.jpg)
ඇය දක්ෂ නිරූපණ ශිල්පීනියක් මෙන්ම සුරූපී රංගන ශිල්පිනියකි. ප්‍රේක්ෂක ආදරේ දිනාගත් ආදරණීය චරිතයකි. රසික හදවත් වල අපූර්ව මතක රැන්දූ නිරූපණයෙන් ලොවක් මවිතයට පත්කල තැනැත්තියකි. නිවේදිකාවගේ භූමිකාව හරහා ද ඇයගේ හඬ පෞරුෂය අති ප්‍රබලය. ලාංකේය ජායාරූප කලාවටද ඒ වෙනස ගෙන එමින් නව හැඩ තල ශෛලීන් වලින් අරුතක් ගෙන ඒමට ද ඇය සමත් විය. රංගන ශිල්පිනියක් ලෙස නව මාවතක් කරා ගමන් කරන ඇයට ලැබෙන අභියෝගාත්මක ඕනෑම චරිතයකට සාධාරණයක් ඉටුකරයි. මේ දිනවල ඇගේ රංගනය ප්‍රේක්ෂකයා හමුවට ගෙන එන සිනමා සිත්තම වන 69 සිනමා පටය ගැන සරසවිය සමඟ කළ කතාබහයි.
නිරුපණ ශිල්පීනියකගේ භුමිකාවද ඔබ දුර ගමනක් රැගෙන ආවා නේද?
නිරූපණ ශිල්පිනියක් ලෙස ගමන ආරම්භ කරාට පසුවයි මේ සියලු දේවල්ම වෙනස් වුණේ. මම නිරූපණ ශිල්පිනියක් ලෙස ක්ෂේත්‍රයේ ප්‍රකට කළ දක්ෂතාවය නිසා මට විවිධ අවස්ථාවන් ලැබුණා ක්ෂේත්‍රයේ ඉදිරි ගමනක් එන්නට. ඒ නිසා මම කළ වෙළෙඳ දැන්වීම්වලින් ඉහළ ප්‍රතිචාර ලැබුණා. දිල්රුෆා කියන හඬ නිරූපණ ක්ෂේත්‍රයත් සමඟ නිතර අහන්නට ලැබුණා. කෑගල්ල වැනි ප්‍රදේශයක හැදිලා වැඩිලා. හිමින් ගමනක් එන කෙනෙක්. මේ මාවතේ බාධක කම්කටුළු මැඩගෙන ක්ෂේත්‍රයේ යා යුතු මඟ හොඳීන් තීරණය කර යන ගමනක් මට තිබෙන්නේ.
මේ දිනවල 69 ට ලැබෙන ප්‍රතිචාරය කොහොමද?
මේ වන විට 69 සිනමා පටයට ඉහළ ප්‍රතිචාර ලැබෙමින් පවතින්නේ. ඒ ලැබෙන සතුට රංගන ශිල්පිනියක ලබන ඉහළම ජනතා ප්‍රතිචාරය බවයි මා දකින්නේ. ඒ ලැබෙන ඉහළ ප්‍රතිචාරත් සමඟ විවිධ ප්‍රදේශවල ප්‍රේක්ෂකයන් ඩිල්රුෆා කියන්නේ කවුද කියලා හොයන්නට මේ වන විට උත්සාහ ගෙන තියෙනවා. ප්‍රේක්ෂකයන් සිනමා ශාලාවකට එන්නේ සතුටු වෙන්නයි. ඒ විනෝදාස්වාදය නැතිවුණ තැන සිනමාහලේදී ප්‍රේක්ෂකයා කොහෙත්ම ශාලාවේ ඉන්න උත්සාහ දරන්නේ නෑ. ඒ ප්‍රේක්ෂකයා හොයන සතුටට අපි 69 සැබෑ අරුතක් ගෙන ඒමින් ප්‍රේක්ෂකයන් ආදරයෙන් වැලඳ ගන්න තැනට හැට නවය සිනමා පටය පත් කළා.
සිනමාවේ ප්‍රධාන භූමිකාවකින් ප්‍රේක්ෂකයා අතරට එන පළමු වතාව නේද?
මීට ප්‍රථම උදයකාන්ත වර්ණසූරියගේ ගිනිමල් පොකුරු සිනමා පටයේ සුළු චරිතයක් රඟපාලා තිබුණත් ප්‍රධාන භූමිකාවක රංගනයේ යෙදෙන්නේ 69 සිනමා පටයයි. චූලක්ෂි රණතුංග තමයි එදා මම උදය කාන්ත අධ්‍යක්ෂකවරයා මාව හඳුන්වලා දුන්නේ. ඒ හඳුන්වා දීමෙන් පසු 69 සිනමාපටයට දායකත්වයක් දෙන්න ලැබුණා. එහි ස්තුතිය පුදකරනවා මාව මෙතනට යොමුකළ දිනෙෂ් සංජීවට. ඔහු එදා ඒ චරිතය මම උදාර පල්ලියගුරුට හඳුන්වා දුන්නේ නැත්නම් අද ප්‍රධාන භූමිකාවක රංගනයේ යෙදෙන්නට අවස්ථාව හිමිවන්නේ නැහැ. මම හිතන විදිහට ඒ මගේ පෙර වාසනාවකට ලැබුණු සිනමා පටයක් බවයි.
මේ ආපු ගමනට පවුලෙන් විරුද්ධ වුණා නේද?
මට රඟපාන්න ආසාව තිබුණා. රංගන ශිල්පිනියක් කියන වපසරියට වඩා මගේ වපසරිය තිබුණේ නිරූපිකාවක් ලෙස ඉදිරියට යාමයි. ඒ ලැබුණු පන්නරය හා විවිධ ආශාවන් ක්ෂේත්‍රයේ ඉදිරියට යාමට අවස්ථාව හිමි වුණා. මගේ පවුලේ අයගේ ආශාව තිබුණේ රංගනය පැත්තෙන් ඉදිරියට එනවා දකින්නට නොව රාජ්‍ය ආයතනයක රැකියාවක් කරන එකයි. කලාවට එන එක ගැන බලාපොරොත්තුවක් ඔවුන් තුළ කිසිසේත් තිබුණේ නෑ.
69 සිනමා පටය රඟපාන්න ලැබීම ගැන කොහොමද දැනෙන්නේ?
ක්ෂේත්‍රයට පිවිසිලා ඉතාම කෙටි කාලයකින් ප්‍රධාන භූමිකාවක් ලැබීම හරිම සතුටුයි. ජීවිතේ කීයෙන් කීදෙනාටද එවැනි අවස්ථාවක් හිමිවන්නේ. ඒ වටිනා අවස්ථාව භාග්‍යය මට හිමි වුණා. මම ලද පිනක් ලෙසයි මම හැමදාම සිතන්නේ. කලා ක්ෂේත්‍රයේ ඒ පූර්ණ ගෞරවය හිමිය යුත්තේ තිර පිටපත ලියපු තිර පිටපත් රචකයාට සහ අධ්‍යක්ෂකවරයාට සහ මට උදව් කළ සියලුම දෙනාට කියන එක මම හැම මොහොතම සඳහන් කරන්නේ හරිම ගෞරවාන්විත ලෙසයි. හරිම සුන්දර අත්දැකීමක් බවට මෙහි රූපගත කරන දර්ශන තලවල අවස්ථාව පත්වුණා.
69 සිනමා පටය මොන වගේ අත්දැකීම් ද ලැබූවේ?
සිනමා පටයේ එක් දර්ශනයක් තිබෙනවා වැඩිහිටි චරිතයට පණ පොවන ක්ලිටස් මෙන්ඩිස් මම හොරෙන් ට්‍රිප් එකක් ගොස් රාත්‍රිය ගත කිරීමට රාත්‍රී කඳවුරු බිමක ගත කරන අවස්ථාව මගේ ජීවිතයේ මම ලබපු හොඳම ප්‍රායෝගික අත්දැකීම බවට මේ පත්වුණා. සිනමා පටයට රංගනයෙන් දායක වන විට කිසිම අයුරකින් මම කඳවුරු බිමක ඉඳලා නැහැ. රංගනයෙන් හරි එවැනි අත්දැකීමක් ලබන්නට මෙම සිනමා පටය විශාල රුකුලක් වුණා. සැබෑ ජීවිතයෙත් මෙහෙම චරිත කොපමණ ඉන්නවාද ආදරය සෙනෙහස හොයන එවැනි චරිතයකට රඟපෑමෙන් හරි ආදරයක් දෙන්න ලැබීම ගැන මම සතුටු වුණා. මේ සිනමා පටය පුරා මට හොඳ අත්දැකීම් සම්භාරයක් ලැබුණා. ඒ සියලු දේවල් මිල මුදල් වලින් ගන්න පුළුවන් දේවල් නෙවෙයි.
ඔබ රඟපාන මේ චරිතය හරිම වෙනස් චරිතයක් කියලා ප්‍රේක්ෂකයන් කියනවා ඒ ගැන මොකද කියන්නේ?
ප්‍රේක්ෂකයා බලන කෝණය අනුව වෙනස් චරිතයක් බවට ඔවුන්ට දැක ගන්නට හැකියාව තිබෙන්න ඇති. සිනමා පටයක ගැහැනු චරිතයක් කියන්නේ වෙනස්, වෙනස් විධි සහ චරිත වලින් දකින්නට පුළුවන් ශිල්පිනියක් ලෙසයි. මම සැබෑ චරිතයෙන් ඇත්වෙලා රංගනයේ යෙදෙන්නේ. විශ්වවිද්‍යාලයේ කෙල්ලෙක්ගේ පිළිගත හැකි චරිතයක් ලෙස රංගනයේ නිරත වෙනවා ඇති. ආදරණීය චරිතයක් ලෙස රංගනයේ නිරත වීමම අද ප්‍රේක්ෂකාගාරය බලාපොරොත්තු වෙන්නේ. ආදරය අනුකම්පාව බලාපොරොත්තුව දහසකුත් පැතුමන් සමඟ බාධක කම්කටුලු මැඩගෙන ඉදිරියට පියවර තැබීමත් පොළොවේ පය ගහලා හැමවිටම ඇවිදින චරිතයක් ලෙස ඔවුන් දකිනවා ඇති. සැබෑ ලෝකයේ ද ගොඩක් දෙනකුගේ ජීවන රටාව එලෙසමයි. මේ පිටපත කියවද්දී මට හැමවෙලේම දැනුණේ ශක්තිමත්ව ආදරය දයාවෙන් පිරිමියකුට ගෙදරකදි තනිවෙන්න ඉඩනොදි උදව් කරන ආදරණීය චරිතයක් ලෙසයි.
69 කියන නමත් එක්ක එය මොන විදිහේ සිනමා පටයක්ද?
හැට නමය කියපුවාම ගොඩක් දෙනෙක් අදහස් කරනු ලබන්නේ වැඩිහිටියන්ට වඩාත් සුදුසු, ලේබලය යටතේ ලිංගිකත්වය ඉස්මතු කරන ඒ හරහා සමාජ ගත කරන්න දඟලන ප්‍රස්තුතයක් හා සම්බන්ධ චිත්‍රපටියක් ලෙසයි. ඒත් 69 සිනමාපටයෙන් ගෙනහැර දක්වන්නේ විශ්වවිද්‍යාලයේ අධ්‍යාපනය ලබන තරුණ ගැහැනු ළමයකු ආදරය අනුකම්පාව නැති වයස හැට ඉක්මවූ පිරිමියෙකු සමඟ පවත්වාගෙන යනු ලබන ප්‍රේම සම්බන්ධතාවයක්. ඒ තුළ පැන නගිනු ලබන පවුල් අභ්‍යන්තරය තුළ ප්‍රශ්න සහ සමාජයෙන් ඇති කරනු ලබන ප්‍රශ්න සහ ඔහු සහ ඇය එයට සෘජුවම මුහුණ දෙන ආකාරය සම්බන්ධවයි. අද සමාජයේ පවතින ප්‍රශ්නයක් සිනමාවේ දිගහැරෙන විට බොහෝවිට ඒ ගැන කතා කරන්නේ එයට මැදිවෙලා ඉන්න පිරිසයි. අද දරුවන් බූදලේ වෙනුවෙන් පොර කනවා ඇරෙන්න ඒ සියලු දෙනාට ආදරයෙන් සලකන්න ඔවුන්ව රැක බලා ගන්න මැදිහත් වෙන්නේ නැහැ. ඒ නිසා රහසිගත ඇසුරුවල් පවත්වාගෙන යන පිරිස් අද ඉන්නවා. බොහෝ දෙනකු කරනු ලබන්නේ ඔවුන්ගේ ගරුත්වය තියාගෙන විවිධ කණ්ඩායම් වශයෙන් එකතුවෙන අවස්ථාවලදී විවේචනය කරන එක පමණයි. ඒ සියලු දෙනාම සෘජුව ඒ ප්‍රශ්නයට මුහුණ දෙන්න බය නිසයි එහෙම කරන්නේ කියලයි මට හිතෙන්නේ.
ක්ලිටස් මෙන්ඩ්ස් 60 පැනපු පෙම්වතා වීම ගැන මොකද හිතුණේ?
ඔහු වැනි ප්‍රවීණයකු සමඟ 69 වැනි සිනමා පටයක රංගනයෙන් එකතු වීමත් මම ලද භාග්‍යයක්. ඒ සිනමා පටයේදී දැක්ක ආදරවන්තයා තවමත් ඔහු ආදරවන්තයෙක්. සිනමාවට පිවිසෙන ඕනෑම අලුත් රංගන ශිල්පියෙකුට ශිල්පිනියකට ඔහුගෙන් ලැබෙන ගුරුහරුකම් අගය කළ යුතුයි. මගේ ජීවිතේට මම ලද හොඳ අත්දැකීම් සම්භාරයක් ඔහුගෙන් සිනමාවේදී ලැබුණා. සිනමාවේදි චරිත නිරූපණය අපගේ හැසිරීම් රටාව සහ ප්‍රවීණයන් සමඟ ගනුදෙනු කිරීම ඔහු නිරතුරුවම වටහා දුන්නා. ඔහුගෙන් ලැබුණු උපදෙස් නිසා තමයි මට මේ චරිතය මේ ආකාරයෙන් හොඳට කරන්න ලැබුණේ. ප්‍රධාන නළුවා සහ නිළිය කියන දෙදෙනාගේ අන්‍යෝන්‍ය අවබෝධය නැති වුණොත් ඒ සිනමා පටය සාර්ථක වෙයිද කියලා මම දන්නේ නැහැ. ඒත් මේ සිනමාපටයේදී ඔහුගෙන් ලැබුණු දායකත්වය මම අගය කරනවා. එවැනි පෙම්වතුන් තරුණියකට හමුවෙනවා අඩුයි කියලයි මම හිතන්නේ.
වයස අවුරුදු හැටෙන් පස්සේ ගොඩක් දෙනෙක් තරුණ ගැහැනු ළමයින්ට ආදරේ කරන නිසා ද මේ නම යොදලා තියෙන්නේ?
එහෙම ප්‍රශ්නයක් නිසා නෙවේ මේ සිනමා පටයේ කතාව ගෙනෙන්නේ. වයස අවුරුදු හැටෙන් පස්සේ ගොඩක් දෙනා ආදරේ කියන එක අමතක කරලා සාම්ප්‍රදායික ජීවිතේට හුරු වෙනවා. ඒ වගේම තමයි සාම්ප්‍රදායික ජීවිතයට හුරු නොවී වයස අවුරුදු හැට ඉක්මවූ පසුවත් ආදරය කරන අය ගැන සමාජය දකින්නේ වැරදි අදහසකින්. වයස ඉක්මවූ පසුවත් ඕනෑම කෙනෙකුට ආදරය කරන්න අයිතියක් තියෙනවා වගේම, ප්‍රීතිමත් ලිංගික ජීවිතයක් ගත කරන්නත් පුළුවන් කියන පදනම මත හිඳගෙන තමයි තිරරචනයේදී සහ අධ්‍යක්ෂණය සහ නිෂ්පාදක කරලා තියෙන්නේ.
ඔබ අදහස් කරන්නේ තරුණ පිරිස් වයසින් වැඩි ගැහැනු, පිරිමි දෙපක්ෂයටම ප්‍රේම කරන එක හොඳයි කියන මතයද?
ආදරයට දිගක් සහ පළලක් නැහැ. ආදරයට වයසකුත් නැහැ. ඕනෑම කෙනෙකුට ඕනෑම වයසකදී ආදරය කරන්න පුළුවන්. හැබැයි ඒ ගැන සමාජය දකින කෝණවල් වෙනස් කරන්න අපිට බැහැ. සමාජයේ විවිධ ප්‍රශ්න දකින හොඳ නරක විග්‍රහ කර කර ඒ මත ජීවත්වනවාට වැඩිය තමාගේ මතය තුළ ජීවත් වෙන එක තමයි අද හොඳම දේ කියලයි මම හිතන්නේ. සමාජයට අනුගත වෙලා ප්‍රේම සම්බන්ධතා පැවැත්විය යුතුයි කියලා තීරණය කරන්න කාටවත් අයිතියක් නැහැ. ප්‍රේමය කාටවත් බලෙන් ගන්නත් බැහැ බලෙන් ලබා ගන්නත් බැහැ කියන එක අවබෝධ කරගත යුතුයි කියලයි මම හිතන්නේ. ගොඩක් පිරිමි සහ ගැහැනු ලිංගිකත්වයට නෙවේ ආදරේ කරන්නේ ආදරයටයි. ලිංගිකත්වය සොයන බොහෝ දෙනා තව කෙනෙකුගේ වැරදි මත අනිකාට බොරු ආදරයක් පෙන්වා දීලයි ළං වන්න දඟලන්නේ. ඒත් අවබෝධයෙන් සිටින පිරිස් සමාජයේ ඔවුන්ව තේරුම් ගන්නවා මොකටද මේ එන්නේ කියන එක.
සැබෑ ජීවිතයේ ඔබට 69 යේ වැනි පෙම්වතෙක් හමුවුණොත්?
මම කවදාකවත් කියන්නේ නැහැ පෙම්වතියක් වෙලා ඉඳලා නැහැ කියලා. ආදරයට ප්‍රේමයට කාලවකවානුවක් තියෙනවා. ඒ තුළ මටත් ලස්සන ජීවිතයක් තිබුණා. අපි ආදරයට ආදරේ කරනවා ප්‍රේමයට ප්‍රේමය කරනවා. ඒක ඕනෑම මනුෂ්‍ය කොට්ඨාසයකටත් සත්ව කොට්ඨාශයටත් උරුමයි. ඒත් මම තවමත් ජීවිතේ හොඳ අවබෝධයෙන් කටයුතු කරන්නේ. ප්‍රේමය කියන්නේ අවබෝධයෙන් කළ යුතු දෙයකි. අවබෝධයක් තිබෙන කෙනෙකු ඉස්සරහට මුණගැහුණොත් ආදරේ, ප්‍රේමය දෙකම දෙනව එක ලෙස. දැන් මම ප්‍රේමයේ විදින කෙනෙක් නෙවෙයි. ජීවිතය හරිම සැහැල්ලුවෙන් ගෙවන කෙනෙක්. සමහරවිට හිත කියන එක ඕනෑම මොහොතක වෙනස් වෙන්න පුළුවන්. එහෙම අවස්ථාවක් උදාවුණොත් ආදරේ කරන්නත් පුළුවන් එවැනි කෙනෙකුට. ප්‍රේමයට ආදරයට වයස් පරතරයක් නැහැ කවදාකවත්.
කලාවත් එක්ක ගෙවන ජීවිතය දැනෙන්නේ කොහොමද ඔබට දැන්?
කලාවත් එක්ක මම ගෙවන ජීවිතය හරිම සුන්දරයි. අවුරුදු ගණනාවක් රාජ්‍ය හා පෞද්ගලික ආයතන සමඟම වැඩ කරලා ඉවත් වෙලා මගේම කියලා ව්‍යාපාර කටයුත්තකුත් කර ගනිමින් කලාව සමඟ ජීවිතය ගෙවන්නට තීරණය කළේ. කලාකරුවකුට තම ජොබ් එක කරන එක ගැන සතුටු වෙන්න පුළුවන්. සාපේක්ෂව අද වෙනත් රැකියා වලට වඩා ආත්ම තෘප්තියක් තිබෙනවා කියලා කියන්න පුළුවන්. නිරූපණය, රංගනය හා නිවේදනය, අතින් හිමින් ගමනක් යන ගමන් එහි අස්සක් මුල්ලක් නෑරම එහි තොරතුරු හොයමින් අධ්‍යයනය කරන්නටයි මම හැම මොහොතම නිරතුරුවම උත්සාහ දරන්නේ. කාටත් ප්‍රශ්නයක් නොවි සතුටින් ජීවිතය ගෙවන්නයි.
ආපු ගමනේදී විවිධ ක්ෂේත්‍රවල ප්‍රශ්නවලට මුහුණ දුන්නේ නැද්ද?
මේ වෙන තෙක් මම ආපු ගමනේදී කවුරුත් කියන කරන දේවල් මම ගණන් ගන්නේ නෑ. ඒත් ක්ෂේත්‍රයේ විවිධ කටකතා පැතුරුවන එක නවත්තන්නටත් අමාරුයි. ගොඩක් දෙනෙක් අද කරන්නේ ඒ කියන දේවල් අහගෙන වැරැදි දේවල් හිතේ මවාගන්න එක පමණයි. මේ දක්වා මම නම් කරන්නේ මගේ ගෞරවයත් වෘත්තීය ගෞරවයක් රැකගෙන හිමින් ගමනක් යාම පමණයි. ඒ නිසා මම ආපු ගමනේදී මට සතුටු වෙන්න තැන් අද ගොඩක් තියෙනවා. මම ඕනෑම කෙනෙකුට උදව් උපකාර කරනවා කියන එක පමණයි මම දන්නේ.
සමාජ මාධ්‍ය ජාලා සමග ඔබේ චරිතය මොන විදිහද ?
නිරුපණ ක්ෂේත්‍රයත් එක්ක තමයි මම සමාජ මාධ්‍ය පරිශීලනයට ටිකක් නැඹුරු තාවයක් දැක්වේ. ලොකුවට මගේ නිර්මාණකරණය සමාජ මාධ්‍ය හරහා ප්‍රචලිත කිරීමට මට කිසිසේත් වුවමනාවක් තිබුණේ නැහැ. නමුත් මේ දුවන රැල්ලත් එක්ක සමාජ මාධ්‍ය පරිශීලනය හා නිරතවීම මට අවශ්‍ය ආකාරයට මගේ සිමාවේ පමණක් මම නිරත වීමට උත්සාහ ගන්නවා. මෙහිදී හොඳ සහ නරක දෙකම එකලෙස ලැබෙනවා. නිරූපණ ශිල්පිනියක්, රංගන ශිල්පිනියක් ඒ සියල්ල එක ලෙස භුක්ති විඳීමට බලාපොරොත්තුවෙන්ද සිටිය යුතුයි. අපේ යම් නිර්මාණයක් ප්‍රේක්ෂකයාට ක්ෂණිකව ළඟා කිරීමේ හැකියාව හා ප්‍රතිචාර සෘජුව දැනගැනිමට අද ලැබෙන්නේ සමාජ මාධ්‍ය ජාලා හරහායි. එනිසා එහි දිසානු ගතව හොඳ ගමනක් යාමට නම් ඔහු හෝ ඇය තීරණය කළ යුතු වෙනවා. මේ වන විට කුමන හෝ අපි යම් නිර්මාණයකට දායක විමේදි ඒ නිර්මාණයෙන් සියලුම දේවල් ප්‍රකාශ කිරීමට හා ඉදිරිපත් කිරීමට හැකියාවක් නැති අවස්ථාවල හොඳ මාධ්‍යයක් ලෙස සමාජ මාධ්‍ය පරිශීලනය කළ හැකි යාව මේ වන විට උදා වෙලා තිබෙනවා. ඒත් මේ වන විට විවිධ පුද්ගලයන් එය දකින්නේ වැරදි කෝණයකින් බවයි මම දකින්නේ. අද රසවින්දනාත්මක බවක් නැති පිරිසක් එක්ක සමාජ මාධ්‍ය හැසිරවීමත් අමාරුයි.
2025 වර්ෂයේ ඔබ සිනමාවට වැඩි ඉඩක් වෙන් කරලද?
මම පළමුවෙන්ම ප්‍රධාන චරිතයක රංගනයෙන් දායක වන්නේ සිනමාපටයක් ලෙස 69 සිනමා පටයටයි. මෙම සිනමා පටයද මගේ ජීවිතේ සුවිශේෂීම සන්ධිස්ථානයක් බවට පත් වෙයි කියලා සඳහන් කරන්න පුළුවන්. වෙනස්ම ආකාරයේ කතා තේමාවක්. 2025 වර්ෂය කියන්නේ ජීවිතයේ මම තිබ්බ ලොකු පියවරක් විදිහට හඳුන්වන්න පුළුවන්. සිනමාව සහ රංගනය කියන විෂය පථයේ අත්දැකීම් සම්භාරයක් ලබන්නට පුළුවන් වුණා. රංගනය කියන විෂය තුළ මගේ අඩුපාඩු, වැරදිම් ගොඩක් හඳුනාගන්නටත් ලැබුණා. මගේ ජීවිතේ මේ වසරේ විශේෂ හැරවුම් ලක්ෂ්‍යයක් බවට පත්වන බව නිසැකයි. අලුතින් තිරගතවීමට නියමිත ට්ඪඨධතධ සිනමාපටයද මේ වසරේ දැක ගන්න පුළුවන් වෙනවා. එය අලුත්ම අත්දැකීමක් වෙනවා. මේ ගමන එන්න මට උදව් කළ සියලු දෙනාටම මෙය අවස්ථාවක් කර ගන්නවා ස්තුති කරන්න. පසුගිය කාලේ සිදුවුණ ඒ අඩුපාඩු නිවැරදි කරගෙන අත්දැකීම් එක්ක සිනමා ක්ෂේත්‍රයේ ඉදිරියට යන්න මගේ බලාපොරොත්තුවයි.
.png)