ගින්දරී තුන චිත්‍රපටයත් සමඟම සැමගේම අවධානය යොමු වුණේ ඒ සුන්දර ගිනිසිළුව වෙතටයි. බහුබූතයෝ චිත්‍රපටය ප්‍රදර්ශනය වී වසර විස්සකට පසුව ගින්දරී තුන චිත්‍රපටය නිර්මාණය වුණත් ඇයගේ සුන්දරත්වය ලාලිත්‍ය බිඳකුදු අඩු නොවීමම සොඳුරු රහසක්. පබෝදා සංදීපනි අද කතානායිකාව ඇයයි.
ගින්දරී 3ට ලැබෙන ප්‍රතිචාර කොහොමද?
ප්‍රතිචාර ගොඩක් හොඳයි. ෆිල්ම් එක හවුස් ෆුල්. චිත්‍රපටය හිටගෙනත් බැලුවා කියලයි ආරංචිය.
බහුබූතයෝ චිත්‍රපටයෙහි දුටු සොඳුරු ගිනිසිළුව බින්දුවක්වත් වෙනස් නැතුව ගින්දරී තුන චිත්‍රපටයෙත් අප දුටුවා. තාරුණ්‍යය බැඳලා හිරකරගන්න රහසක් ඔබට තියෙනවද?
අනේ නැහැ. මම දුකේදීත්, සතුටෙදීත් හිනාවෙලා ඉන්න එක තමයි ලොකුම රහස. චිත්‍රපටයකට ආරාධනා ලැබුණම එහි චරිත ස්වභාවය මත මම එයට සූදානම් වෙනවා. නැත්නම් අවශ්‍ය වේලාවේදී හොඳට කාල බීල සතුටින් ඉන්නවා.
බහුබූතයෝ වගේම ගින්දරී 3 චිත්‍රපටය තුළත් රෙද්ද හැට්ටේ ඇඳගෙන ප්‍රසිද්ධ පාරවල රූපගත කිරීම් කරන්න වුණාම හිතට චකිතයක් දැනුණේ නැද්ද?
බහුබූතයෝ චිත්‍රපටය තිරගත වෙන කොට බොහෝ දෙනෙක් හිතුවේ ඒක වැඩිහිටියන්ට පමණයි චිත්‍රපටයක් කියලා. රෙද්ද හැට්ටේ ඇඳගෙන පෝස්ටර්වල මාව විතරක් ප්‍රදර්ශනය කරන කොට බොහෝ දෙනෙක් ඇයි මේ වගේ චිත්‍රපටයක රඟපෑවේ කියලා ප්‍රශ්න කෙරුවා. නමුත් ගින්දරී 3හි රඟපාන කොට එහි ස්වභාවය පිළිබඳ මිනිසුන් දැනුම්වත්. ප්‍රධාන නගරවල රෙද්දයි හැට්ටෙයි ඇඳන් යන එක ඇත්තටම ලොකු චකිතයක්. විශේෂයෙන් ලංකාව වගේ රටක ඒක ඇත්තටම ලොකු අභියෝගයක්.
පබෝදා සන්දීපනී පුංචි තිරයෙන් ඈත්වී රිදී තිරයට කොටුවෙලා කියලාත් පුංචි සැකයක් මතුවෙනවා. ඒ ගැනත් කිවුවොත්?
එහෙම දෙයක් නැහැ. මම නිර්මාණකරණයට දායක වෙන්නේ හොඳ තේරීමකින් පසුවයි. හිතට හරියන නිර්මාණයක් ලැබුණොත් මම අනිවාර්යයෙන්ම කරනවා. මෑතකදී මම සකර්ම කියලා ටෙලි නාට්‍යකට සම්බන්ධ වුණා. මං ගොඩක් වෙලාවට දකින්නේ නැත්තේ මම බලන් ඉන්නවා හොඳ නිර්මාණයකට මට ආරාධනා ලැබෙනකම්. ලබන අවුරුද්දෙත් මගේ චිත්‍රපටියක් දක්නට ලැබේවි.
ඔබ ව්‍යංගයෙන් කියන්නේ ප්‍රතිභාපූර්ණ රංගන ශිල්පිනියකට සුදුසු ගුණාත්මක නිර්මාණ මේ වන විට බිහි වෙන්නේ නැහැ කියලද?
අපිට ගැළපෙන නිර්මාණ බිහි වුණොත් ඒ තුළ අපට වැඩක් කළ හැකියි. නමුත් වර්තමානයේ අතීතයට සාපේක්ෂව හොඳ නිර්මාණ බිහි වෙනවා අඩුයි. එයට ප්‍රධානතම හේතුව ගුණාත්මක නිර්මාණ ගොඩනැගීමේ අපහසු බවයි. නිර්මාණකරුවන් හොඳ නිර්මාණවලට අත ගසන්නෙ නැහැ. මොකද ඔවුන්ට මූල්‍යමය වටිනාකමක් එයින් ලැබෙන්නේ නැහැ.
ප්‍රවීණත්වයට, හැකියාවට සුදුසු වටිනාකමක් රංගන ශිල්පීන්ට ලැබෙන්නැහැ කියන චෝදනා බොහෝ දෙනෙක් එල්ල කරනවා. ඔබත් එකී අර්බුදයට මුහුණ දී තිබෙනවා ද?
හොඳ රංගන ශිල්පීන් එක්කරගෙන හොඳ නිර්මාණයක් බිහි කළත් එය නාලිකාවකට ලබා දීමට අපහසුයි. ඒ නිසා අඩු මුදලකට රංගන ශිල්පීන් යොදා ගෙන නාලිකාවකට තල්ලු කිරීමේ ක්‍රියාදාමය වර්තමානයේ හරිම සුලබයි. ඒ නිසා හොඳ නිර්මාණකරුවන් පවා බොහෝවිට සිල්ලරට විකිණෙනවා.
උදයකාන්ත වර්ණසූරියගෙන් ගින්දරී හතර පිළිබඳවත් පොඩි ඉඟියක් ලැබුණා.ආරාධනාවක් ලැබුණොත් ගින්දරී හතරටත් සම්බන්ධ වෙනවාද?
ගින්දරී හතර කරමුද කියලා පොඩි යෝජනාවක් මට දැම්මා. ගින්දරී තුන සාර්ථක වුණොත් ගින්දරී හතරත් කරමු කියලා මමත් කිවුවා
ඔබගේ අනාගත බලාපොරොත්තු මොනවාද?
මගේ පුතාගේ අධ්‍යාපන කටයුතු සාර්ථක කර ගැනීම වගේම හොඳ නිර්මාණවලට දායක වීමට බලාපොරොත්තු වෙනවා.
විශ්මි ජයනිකා
