‘දේදුනු ආකාසේ’ සිනමා සිත්තම ආදරයෙන් වැලඳගත්ත ප්‍රේක්ෂකයන්ට හැඩකාර, කටකාර විසේකාර පවනිගේ චරිතය තවමත් මතක තියනවාට සැකයක් නැහැ. දේදුනු ආකාසේ චිත්‍රපටය තිරගත වුණු මුල් දවස්වල වගේම අදටත් බොහෝ දෙනෙක් පවනි ගැන වගේම පවනිගේ චරිතයට පණ දුන්න දඟකාරිය ගැනත් කතා වෙනවා.. නිරූපිකාවක් විදියට තමන්ගේ ගමන ආරම්භ කළ අද ජනප්‍රිය රංගන ශිල්පිනියක් වන ඇය නමින් ටීනා ෂනෙල්.
බොහෝ දෙනෙක්ට ටීනා කියන්නේ නුහුරු නමක්වත්, චරිතයක්වත් නෙවෙයි. වැඩි දෙනෙක් ඇයව මුලින්ම හඳුනාගත්තේ නිරූපණ ශිල්පිනියක් සහ නර්තන ශිල්පිනියක් විදියට. ලංකාවේ ඉන්න සරාගීතම නිරූපණ ශිල්පිනියන් අතර ටීනාගේ නමත් සඳහන් වෙලා තියෙනවා කියලා අදටත් බොහෝ දෙනෙක් කියනවා. ඇය ගැන විවිධ කතා සමාජ මාධ්‍ය තුළ පැතිරුණා. ඇය අඳින පලඳින විදියට, කතාබහ කරන විදියට පවා එක දිගට කතා හැදුණ කාලයකුත් තිබුණා. නමුත් ඒ කටකතාවලට තමන්ගේ ගමන නතර කරන්න බැරි වුණා කියලා ටීනා කිව්වේ ආඩම්බරය මුසුවූ සතුටකින් කියලා මට හිතුණා.අද වෙද්දි නිරූපණ ශිල්පිනියක්, නර්තන ශිල්පිනියක් වගේම ටෙලි නාට්‍ය රංගන ශිල්පිනියක් විදිහටත් ටීනාට ලැබෙන්නේ ඉහළ ප්‍රේක්ෂක ප්‍රතිචාරයක්. නිරූපණ ශිල්පිනියක් වුණු ටීනා රංගන ශිල්පිනියක් දක්වා ආ ගමන් මග ගැන මේ විදියට අතීතය ආවර්ජනය කළා.
“මම ක්ෂේත්‍රයට ආවේ නිරූපණය හරහා. බොහෝ අවස්ථාවල මගේ නිරූපණයන්ට ඉහළ ප්‍රේක්ෂක ප්‍රතිචාර ලැබුණා. ඇතැම් විලාසිතාවලට එක් කොටසක් දෝෂාරෝපණය කළත් නිරූපණ ශිල්පිනියක් විදිහට මාව සහ මගේ හැකියාවන් දක්ෂතාවන් බොහෝ දෙනෙක්ගේ අගය කිරීමට ලක් වුණා. ලංකාවේ සංස්කෘතික වටපිටාවත් එක්ක සමහර අවස්ථාවල නිරූපණ ශිල්පීන් ශිල්පිනියන්ට විවිධ දෝෂාරෝපණය එල්ල වෙනවා. නමුත් පිටරටවල එවැනි තත්ත්වයක් නැහැ. කොහොම වුණත් නිරූපණ ක්ෂේත්‍රයේදී මට ලැබුණ අත්දැකීම් මගේ රංගන ජීවිතයටත් ලොකු හයියක් වුණා කියලා මම විශ්වාස කරනවා.
නිරූපණ කටයුතු අතරතුර ශිහාන් මිහිරංග, ෂේන් සිං, සනුක, තීක්ෂණ අනුරාධ, දිනේෂ්, හෙක්‍ටර් ඩයස් වගේ හොඳම නිර්මාණකරුවන්ගේ මියුසික් වීඩියෝවල රඟපාන්නත් අවස්ථාව ලැබුණා. නමුත් මගේ රංගන ජීවිතයේ සුවිශේෂී කඩඉම වෙන්නේ දේදුනු ආකාසේ චිත්‍රපටය. ප්‍රියන්ත කොළඹගේ මහත්මයා මට ලබාදුන් අවස්ථාව නිසා තමයි මට රංගනයට ප්‍රවේශ වෙන්න ඉඩ ලැබුණේ.
දේදුනු ආකාසේ චිත්‍රපටය අතිශයින් ජනප්‍රියත්වයට පත් වුණා. ඒ වගේම එහිදී පවනිගේ චරිතය නිසා ටීනා පිළිබඳව බොහෝ දෙනෙක් අලුතෙන් කතාබහ කරන්නත් පටන් ගත්තා. පවනි කියන්නේ දඟකාර කෙළිලොල් චරිතයක්. සැබෑ ජීවිතයේ චරිත ලක්ෂණවලට බොහෝ සමාන ලක්ෂණ තිබුණ නිසා දේදුනු ආකාසේ චිත්‍රපටයේ පවනිගේ චරිතය පහසුවෙන් රඟපාන්න හැකියාව ලැබුණා කියලා තමයි ටීනා නම් කියන්නේ.
කොහොම වුණත් දේදුනු ආකාසේ චිත්‍රපටයෙන් පසුව ප්‍රියන්ත කොළඹගේගේම නිර්මාණයක් වන සකූගේ ලෝකය ටෙලි නාට්‍යයේ හරිනිගේ චරිතය කරන්න ටීනාට අවස්ථාව උදාවෙනවා. ඒ තමයි ටීනාගේ පළමුවැනි ටෙලි නාට්‍ය රංගන අත්දැකීම.
“හරිනිගේ චරිතය කියන්නේ බටහිර පන්නයේ දුෂ්ට චරිතයක්. ටීනාට ගැළපෙන්නේ බටහිර පන්නයේ චරිත කියලා ගොඩක් අය කියනවා. නමුත් එහෙම දෙයක් නෑ. එකිනෙකට වෙනස් චරිත ලැබෙනවාට මම කැමැතියි. ගැමි චරිත, බටහිර පන්නයේ චරිත කියලා වෙනසක් නෑ. මට ලැබෙන හැම චරිතයක්ම පුළුවන් උපරිමයෙන් කරන්න උත්සාහ කරනවා. අනෙක ටීනා තුළින් එකිනෙකට වෙනස් චරිත ප්‍රේක්ෂකයන් බලාපොරොත්තු වෙනවා කියලත් මට හිතෙනවා.”
සකූගෙ ලෝකය ටෙලි නාට්‍යයෙන් පසුව නැවතත් පුංචි තිරයේදී අපට ටීනාව දැකබලා ගන්න හැකියාව ලැබුණා. ඒ ස්වර්ණවාහිනිය ඔස්සේ විකාශය වූ වලවෙට්ටුවා ටෙලි නාට්‍යය හරහා. වලවෙට්ටුවා ටෙලි නාට්‍යයේ වෙල්මාගේ චරිතය ප්‍රේක්ෂකයන් ආදරයෙන් වැලඳගත්තා. ඒ වගේම රංගන ශිල්පීන් ශිල්පිනියන් වෙත ලබා දෙන සම්මානයක් සඳහා ටීනාව ප්‍රථම වරට නිර්දේශ වෙන්නෙත් වලවෙට්ටුවා ටෙලි නාට්‍යය නිසා.
රයිගම් ටෙලි සම්මාන උළෙලේ 2021 වසරේ නැගී එන ටෙලි නාට්‍ය නිළිය වෙනුවෙන් නම නිර්දේශ වීමම තමන් ලැබූ ලොකු ජයග්‍රහණයක් කියලා තමයි ටීනා කිව්වේ. ඒ වගේම තමන්ට රංගනයෙන් දායක වන්නට ලැබුණු අවස්ථාවන් අතර වෙල්මා කියන්නේ ටීනා පුද්ගලිකව කැමති චරිතයක් කියලත් ඇය සිහිපත් කළා.
වලවෙට්ටුවා ටෙලි නාට්‍යයෙන් පසුව රංගනය සඳහා ටීනාට දිගින් දිගටම ආරාධනා ලැබුණත් ඇය ඒ සියලුම ආරාධනාවන් භාරගෙන තිබුණේ නැහැ. ඇය රංගනයේ නිරත වෙන්නේ නිරූපණ කටයුතු කරන අතරතුරදීමයි. ඒ නිසා රංගන කටයුතුවලට වගේම නිරූපණ සහ නර්තන කටයුතු සඳහාත් කාලය වෙන් කරගන්න හැම වෙලාවකම උත්සාහ ගන්නවා කියලා ටීනා අපිත් එක්ක කිව්වා.
කොහොම වුණත් ‘සිහින ගෙනෙන කුමාරියේ’ ටෙලි නාට්‍යය තුළිනුත් මේ දිනවල අපට ටීනාව මුණ ගැහෙනවා. ඉදිරියේදී තවත් ටෙලි නිර්මාණයක් හරහා ඇගේ රංගනයන් දැක බලාගන්න අවස්ථාව උදා වේවි.
“චිත්‍රපට කියන්නේ මම කැමැතිම දෙයක්. ඒත් ලංකාවේ තියෙන වාතාවරණයත් එක්ක චිත්‍රපටයක් කරන්න හොඳ වටපිටාවක්වත් අවස්ථාවක්වත් නිර්මාණකරුවන්ට තියෙනවා කියලා මම හිතන්නේ නැහැ. ටෙලි නාට්‍ය කලාවට මොනවා වේවිද කියලවත් අපි දන්නේ නෑ. ජනතාව මේ වෙලාවේ චිත්‍රපටවලට වඩා ටෙලි නාට්‍ය බලනවා. ඒ නිසා මේ දිනවල ටෙලි නාට්‍ය රංගනය සඳහා වැඩි කාලයක් වැය කරලා තියෙනවා. ඉදිරියේදී චිත්‍රපටයක හොඳ චරිතයත් සඳහා ආරාධනා ලැබුණොත් ඒ පිළිබඳව අනිවාර්යයෙන් සලකලා බලනවා.”
රංගනයට ප්‍රවේශ වීමත් සමග ටීනා නිරූපණ ක්ෂේත්‍රයෙන් ඈත් වෙලා කියලා බොහෝ දෙනෙක් කියනවා. නමුත් ඇය ක්ෂේත්‍රයට ආවේ වගේම බොහෝ දෙනෙක් ඇයව හඳුනා ගත්තේ නිරූපණය නිසා. ඒ නිසා කිසිම වෙලාවක නිරූපණය අත්හරින්න ඇය සූදානම් නැහැ.
‘මම බිකිනි ෂූට්ස් සඳහා ලැබෙන ආරාධනා භාරගන්නෙ නෑ’ කියලා ටීනා පසුගිය දවසක මාධ්‍යයට අදහස් දක්වලා තිබුණා. ඒ ගැන ඇය අපිට කිව්වේ මේ වගේ කතාවක්…
“අපි මොඩ්ල්ස්ලානේ. ඉතින් ඒ වගේම මට ගැළපෙන විලාසිතා මං කොහොමත් කරනවා. හැබැයි ඉස්සර වගේ බිකිනි ෂූට් නම් දැන් කරන්නේ නැහැ. ඉතින් ඉන්ටර්නැෂනල් වැඩක් ආවොත් කරනවා. ඒත් ලංකාවේ නම් කරන්නේම නැති තරම්.
ජාත්‍යන්තර මට්ටමේ හරි හොඳ magazine එකක හරි නිරූපණ කටයුතු කරන්න ආවොත් මම ඒවට සහභාගි වෙනවා. ලංකාවේ බිකිනි ෂූට්වලට සහභාගි වෙන්නේ නෑ කියලා මම තීරණය කළා. ඒ, දෙන මුදල ප්‍රමාණවත් නෑ වගේම මගේ ඉදිරි වැඩ කටයුතු සඳහා බිකිනි ෂූට්වලට පෙනී සිටීම හානිදායකයි කියලා හිතුණ නිසා තමයි මම ඒ තීරණය ගත්තේ.”
නමුත් ටීනා බිකිනි ෂූට්වලට නොයන නිරූපණ ක්ෂේත්‍රය ගැන කලකිරිලා කියලා කතාවකුත් සමාජ මාධ්‍යවල පැතිරෙනවා.
“නිරූපණ ක්ෂේත්‍රය ගැන මට කලකිරීමක් නෑ. ක්ෂේත්‍රයට ආව දවසේ ඉඳලා අද වෙනකම් මම නිරූපණ කටයුතුවල යෙදුණා. සමහර නිරූපණ ශිල්පිනියන්ට වැඩ නැති දවස්වල පවා මට ආරාධනා ලැබුණා. ලංකාවේ අපේ සංස්කෘතියත් එක්ක හැම අංශයකම නිරූපණ කටයුතුවලට සහභාගි වෙන එක අපහසු කාර්යයක්. දැන් ඉන්න පරම්පරාව සහ සංස්කෘතිය නිසා සමහරු නිරූපණ ක්ෂේත්‍රය දිහා බලන්නේ වැරදි කෝණයකින්. අපිට කැමැති විලාසිතා කරන්න බැරි තත්ත්වයක් ලංකාවේ තියෙනවා. පිටරට ඒ වගේ සීමාවන් නෑ. දැන් තියෙන තාක්ෂණය පාවිච්චි කරලා අපේ චරිතය විනාශ කරන්න වැඩි වෙලාවක් යන්නේ නැහැ. අද සෝෂල් මීඩියා ප්‍රබල මාධ්‍යයක් බවට පත්වෙලා. ඒ වගේ වටපිටාවක bikini shoots කරලා ඒක මගේ ඉදිරි ගමනට බාධාවක් කර ගන්න මම කැමැති නැහැ. මගේ බජට් එකට ගැළපෙන professional ෂූට් එකක් තිබුණොත් විතරක් මම ඒක කරනවා.”
නිරූපණ ක්ෂේත්‍රය තුළ වුණත් ටීනා විවිධ විලාසිතාවන් අත්හදා බලනවා. පහුගිය දවසක ඇය දෙමළ මනාලියක් ලෙසට සැරසුණු ඡායාරූප පෙළක් මුහුණු පොතේ පළවෙලා තිබුණා. ටීනා දෙමළ නිළියක් වගේ කියලත් ඒ නිසා බොහෝ දෙනෙක් කියන්න පටන් ගත්තා. ලංකාවේ නිරූපණ ශිල්පිනියන් එක්ක බලද්දි ටීනාගේ features සෑහෙන්න වෙනස් නිසා ඇය පිටරට නිළියක් වගේ කියලා බොහෝ දෙනෙක් කියනවා. ඒ ගැන අහද්දී ටීනා දුන්නේ මේ වගේ උත්තරයක්.
“සාරියට, ගවුමට වගේම මොන ඇඳුමත් මට ගැළපෙනවා කියලා මමත් හිතෙනවා. ඒක මට දෙවියන්ගෙන් ලැබුණු තෑග්ගක් කියලා මම හිතනවා. සමහර නිරූපිකාවන් photoshoot කළාට ඒවා ඒ අයට ගැළපෙන්නේ නැති අවස්ථා ඕන තරම් තියෙනවා. මම ඕනෑම ඇඳුමකට ඕනෑම සංකල්පයකට ගැළපෙනවා කියලා තමයි බහුතරයක් දෙනා කියන්නේ. ගවුමක් ඇන්දත්, සාරියක් ඇන්දත්, කලිසමක් ඇන්දත් මම ඒ ඇඳුමට නොගැළපෙනවා කියලා අහන්න වෙන්නේ කලාතුරකින්. මට ලැබිලා තියෙන පෙනුමෙන් සහ දක්ෂතාවයෙන් මීට වඩා ප්‍රයෝජනයක් ගන්න මම කැමැතියි. හැමදාම හැම දෙනාගෙන්ම දකින දෙයක් නැතිව අලුත් දෙයකට මාව ප්‍රයෝජනයට ගන්න කියලා තමයි මම අධ්‍යක්ෂවරුන්ට පවා කියන්නේ.”
විවාහය සහ ආදරය ගැන විවිධ අවස්ථාවලදී කතා කරනවා. පර්ස් එකේ සල්ලි හිඳෙනකම් කොල්ලන්ට වියදම් කළා කියලා ටීනා කිව්ව කතාවකුත් සමාජ මාධ්‍යවල පැතිරුණා. ඒ නිසා කරකාර බඳින්න නම් ඉක්මන් වෙන්නෙ නෑ කියලත් ටීනා අපිට කිව්වා.
“අනිවාරයෙන්ම විවාහ විය යුතුයි. නමුත් විවාහ වෙන්න ගැළපෙන කෙනෙක් හමු වුණේ නැත්නම් තමන්ගේ වයස කොච්චර ගියත් කලබල විය යුතු නැහැ කියලා මම හිතනවා. මේ ක්ෂේත්‍රය තුළත් සමහර අය හරි කලබලයෙන් විවාහ වෙලා ඉක්මනින් දික්කසාද වෙනවා මම දැකලා තියෙනවා. ඒ නිසා මම නම් හිතන්නේ තමන් විශ්වාස කරන තමාට ආදරය කරන පෙම්වතෙක් හමු වුණොත් විතරක් විවාහ වෙන එක හොඳයි කියලා. ඒ ඇරෙන්න කාගෙවත් කැමැත්ත, ආදරය, විශ්වාසය බලෙන් ලබාගන්න බැහැ. පිට කවුරුත් කියන දේවල් අහලා විවාහ වෙන්න හදිස්සි වෙන්න එපා. හරි තීරණයක් ගත්තේ නැති වුණොත් පසුතැවෙන්න වෙනවා.”
නිරෝෂා වාසල
