අපේ රටේ ගායිකාවක් මෙහේට වඩා වෙන රටක ජනප්‍රිය වෙනවා නම් ඒක පුදුමයට කාරණාවක්. මොකද වෙනත් රටවල තරු මෙහේ කිරුළු පැලඳුවට අපේ තරු වෙනත් රටවල කිරුළු පලඳිනවා අඩුයි. හැබැයි මේ කියන්න යන්නේ එහෙම කතාවක්. ලංකාවේ සුරනි ද මැල් ඉන්දුනීසියාවේ අංක එකේ ගායිකාව බවට පත්වෙලා කිව්වොත් ඔබට පුදුම හිතෙයි. සුරනි අවුරුදු දොළහකට කලින් ගායනා කරපු ‘ආඩම්බරයි බැලුවම නම්’ ගීතය ඉන්දුනීසියාවේ මේ දිනවල ජනප්‍රියම ගීතය බවට පත්වෙලා තිබෙනවා. මේ ගැන සුරනි පුවත්පතකට පවසා තිබුනේ මේ ලෙසයි.
මොකක්ද සුරනි මේ වෙන්නේ?
මීට අවුරුදු දොළහකට විතර කලින් තමයි ආඩම්බරයි බැලුවම නම් ගීතය ගායනා කෙරුවේ. හැබැයි හිතාගන්න බැරි විදිහට ඉන්දුනීසියාවේ මේ ගීතය ජනප්‍රිය වෙලා. ඒ මාස තුනට මිලියන පහකට වඩා ඉන්දුනීසියාවේ බලලා තියෙනවා. මීට අමතරව පිලිපීනය, තායිලන්තය හා මාලදිවයින වගේ රටවලත් මේ ගීතයට ඉහළ ප්‍රතිචාර ලැබෙනවා. ඉරාජ් වීරරත්න තමයි මේ ගීතය නිර්මාණය කළේ. වසන්ත දුක්ගන්නාරාළ රචනා කෙරුවා. හිතාගන්න බැරි ආකාරයට මේ ගීතය ප්‍රේක්ෂක සිත්වල තැන්පත් වෙලා.
කොහොමද මේ ගීතය ඉන්දුනීසියාවට යන්නේ?
මගේ ගීතවලට කැමති ඉන්දුනීසියාවේ ඩී.ජේ. කෙනෙක් ඉන්නවා ඩේසා කියලා. ඩී.ජේ. ඩේසා තමා මේ ගීතයේ සිංහල වචන ඔවුන්ගේ ආරයට රැප් කරලා තියෙන්නේ. කිසිම වචනයක් වෙනස් කරලා නැහැ. ගීතය දාපු දවසේ ඉඳලා රැල්ලක් වගේ ජනප්‍රිය වෙන්න පටන් ගත්තා.
කොහොමද සුරනි දැනගත්තේ ඔයාගේ ගීතයක් මේ ආකාරයට ඉන්දුනීසියාවේ ජනප්‍රිය වෙනවා කියලා?
ඉන්දුනීසියාවේ අය මාව හොයන්න අරගත්තා. ලංකාවේ මම කරපු අනික් ගීතවලටත් ඉන්දුනීසියාවෙන් කමෙන්ට් වැටෙන්න අරගත්තා. ඔවුන්ගේ සයිට්වලට ගිහින් බලපුවම ආඩම්බරයි මම නම් ගීතය පිස්සුවක් බවට පත්වෙලා. මටවත් හිතාගන්න බැරිවුණා මොකක්ද වෙන්නේ කියලා. තරුණ අය අතර තමා මේ ගීතය හුඟක්ම ජනප්‍රිය වෙලා තියෙන්නේ. ඉන්දුනීසියාවේ තරුණ අය ගීතයට ටික් ටොක් ලක්ෂ ගාණක් හදලා තියෙනවා. මීට අමතරව ලක්ෂ ගාණක් වීඩියෝ හැදිලා තියෙනවා. යූ ටියුබ් එකේ කවර් වර්ෂන් විශාල ප්‍රමාණයක් කරලා ඔවුන් අතරේ ආඩම්බරයි බැලුවම කියලා චැලේන්ජ් එකේ හැදිලා තියෙනවා. මේ ගීතයට ලංකාවේ නම් මේ වගේ ප්‍රතිචාරයක් ලැබුණේ නැහැ.
ඔබේ අලුත් ගීතවලටත් මේ ප්‍රතිචාරයම ලැබෙනවාද?
මගේ අලුත්ම නිර්මාණය ‘කාටත් හොරා’ ගීතයටත් ඉතා ඉහළ ප්‍රතිචාර ලැබෙනවා. ඉන්දුනීසියාවේ ජනප්‍රිය ගායිකාවක් වෙන්න ලැබීම වාසනාවක්.
ඔබ මීට කලින් ඉන්දුනීසියාවට ගිහින් තියෙනවාද?
කිසිම දවසක ගිහින් නැහැ.
එහෙන් ආරාධනා ලැබෙන්නේ නැද්ද?
දැන් නම් නිතරම ලැබෙනවා. මටත් ආසයි එහේ ගිහින් ප්‍රේක්ෂකයන්ව දැකගන්න. කොරෝනා තත්ත්වය අවසන් වූ සැණින් ඉන්දුනීසියාවේ ප්‍රසංගයක් කරන්න සැලසුම් කරනවා. මොකද නිතරම ඔවුන් මට කතා කරලා කියන්නේ එහාට එන්න කියලා.
ඉහළ ප්‍රතිචාර ඔබේ ගීතයට ලැබෙනකොට එහි ප්‍රතිලාභ ලැබෙනවාද?
මම ලබන ලොකුම ප්‍රතිචාරය තමා රසිකයන්ගේ ආදරය. මිලියන ගාණක ආදරයක් මට ලැබිලා. මීට අමතරව මෙහි ආර්ථික ප්‍රතිලාභ ගැන මෙම ගීතය නිර්මාණය කරපු ආයතනයත් සමග කතාබහ කරනවා. හොඳ දෙයක් සිද්ධ වෙයි.
ඉදිරියට හොඳ ඉල්ලුමක් තියෙයි නේද?
ඉදිරියට කරන ගීත මගේම යූ ටියුබ් චැනල් එකක් හරහා ප්‍රචාරය කරනවා. ලැබෙන ප්‍රතිචාර අනුව නම් හොඳ ඉල්ලුමක් තියෙනවා.
ඉන්දුනීසියානු භාෂාවෙන් ගීතයක් කරන්න හිතෙන්නේ නැද්ද?
ඒ භාෂාව ගැන මට හරි දැනීමක් නැහැ. මේ දවස්වල මම ඒ භාෂාව ගැන අධ්‍යයනයක නිරත වෙනවා. භාෂාව ගැන හොඳ දැනුමක් අරගෙන ගීතයක් කරන්න ඕන. එතකොට ඊටත් වඩා මට ඔවුන්ට සමීප වෙන්න අවස්ථාව ලැබෙයි කියලා විශ්වාස කරනවා.
ඔවුන්ගේ තාලෙට ගැයෙන ගීතයට ලංකාවේ ප්‍රතිචාර කොහොමද?
ලංකාවේ ඒ ගීතයට හොඳ ප්‍රතිචාර තියෙනවා. ඒකෙත් අමුතු ලස්සනක් තියෙනවා.
ඔබේ මීළඟ ගීතය ලංකාවටද, ඉන්දුනීසියාවටද?
මම ගීත කරන්නේ ලංකාවේ මගේ රසිකයන්ට. හැබැයි ඕන කෙනෙක්ට අහන්න පුළුවන්. මේ සැරේ මම ස්ලෝ ට්‍රැක් එකක් කරන්න හිතාගෙන ඉන්නේ.
මේ දවස්වල කාලය ගතවෙන්නේ කොහොමද?
මම සංගීතයෙන්ම ජීවත් වුණු කෙනෙක්. මගේ මහත්තයට හොඳ රැකියාවක් තියෙනවා. ඒක නිසා මට ප්‍රශ්නයක් නැහැ. නමුත් මම උපයන මුදල මට ලැබෙන්නේ නැහැ. ඉතිරි කරගත්තු මුදලින් මම ප්‍රශ්නයක් නැතුව ජීවත් වෙනවා. නමුත් අපේ සහෝදර කලාකරුවන් ලොකු අමාරුවක වැටිලා ඉන්නේ කියලා දැනෙනකොට වේදනාවක් තියෙනවා. මම අවුරුද්දකින් විතර ප්‍රසංග වේදිකාවට ගොඩවෙලා නැහැ. තව අවුරුදු ගාණක් මෙහෙම ඉන්න වෙයි කියලා හිතෙනවා. මොනවා වුණත් සංගීතය අත් හරින්න නම් අදහසක් නැහැ. මොකද ලැබුණ හැම දෙයක්ම ලැබුණේ ගායිකාවක් වෙච්ච නිසා.
ක්‍රිශාන්ත පුෂ්පකුමාර