සම්මානනීය අධ්‍යක්ෂවරයකු වන අරුණ ජයවර්ධනගේ තිර රචනයට නිවන්ත ප්‍රසාර අධ්‍යක්ෂණය කළ ‘රැල්ල වෙරළට ආදරෙයි‘ මේ දිනවල හිරු නාලිකාව ඔස්සේ විකාශය වන ඉතාම ජනප්‍රිය ටෙලි නිර්මාණයකි. එහි ශිවාට පණ පොවමින් ඔබ හමුවට එන ඔහු නමින් රන්දික ගුණතිලකයි.
ඔබ නිරුපණය කරන ‘ශිවා‘ මේ දවස්වල බොහෝ ජනප්‍රියයි. රන්දිකට කොහොමද ඒක දැනෙන්නේ?
මං රංගනයනට පිවිසෙන්නේ වේදිකාවෙන්. ඒ වගේම සිනමාවටත් සම්බන්ධ වුණා. ශිවා කියන්නේ මට ලැබුණු අභියෝගාත්මක චරිතයක්. සාමාන්‍යයෙන් ඒක නළුවෙක් භාරගන්න කැමැති චරිතයක් නොවෙයි. මොකද ඒ චරිතයේ සමහර දේවල් ඒ චරිතය කරන නළුවාගේ පෞද්ගලික ජීවිතයට පවා බලපාන්න පුළුවන්. මේක තෙළිඟු චිත්‍රපටයක් මූලික කරගෙන කරපු නිර්මාණයක්. කතා සාරාංශය ගත්තොත් වැල්ල ආශ්‍රිත කතාවක්. ඒ පළාතට ඉන්න බෝට්ටු හිමියගෙ එකම දුව සත්‍යා (සුදු මැණිකෙ) ආදරේ කරන්නේ වැල්ලෙ සාමාන්‍ය කොල්ලෙක් වන ශිවාට. ශිවාට වචන උච්චාරණයේ පොඩි අවුලකුත් තියෙනවා. ‘ස‘ කියවෙන්නෑ. ඒත් සුදු මැණිකෙගෙ ආදරේට ඒක බාධාවක් නොවෙයි. තමන්ට පණ වගේ ආදරේ කරන අම්ම, තාත්තා දාලා ඇය ශිවා එක්ක යන්නේ ආදරය, රැකවරණය, ආරක්ෂාව, විශ්වාසය ආදි සියල්ල ශිවාගෙන් ලැබෙන බව දැනගෙන. සත්‍යාගේ පියාට මේ ආදරය දරා ගන්න බැරි වෙනවා. තම එකම දුවගේ ජීවිතය වුණත් ඔහු හිතන්නේ ශිවාගෙන් පළිගන්න. ඔහු හිතන්නේ ඇය ආදරේ කළේ ශිවාගෙ පිරිමිකමට කියලා. ඔහුට ඕන වුණේ ඒ පිරිමිකම නැති කරන්න. ඒකට දුවගෙන් ඔහුට ලැබෙන්නෙ අපූරු උත්තරයත්. ඇය කියන්නේ පිරිමියාගේ පිරිමිකම තියෙන්නේ ඔහුගේ ක්‍රියාකලාපය තුළ මිසක් අවයවයක් තුළ නොවෙයි කියලා. ඒ නිසා එය කිසිම ගැටලුවක් නොවෙයි කියලා. මං හිතන්නේ මේක අද කාලෙටත් හොඳ පණිවිඩයක්. අන්න ඒ දේ ප්‍රේක්ෂකයාට දෙන්න මට ඕනකම තිබුණා. මිනිස්සු හිතන පතන විදිය මොනවගේ වෙයිද කියලා නම් මං දන්නෙ නෑ. ඒ අභියෝගය භාර අරන් තමයි මං මේ චරිතයට කැමති වුණේ.
ශිවාට ලැබෙන ප්‍රතිචාර කොහොමද?
ප්‍රතිචාර නම් ගොඩක් ලැබෙනවා. ඕනෑම නළුවෙක් චරිතයක් කරන්නේ ප්‍රේක්ෂකාගාරය බලාපොරොත්තුවෙන්. ප්‍රේක්ෂකයාගේ හදවතට දැනුණා නම් අනිවාර්යයෙන්ම ඔවුන් සැබෑ ජීවිතයේදීත් අපි දිහා බලන්නේ චරිතයේ ඇසින්. මඟතොටේදී හමුවෙන සමහර අය මගෙන් අහනව කෝ බාබු, කෝ සුදු මැණිකෙ කියලා. අපේ පෞද්ගලික ජීවිතෙත් කතාවම කියලා හිතන තරමටම එයාලා ඒ චරිත වැලඳගෙන.
ශිවා කියන්නේ මුහුදත් එක්ක ඔට්ටු වන වැල්ලෙ කොල්ලෙක්. ඒ ගැන ලැබුණු අත්දැකීම් කොහොමද?
මේක රූගත කළේ මීගමුව ආශ්‍රිතව. ඒ වගේම සැබෑ ජීවිතයේදී මං වාහන එළවන එක ගැන එච්චර කැමැත්තක් තියෙන කෙනෙක් නෙවෙයි. ගියර් දදා, කරකව කරකවා, තව වාහන ගොඩක් ගැන හිත හිතා, පාරවල් ගැන හිත හිතා, ස්ට්‍රෙස් එකේ යනවට වඩා මං කැමතියි කවුරුහරි එළවනව නම් අනිත් පැත්තට වෙලා වාඩිවෙලා යන්න. එහෙම එකේ බෝට්ටුවක් වගේ එකක් හම්බවුණාම කොහොමට තියේද හිතන්නකො. ගොඩදි නම් හැප්පුණොත් අඩිය තියාගන්න බිම හරි තියෙනවා. ඒත් මූදෙ එහෙම දෙයක් වුණොත් පීනන්නත් බෑ. නමුත් පස්සෙ පස්සෙ නම් ඒකට හුරුවුණා.
ඒ වගේම මීගමුවෙ තමයි හොඳම මිනිස්සු ඉන්නෙ කියලා මං ඕනම තැනක කියනවා. එයාල අනිත් මිනිස්සුන්ගෙ දේවල් හොයන්නෙත් නෑ. එදිනෙදා හම්බ කරගෙන කනවා, බොනවා, සතුටුවෙනවා. මං කලින් දැනගෙන හිටියෙ නෑ එයාල ඒතරම් හොඳ මිනිස්සු කියලා. මේකෙ ෂූටින්වලට ගියාට පස්සෙ තමයි එයාල ගැන දැනගත්තේ. මං සතිය දෙක නැවතිලා ඉන්නවා. පුදුම සුහදශීලී මිනිස්සු ජාතියක්. ගොඩක් දවස්වලට මට කෑම ගෙනත් දෙනවා. පාරේ යද්දි පවා එයාලා බත් අනල කවනව. ඒ එයාලගේ කල්චර් එක.
ඒ වගේම ශිවාගෙ චරිතය තුළ සාමාන්‍ය දේකට එහා ගිය දෙයක් කරන්න තියෙනවා. ශිවාට ‘ස‘ යන්න කියවෙන්නෙ නෑ. චරිතයට ඒක හුරුවෙද්දි මටත් ඒක පුරුද්දක් බවට පත්වුණා. රංගන ශිල්පියෙකුට චරිතයක් වෙනුවෙන් දෙයක් කරන්න වුණාම හොඳ දෙයක් හෝ නරක දෙයක් ඒක සාමාන්‍ය ජීවිතේටත් කාන්දු වීම සාමාන්‍ය දෙයක්. ඒක මටත් වුණා.“
ශිවා සත්‍යාට පණ වගේ ආදරෙයි. රන්දිකගෙ ආදරය මොන වගේද?
මගේ ආදරය ප්‍රසිද්ධ රහසක්.
