළොත් පැවැත්මක් තියෙයි.
ක්‍රීඩාවෙන් ඈත්වීම ගැන දුකක් තියෙනවද?
ඇත්තටම මගේ යාළුවො තවම සෙල්ලම් කරනව දැක්කම හිතට අවුලක් දැනෙනව අපරාදෙ මං ෆුට්බෝල්වලින් ඈත් වුණේ කියල. නමුත් මම අද ඊට වඩා දෙයක් ලබල තියෙනව නේද කියල සතුටු වෙනව.
මහේෂ් එදිරිසිංහ
.png)