සිනමාවේ විවිධ චරිත නිරූපණය කරමින් ඔබට සමීපවුණු අමිල කරුණානායක දැන් ‘හිරෝ’ කෙනෙක් ලෙස රඟපානවා. ‘කබඩි’ චිත්‍රපටයේ ‘මනුරංග’ ලෙසින් ප්‍රධාන චරිතය නිරූපණය කරනා අතර, ඉදිරියේදී ඔහු රඟන රජ දහන, ගුත්තිල, කෞෂි චිත්‍රපට තුළින්ද ඔහුගේ රංගනයන් විවිධ පැතිකඩවලින් අපට දැකගන්න පුළුවන්.
අමිල දැන් රිතී තිරයේ ‘හීරෝ’ කෙනෙක් වෙලා නේද?
මේ දිනවල තිරගත වන ‘කබඩි’ චිත්‍රපටයේ මම සමග සෙනාලි ප්‍රධාන චරිතය රඟපානවා. මම මේ චිත්‍රපටයේ ‘මනුරංග’ ලෙසට තමයි රඟපාන්නේ. මේ චරිතය සඳහා මාව සුදුසුයි කියලා මාව තෝරාගත්ත චිත්‍රපට අධ්‍යක්‍ෂ හර්ෂ උඩකන්දට වගේම චිත්‍රපටයේ නිෂ්පාදක නිශාන්ත ජයවර්ධනට විශේෂ ස්තුතිය පුදකරනවා. මොකද ‘මනුරංග’ තුළින් මාව වෙනත් මාවතකට ගෙන ගියාට. ‘කබඩි’ චිත්‍රපටය මගේ රංගන දිවියේ විශේෂ සන්ධිස්ථානයක් ලෙසට හඳුන්වන්නට පුළුවන්. මම වීරයෙක් නොවුණත් සිනමාවට වීරයෙක් ලෙස මුහුණ දෙන පළමු අවස්ථාව නිසා.
‘මනුරංග’ ලෙස ඔබට අභියෝගයක් වුණත්, තවත් පැත්තකින් ඔබට පහසුවක් වන්නට ඇති ඔබත් ක්‍රීඩකයෙක් නිසා?
පාසල් කාලයේ ඉඳලම මම ෆුට්බෝල් ක්‍රීඩාවට ගොඩාක් දක්‍ෂයි. මගේ දක්‍ෂතාවය පැත්තෙන් සම්බන්ධ වෙන්න හොඳ නිර්මාණයක් ලැබෙනකම් මම ආශාවෙන් මගබලාගෙන හිටියේ. ඉතින් ‘කබඩි’ චිත්‍රපටය ෆුට්බෝල් පැත්තෙන් කතාවෙන චිත්‍රපටයක් නිසා මම ගොඩාක් ආශාවෙන් වැඩ කළා.
මේ චිත්‍රපටය හරහා ත්‍රාසජනක අවස්ථාවක් දැකගන්නට තිබෙනවා. කොහොමද ඔබ එයට මුහුණ දුන්නේ?
ලංකාවේ සිනමාව පැත්තෙන් ලොකු තාක්‍ෂණ පහසුකම් නැහැ. ලයිට්හවුස් එක උඩ ඉඳලා මුහුදට පනින ජවනිකා තිබුණා. රිවස්ටන් කඳු මුදුන්වල ඉඳලා පෙරළෙන දර්ශන තිබුණා කරන්න. ඉතින් ඒ කිසිවකට අපි කිසිම ඩමියක් භාවිත කළේ නැහැ. මොකද නිෂ්පාදන පැත්තෙන් ලොකු මුදලක් වැය කිරීමට තිබෙන නිසා. චිත්‍රපට නිෂ්පාදකවරයත් රැකගත යුතුයි. අපේ හැකියාවන් පෙන්විය යුතු නිසා මමත්, සෙනාලිත් හැම අභියෝගයක්ම බාරගෙන මුහුණ දීලා සාර්ථක චිත්‍රපටයක් මගේ ආදරණීය ප්‍රේක්‍ෂකයන්ට රසවිඳීමට අපේ චිත්‍රපට කණ්ඩායම සැලැස්සුවා.
සෙනාලි ෆොන්සේකා සමග ඔබ රඟපාන පළමු අවස්ථාව තමයි මේ. ඇයගෙන් ලැබුණු සහාය ගැන කතා කළොත්?
අපේ සිනමාවේ නිළි රැජන මාලනී ෆොන්සේකාගේ දියණියක් ලෙස සෙනාලිව හඳුන්වනවා හැමෝම. මාලනී මිස් සිනමාව වෙනුවෙන් ගොඩාක් කැපවීම් කරල ජාත්‍යන්තර සම්මාන ගත්ත රංගන ශිල්පිනියක්. ඒ ජානම සෙනාලිටත් තිබෙන බව මම මේ ‘කබඩි’ චිත්‍රපටය හරහා දැක්කා. ඇයත් කිසිම බයක් සැකයක් නැතුව ‘මනුරංග’ ජීවත් කරවීමට මට වගේම චිත්‍රපට කණ්ඩායමටම ලොකු සහායක් දුන්නා කියලා කියන්න පුළුවන්.
නැවැත මතුවේගෙන යන ‘කොරෝනා’ වසංගතයත් එක්ක ‘කබඩි’ චිත්‍රපටයට ලැබෙන ප්‍රතිචාර ගැන කතා කළොත්?
‘කබඩි’ චිත්‍රපටය තිරගත වීමට අරන් වැඩි කාලයක් නැහැ. හොඳ ප්‍රතිචාර තිබෙනවා. ඉතින් නැවැත කොරෝනා ප්‍රශ්න නිසා ජනතාව නැවැත භීතියක් දක්වනවා. ඉතින් මම ප්‍රේක්‍ෂකයන්ගෙන් ඉල්ලා සිටින්නේ සෞඛ්‍ය නීති-රීති අනුගමනය කරමින් ආරක්‍ෂාකාරීව ඇවිල්ලා ‘කබඩි’ චිත්‍රපටය නරඹන්න කියලා. යම්කිසි හේතුවක් මත සිනමා ශාලා වසා දැමුවොත් නැවැත අපි ‘කබඩි’ තිරගත කරනවා.
සිනමාවේ වීරයෝ අද ටෙලිනාට්‍ය පැත්තට යොමුවෙලා?
එයට විශේෂ හේතූන් කිහිපයක් තිබෙනවා. මම ගැන කතා කළොත් මම ටෙලිනාට්‍ය සඳහා සම්බන්ධ වෙන්නේ චරිත කිරීමට තිබෙන ආශාව නිසා. ඒ වගේම ආර්ථික පැත්තෙනුත් ප්‍රශ්න තිබෙනවා. මොකද කලාවෙන් ජීවත් වෙන නිසා. හැබැයි මම මෙගා නාට්‍ය සඳහා සම්බන්ධ වීමට අදහසක් නැහැ. මම සම්බන්ධ වුණු ‘සංසාර සිහිනේ’ ටෙලිනාට්‍ය රඟපෑවා කියලා මට කිසි ප්‍රශ්නයක් නැහැ. මම ආපු සිනමා ගමනට හානියක් නොවන විදියට හොඳ ටෙලිනාට්‍ය සඳහා මම සම්බන්ධ වෙනවා. ඉදිරියේදී මම සම්බන්ධ වුණු ටෙලිනාට්‍ය කිහිපයක් තිබෙනවා.
වසන්ත විතාරණගේ
