ඇහි පිල්ලමක් යට ටෙලි නාට්‍යය මතකද? ඒ ටෙලි නාට්‍යයේ අශ්වයෙක්ගෙ පිටේ නැඟලා අශ්ව කුර ගැටෙන හඬ විහිදුවමින් වේගයෙන් එහා මෙහා ගිය ෆුට් බෝල් ගහන කොලුවව මතකද? ඒ කොලුවගෙ නම හිරු. ඒ හිරු තමයි අද අපේ කතා නායකයා. ඔහු සිනාමාව මෙන්ම ටෙලි නාට්‍ය කලාව තුළත් තම රංගන පෞරුෂය විදහා දැක්වූ රංගන ශිල්පියෙක්. මේ දවස්වල කෝලම් කුට්ටමේ රන්මුතු නිසා මේ රංගන ශිල්පියා ගැන බොහෝදෙනා කතා කරන්න අරගෙන. අද වන්නේ ප්‍රවීණ රංගන ශිල්පී නිනෝ අරලිය ජයකොඩි.
මේ දවස් ගෙවී යන්නේ කොහොමද?
මේ දවස්වල කෝලම් කුට්ටම ටෙලි නාට්‍යයේ රූගත කිරීම්වලට සහභාගි වෙනවා. ඒ වගේම සංසාරිණි ටෙලි නාට්‍යයේ රූගත කිරීම්වලටත් සහභාගි වෙනවා. මේ නාට්‍ය දෙකටම සහභාගි වෙන අතරතුර තවත් නාට්‍යයකට ආරාධනාවක් ලැබුණා. නමුත් එම නාට්‍යයේ නම් රූගත කිරීම් තවමත් ආරම්භ වුණේ නැහැ.
මෙගා ටෙලි නාට්‍යයකට සම්බන්ධවීම රංගන ශිල්පියෙක්ට බලපාන්නෙ කවර අයුරින්ද?
මෙගා ටෙලි නාට්‍යය කියන දෙය ආරම්භ වුණේ මෑත කාලයේ. ඉස්සර අපිට තිබුණෙ එක නාළිකාවයි. එක නාට්‍යයක් මේ අඟහරුවාදා 8.30ට බැලුවා නම් අපිට ඊළඟ කොටස නරඹන්න ඊළඟ සතිය වෙන කල් බලා ඉන්න සිදු වුණා. අද අපිට නාට්‍යයක් බලන්න එහෙම බලන් ඉන්න ඕනෙ නැහැ. මේ නාට්‍ය කලාව ඇතැමුන් එක එක විධියට අර්ථ කථනය කරනවා. මෙගා නාට්‍ය කියන්නෙ මුදල් උපයන්න පුළුවන් හොඳ ක්‍රමයක්. හොඳ හෝ නරක දෙයක් පෙන්නලා ඒ විධියට සල්ලි උපයන්න පුළුවන්. නාළිකාවල සිටින පුද්ගලයන්ගෙ වුවමනාව මත තමයි නාට්‍ය අපිට ප්‍රේක්ෂකයා වෙත ලබා දෙන්න සිදු වන්නෙ. අපි ප්‍රේක්ෂකයාට ලබා දෙන නාට්‍යය සියයට සියයක් ඔහු කැමැති, ඔහු ඉල්ලා සිටින දේ නාට්‍ය කියලා කියන්න අමාරුයි. අපි ප්‍රේක්ෂකයා ඉල්ලා සිටින දෙන්න ඕන. එහෙම නොවනවා නම් ඒක කොපමණ හොඳද නරකද කියලා අපි සිතන්න ඕන. අපිට ඇතැම් නාළිකාවල පෙන්නන නිර්මාණ බලන්නවත් බැහැ. සමහර දේවල් බලන්න පුළුවන්.
නිනෝ අරලියට කෝලම් කුට්ටමේ රන්මුතු ගැන මොකද හිතෙන්නෙ?
මම කෝලම් කුට්ටමේ රන්මුතු කියන චරිතයට හරිම ආසයි. මට කාලයකට පසුව හොඳට අත දිග ඇරලා රඟපාන්න පුළුවන් චරිතයක් ලැබුණා කියලා සිතෙනවා. මට එම චරිතය තුළ මගේ අනන්‍යතාව හොඳින් රැකගෙන රඟ දක්වන්න පුළුවන්. රන්මුතු කියන්නෙ හොඳ කැරැක්ටර් එකක් නම් නෙවෙයි. අපි කෙනෙක්ගෙන් හොඳ වගේම නරකත් ගන්න ඕන. මිනිස්සු එහෙමනේ. මම මගේ දිවියේ රඟපාපු චරිත අතරින් සමස්තයක් ලෙස රන්මුතුට කැමැතියි.
සද්ධා මංගල සූරියබණ්ඩාර සහ ජයප්‍රකාශ් සිවගුරුනාදන් කියන විශිෂ්ට සුසංයෝගය සමඟ කටයුතු කිරීමට ලැබීම ඔබට මොනවගේ අත්දැකීමක්ද?
සද්ධා අයියව මට මුලින්ම මුණගැහෙන්නෙ 2014දී. CSN Battle Zone කියන වැඩසටහනට මම ඔහු සමඟ සම්බන්ධ වුණා. ඒක ගොඩක් රියැලිටි ප්‍රෝග්‍රෑම්ස් ආපු කාලයක්. අපි වැඩ කරන්න ගන්නෙ අන්න එහෙම. පසුකලීනව ඔහු මට මේ නිර්මාණයට එන්න කියලා කතා කළා. මට රන්මුතු කියන චරිතය හමුවෙන්නෙ එහෙම. සිවා අයියා ගැන මම අහලා තිබුණාට මට ඔහු සමඟ වැඩ කරන්න හම්බ වුණේ පළමු වතාවට. සිවා අයියා ගැන මට මුලින්ම කිව්වෙ සත්‍යජිත් මාඉටිපේ. ඔහුත් සමඟ වැඩ කරන්න ලැබීම සතුටට කරුණක්. ඔහු මම වැඩ කරන්න කැමැති වගේම ආස කරන අධ්‍යක්ෂවරයෙක්.
මෑත කාලීනව අපි දකිනවා රංගන ශිල්පීන් බොහෝ ප්‍රමාණයක් අධ්‍යක්ෂ කටයුතු සිදු කරනවා. නිනෝ අරලිය අධ්‍යක්ෂවරයෙක් වෙන්න කැමැති නැද්ද?
ඇත්තටම නව නිර්මාණකරුවන් නව නිර්මාණ සිදු කරන එක ඉතා හොඳ දෙයක්. අපි එම නිර්මාණ අගය කරන්න ඕන. හොඳ දෙය දකිනවා වගේම කරන්නම්වාලෙ වැඩ කරන එක විවේචනය කරන්නත් ඕන. මට තවම අධ්‍යක්ෂවරයෙක් වෙන්න හිතිලා නැහැ. මගේ අදහස මම තව මේ විෂය හදාරන්න ඕන කියන එක. අධ්‍යක්ෂවරයෙක් වීමට පෙර රංගන ශිල්පියෙක් වෙන එකෙන් අපිට විශාල පුහුණුවක් ලැබෙනවා. දැනට මම අධ්‍යක්ෂවරයෙක් වෙනවාට වඩා රංගනය තුළ තිබෙන පරාසයන් හ¾දුනා ගත යුතු වෙනවා කියා සිතනවා.
රංගන ශිල්පියෙක් වාණිජ සහ කලාත්මක යන දහරාවන් දෙකෙහිම වැඩ කළ යුතුද?
මම රංගන ශිල්පියෙක් ලෙස මගේ දිවිය ආරම්භ කළේ වෙළෙඳ දැන්වීමකින්. වෙළෙඳ දැන්වීම් තුළින් යම්කිසි මුදලක් අපිට උපයන්න පුළුවන්. ඒක අපිට ආර්ථිකමය වශයෙන් අපිව ශක්තිමත් කරනවා. ඒක පැවැත්ම සඳහා වැදගත් වෙනවා. මේ දහරාවන් දෙක තුළම අපි වැඩ කළ යුතු වෙනවා. ඇතැමුන් මට කියා තිබෙනවා මම සිනමාව තුළ විතරයි වැඩ කරන්නෙ අනෙක් කලා මාධ්‍ය සමඟ වැඩ කරන්නෙ නැහැ කියලා. ඒත් මම දැක තිබෙනවා ඔවුන් එම මාධ්‍යයන් තුළ වැඩ කරනවා. මම වේදිකා නාට්‍යයක් වේවා, ටෙලි නාට්‍යයක් වේවා, වෙළෙඳ දැන්වීමක් වේවා, කෙටි චිත්‍රපටයක් හෝ චිත්‍රපටයක් වේවා මේ සෑම මාධ්‍යයකටම මගේ උපරිම දායකත්වය ලබා දෙනවා. මම මේකට මගේ රංගනයෙන් මෙච්චරයි දෙන්නෙ අරකට මගේ රංගනයෙන් මෙච්චරයි දෙන්නෙ කියලා කොටස් කොටස්වලට බෙදා ගෙන වැඩ කරන්නෙ නැහැ. මම මගේ දායකත්වය උපරිමයෙන් ලබා දෙනවා වගේම මගේ වටිනාකමට සරිලන මුදලකුත් ඉල්ලා සිටිනවා. මම එහෙම මේ දේවල් බෙදන කෙනෙක් නෙවෙයි.
නිනෝඅරලිය කාලයක් නිහඬව සිටියෙ ක්ෂේත්‍රය පිළිබඳව කලකිරීමෙන්ද?
ක්ෂේත්‍රය පිළිබඳව කලකිරීමක් තිබෙනවා නම් මම මේ ක්ෂේත්‍රය තුළ රැඳී සිටින්නෙ නැහැනේ. මම මේ ක්ෂේත්‍රයට ගොඩක් ආදරය කරන කෙනෙක්. මම මේ ක්ෂේත්‍රය දාලා යන්නෙ නැහැ. ඒකෙන් අදහස් වෙන්නෙ නැහැ මේක ඇතුළෙ මැරෙන කල්ම ඉන්නවා කියන එක. මට පුළුවන් කාලෙ කරන්න පුළුවන් හැමදේම කරන්න මම කැපවීමෙන් කටයුතු කරනවා. මට මේ ක්ෂේත්‍රයෙන් මුදල් උපයන්න නොහැකි වුණොත් මගේ උත්සාහයෙන් මට මුදල් උපයන්න පුළුවන් ක්‍රමයක් මම හදාගෙන තිබෙනවා. මට චිත්‍ර ඇඳීමේ හැකියාවක් තිබෙනවා. මට යම් චිත්‍රයක් ඇඳලා ඒකෙන් යම් මුදලක් උපයන්න පුළුවන්. මම උසස් පෙළට චිත්‍ර විෂය හදාරපු කෙනෙක්. මට මගේ චිත්‍ර කලාව තුළින් යම් වැඩක් ගන්න පුළුවන්. දැන් මම ඒ සඳහා වෙහෙස මහන්සි වෙනවා. මම මුල සිට මේ විෂය යළිත් හදාරනවා. මම කැමැතිම චිත්‍ර ශිල්පියෙක් තමයි සෝලියස් මැන්දිස් කියන්නෙ. මම චිත්‍රකලා ඉතිහාසය පිළිබඳවත් මේ දිනවල හදාරනවා.
ගිහාන් සචින්ත