මේක දෙවියෝ දීපු වරමක් - කිරාන් ජී. සොයිසා

මේ දිනවල හිරු ටී.වී නාලිකාවේ විකාශය වන ”‍රැල්ල වෙරළට ආදරෙයි”‍ නාට්‍යයේ බන්ටිගේ චරිතයෙන් ප්‍රේක්ෂකයින්ගේ ආදරය දිනාගෙන සිටින රංගන ශිල්පියෙක් තමයි කිරාන් ජී. සොයිසා (Kiraan G. Soysa) කියන්නේ. ඒ වගේම ඔහු රූපලාවණ්‍ය ක්ෂේත්‍රයේ ප්‍රවීණයෙකු ලෙස හඳුන්වන්න පුළුවන්. ඔහුගේ කලා ලොව තොරතුරු ගැන මේ විිදයට කිරන් පුවත්පතක් සමගින් පවසා තිබුනා.

මේ දවස්වල මොකද වෙන්නේ?

පසුගිය කාලයේ ඇති වූ කොවිඩ් වසංගත තත්ත්වය නිසා විවාහ මංගල කටයුතු නතර වුණානේ. ඉන් පසු රට යථා තත්ත්වයට පත්වීමත් එක්ක දැන් බොහෝ වෙලාවට මගේ රූපලාවණ්‍යගාරයේ වැඩකටයුතු කරගෙන තමයි ඉන්නේ.

කලාවට සම්බන්ධ වෙන්නේ කොහොමද?

ටෙලිනාට්‍ය, චිත්‍රපට, රූපවාහිනි වෙළෙඳ දැන්වීම් හා මියුසික් වීඩියෝවල අවුරුදු විස්සක් පමණ වේෂ නිරූපණ ශිල්පියෙක් විදිහට වැඩකරලා තියෙනවා. ඒ හරහා මට බොහෝ දෙනා හඳුනා ගැනීමට අවස්ථාව ලැබුණා. මුලින්ම රංගනයට සම්බන්ධ වෙන්නේ වේදිකා නාට්‍ය හරහායි. ටෙනිසන් කුරේ මහතා නිෂ්පාදනය අධ්‍යක්ෂණය කරපු කැප්ටන් කූල්, ලා රෝසා වගේ වේදිකා නාට්‍ය කිහිපයක රඟපෑවා. වේදිකාවෙන් ලබපු ආභාෂය එක්ක තමයි ටෙලිනාට්‍ය හා චිත්‍රපටවලට සම්බන්ධ වෙන්නේ.

රැල්ල වෙරළට ආදරෙයි නාට්‍යයේ බන්ටිගේ චරිතයට අවස්ථාව ලැබුණේ කොහොමද?

රැල්ල වෙරළට ආදරෙයි නාට්‍යයේ අධ්‍යක්ෂ නිවන්ත ප්‍රසාර බොහෝ කල් සිට මා හඳුනන කෙනෙක්. ඔහුගේ ඊට කලින් නිර්මාණයන්ටත් මම සම්බන්ධ වෙලා තියෙනවා. ඒ හරහා තමයි සැලු‍න් එකක චරිතයක් තියෙනවා කියලා මට ආරාධනා ලැබුණේ.

ඔබට චරිතය තාත්වික ලෙස කිරීමට යම් කිසි අධ්‍යයනයක් කිරීමට සිදු වුවා ද නැත්නම් එය ඔබේ සැබෑ ස්වභාවයද?

මම වෘත්තීය රූපලාවණ්‍ය ශිල්පියෙක්. සැලු‍න් එකක් තුළ තියෙන වැඩකටයුතුවලට හැඩගැසෙන්නට අලු‍තින් පන්නරයක් අවශ්‍ය වුණේ නැහැ. මට චරිතය ගොඩනඟා ගැනීමට මෙහෙය වීමට අධ්‍යක්ෂතුමා ලොකු පිටිවහලක් වුණා. මට ජීවිතයේ රඟපාන්න ලැබුණේ පරිණත ප්‍රවීණ නළු නිළියන් සමඟයි. ඉතින් ඔවුන් සමඟ රඟපානකොට ඒක මට චරිතයේ සාර්ථකත්වයට ලොකු පහසුවක් වුණා. ඔවුන්ගෙන් ලැබෙන සහය ප්‍රබලයි. දර්ශන තලයකට ගියහම මට නුහුරු බවක් තේරෙන්නේ නැහැ. මොකද මම මේක සෙල්ලම් කරපු පිට්ටනිය වගේනේ.

ඔබේ චරිතයට විවේචන එල්ල වෙනවාද?

මට ලැබෙන්නේ ගොඩක් හාස්‍ය උත්පාදක චරිතනේ. නමුත් මගේ මිනිස්සු මට ආදරෙයි. මේ චරිතය නපුංසක චරිතයක් වගේ දැක්කාට හරිම ආසාවෙන් මම ඉන්න නිසාම නාට්‍ය බලන පිරිසක් ඉන්නවා. මගේ පෙනුම විලාසය එක්ක ඒ චරිතය නිරූපණයේදී ඉතා ඉක්මනින් ප්‍රේක්ෂකයන් මාව වැලඳ ගන්නවා. පාරේ තොටේදී වත් ප්‍රේක්ෂකයින් නරක විදිහේ වචනයක් කියලා නැහැ.

පවුලේ අයගෙන් කලා කටයුතුවලට ලැබෙන සහයෝගය?

අපේ පවුල්වල අය සමාජය හා ලෝකය ගැන වැටහීමක් තියෙන ඉතා බුද්ධිමත් අය. ඒ අය කවදාවත් නීති දාලා කොටු කරලා නැහැ. නමුත් කලාවට සම්බන්ධ වෙන්න කියලා ඊට යොමු කරන්න තරම් කැමැත්තක් තිබුණෙත් නැහැ. ඕන කෙනෙක්ට තමන් කැමති දෙයක් තෝරා ගැනීමේ නිදහස තියෙනවා. ඒ නිදහස මගේ පවුලේ අයගෙන් ලැබුණා.

ඔයා පෙම්වතෙක් ද?

මට ගොඩක් ගැහැනු හා පිරිමි යාළුවන් ඉන්නවා. ඉතින් මම ප්‍රේමවන්තයෙක්.

මෙතෙක් දායක වූ කලා නිර්මාණවල නිරූපණය කළ චරිත ගැන සතුටුයි ද?

අපි යම් කිසි නිර්මාණයක් කළාට පසුව ඒ චරිතයට ඊට වඩා දෙයක් කරන්න තිබුණා නම් කියන එක හිතිලා තියෙනවා. යම් අවස්ථාවලදී සමහර අධ්‍යක්ෂවරු ඕවර් ඇක්ටින්වලට යොමු කරන්න උත්සාහ කරනවා. නමුත් මම ඊට වැඩි කැමැත්තක් නැහැ. එහෙම කරලා අපි කවුද කියලා පෙන්නුම් කරන්න අවශ්‍ය නැහැනේ. ඉතින් ලැබුණු කලා නිර්මාණවල කරපු චරිත ගැන තෘප්තිමත් වෙනවා.

ඔබට ආදරය කරන ප්‍රේක්ෂකයන්ට මොනවද කියන්න තියෙන්නේ?

යම්කිසි කෙනෙක් කරන චරිතය දිහා බලලාවත් හැසිරීම් රටාව ගැන බලලාවත් ඇය ගැන හෝ ඔහු ගැනඒ මිම්මෙන් මනින්නෙපා. මට නම් කවදාවත් කිසිවෙක් වරදක් කියලා නැහැ. එයාලා ගොඩක් මට ආදරේ වගේම මාත් ඔවුන්ගේ ඒ ආදරයට ආදරෙයි.

මේ ආ ගමන් මග ගැන අවසාන වශයෙන් කියන්න යමක් ඇති?

මම ගොඩක් තෘප්තිමත්. වෘත්තිය කුමක් වූවත් ඉතාමත් දුක් මහන්සියෙන් තමයි වෘත්තියට අවතීර්ණ වෙන්නේ. අපට අඩුපාඩුකම් තිබුණා කියලා ඕනැම වෘත්තියකදී රටේ ලෝකේ මිනිසුන්ට බැනල වැඩක් නැහැ. උත්සාහයෙන් ජයග්‍රහණය කළ යුතුයි. කිසිවෙක්ට අත පාන්නේ නැති අය තමයි රූපලාවණ්‍ය ශිල්පීන් කියන්නේ. මේ කලාව හැමෝටම පිහිටන්නේ නැහැ. මේක දෙවියන් දීපු වරමක්.‍ රංගනයට මම දෙන්නේ දෙවෙනි තැන. මම රංගනය වෘත්තියක් කරගන්න කෙනෙක් නෙවෙයි. මම කරපු ටෙලිනාට්‍ය කිහිපයක්ම ඉදිරියට විකාශය වීමට නියමිතයි.

-ස්ටෙෆනි කොතලාවල